امریکا د چین او روسیې مشران د اقلیم د بدلون ناستې ته وبلل

امریکا د روسیې او چین مشران د نړۍ د اقلیم د بدلون په تړاو نړیوالې ناستې ته ور وبلل. دا ناسته اپرېل کې ترسره کېږي.

شي جېن پېنګ او ولادیمیر پوتین د نړۍ د ۴۰ مشرانو په نوملړ کې دي چې د ځمکې د ورځې نړیوالې ناستې ته بلل شوي دي.

د امریکا ولسمشر جو بایډن رسنیو سره خبرو کې ویلي تر اوسه د روسیې او چین مشرانو سره د دې ناستې په تړاو نه دی غږېدلی، خو هغوی پوهېږي چې دې ناستې ته بلل شوي دي.

دا ناسته د جو بایډن د ادارې لخوا د نړۍ د اقلیم بدلون ته د لومړیتوب ورکولو د هڅو برخه ده.

ښاغلي بایډن ژمنه کړې چې اقلیمي بدلونونو ته به کاري لومړیتوب ورکوي او دغه کار لپاره اړتیا ده چې د ډونلډ ټرمپ د حکومت ګڼې پرېکړې او سیاستونه لغوه شي.

دا ناسته د کورونا وېروس وبا له کبله په انلاین ډول ترسره کېږي.

تمه ده چې امریکا به د دې غونډې په درشل کې تر راتلونکو اتو کلونو پورې د کاربن خپرېدو د کمولو هدف ته رسېدو لپاره خپل پلان هم اعلان کړي.

سپینه ماڼۍ وايي ښاغلي بایډن په بلنلیک کې د دغو هېوادونو له مشرانو غوښتي چې دا ناسته د اقلیمي بدلونونو د اړوندو اهدافو د طرحې لپاره یو فرصت وګڼي.

له منځني ختیځ څخه دې ناستې ته اسراییل، سعودي عربستان، ترکیه او متحد عرب امارات وربلل شوي دي.

د نړۍ هېوادونو د پاریس د هوکړې له مخې ژمنه کړې چې د هوا د تودوخې د مخنیوي لپاره به ګامونه اخلي.

اروپايي ټولنې او په متحدو ایالتونو کې د جو بایډن ادارې دې لړ کې ژمنه کړې چې پر زرغونه انرژۍ به تریلیونونه ډالر پانګونه کوي.

دا پانګوبه به پر اقتصادي ګټو سربېره د کاربن د خپرېدو مخنیوي کې هم رغنده رول ولري.

په ورته وخت کې ټاکلې د اقلیمي بدلونونو په اړه د ملګرو ملتونو کنفرانس هم چې په "سي او پي ۲۶" مشهور دی، تر یو کلن ځنډ وروسته راتلونکې نومبر میاشت ګلاسګو کې ترسره شي.

دا کنفرانس د کورونا وبا له کبله تېر کال ترسره نه شو.

د ګلاسګو د ناستې پر وړاندې ننګونه دا ده چې ملګري ملتونه باید هېوادونه د داسې سیاستونو پرمخ وړلو ته اړباسي، چې سر له اوسه د ګلتوني "ګلخانه يي" ګازونو د کمولو لړۍ پیل کړي.

ملګري ملتونه وايي غواړي تر ۲۰۵۰ کال پورې د ډبرو سکرو له بټیو ګټه اخیستل په بشپړ ډول ودرېږي، د فسیلي سوند توکو کارونه بنده شي او نړۍ صفر ته د کربن د تولید په رسولو هوکړې ته ورسېږي.

د نړۍ ۴۰ سلنه ګلتوني ګازونه امریکا او چین تولیدوي.