د هوايي شرکت مدیرې له خوشې کېدو وروسته چین دوه کاناډایان خوشي کړل

د لویدیځ او چین تر منځ یو لړ دیپلوماتیکې ناندرۍ داسې حال کې په ختمېدو ښکاري چې په چین کې دوه کاناډیان او په کاناډا کې د تکنالوژۍ شرکت مشره له بنده خوشي شوي دي.

د هوايي تکالوژۍ شرکت مشره مینګ وانژو چې ۲۰۱۸ کال کې د امریکا په جلب نیول شوې وه، د جمعې پر ورځ له امریکایي څارنوالانو سره له جوړ جاړي وروسته کاناډا کې خوشې شوه.

له دې څو ساعته وروسته اعلان وشو چې په چین کې د جاسوسۍ په تور نیول شوي کاناډایان میکایل سپیوور او میکایل کوپیرګ د چین له زندانه خوشي شوي او خپل هېواد ته پر لاره دي.

دوی دواړه د اغلې مینګ له نیول کېدو وروسته پر هماغه کال نیول شوي وو، خو بیجینګ ردوي چې دغه دوه کسان یې د اغلې مینګ د نیول کېدو په تړاو نیولي وو.

بل لور معترضین پر چینايي چارواکو تور پورې کوي چې له دې دواړو کسانو یې د سیاسي راکړې ورکړې د وسیلې په توګه کار اخیست.

دواړو کسانو ځانونه بیګناه بللي او د کاناډا لومړي وزیر جسټن ټروډو یوې خبرې غونډې ته ویلي دواړه کسان ''له داسې سخت وضعیته راتېر شوي چې باور نه کېږي. ''

نوموړي یوې خبري غونډې ته وویل:

''دا زموږ ټولو لپاره ښه زیری دی، چې دوی کورونو او کورنیو ته پر لار دي. دوی د تېرو یو زرو ورځو موده کې استقامت، زغم او حوصله څرګند کړل. ''

ښاغلی ټروډو وايي، دغه دواړه کسان به د یکشنبې پر ورځ هېواد ته ورسېږي.

د چین لپاره د کاناډا سفیر ډومېنیک بارټون هم له دوی سره ملګری دی.

بل لور ته د چینايي تکنالوژي شرکت هوايي د میلیاردر موسس رین ژینګفي لور مینګ وانژو له خوشې کېدو مخکې ومنله چې په ایران کې یې د هوايي شرکت کاروباري راکړې ورکړې په هکله امریکايي څارنوالانو ته ناسم معلومات ورکړي دي.

نوموړې درې کاله په کاناډا کې خپل کور کې نظر بنده وه او امریکا ته د سپارل کېدو پر ضد یې قانوني مبارزه کوله.

د جمعې پر ورځ د هوايي شرکت مالي مدیره مینګ وانژو له امریکايي څارنوالانو سره یوه جوړجاړي ته ورسېده او له هغه وروسته کاناډايي محکمې د نوموړې خوشې کېدو امر وکړ.