اېف بي ای د مېشېګن د والۍ "تښتولو" پلان شنډ کړ

د امریکا فدرالي پولیس یا اېف بي ای وايي، د مېشېګن ایالت د ډیموکراټې والۍ ګرچن وایټمر د تښتولو او پرځولو پلان یې شنډ کړ.

مېرمن وایټمر د کورونا وبا د مخنیوي لپاره د سختو تدبیرونو پلي کولو په دلیل- چې تېره اونۍ محکمې لغوه کړل- د نیوکګرو له نیوکو او غوسې سره مخ ده.

چارواکي وايي، شپږو کسانو د هغې تښتولو سره غوښتل د "خیانت په جرم" یې محاکمه کړي.

مېرمن وایټمر وايي: "کرکې، تعصب او تاوتریخوالي ته مېشېګن کې ځای نشته او دا کسان خبیث دي. "

حکومت څه وايي؟

اېف بي ای وايي، د دغې ادارې یوه مامور جون میاشت کې د اوهایو ډبلین ښار کې یوه ناست کې ګډون درلود او دې ناسته کې د مېشېګن د یوې وسلوالې ډلې غړو د ایالتي حکومتونو د پرځولو خبره وکړه چې د دوی په باور "د امریکا اساسي قانون تر پښو لاندې کوي. "

د دې کسانو ضد دعوه کې ویل شوي، څو غړو د یوه والي د وژلو یا نیولو په هکله خبرې وکړې.

یوه ویډیو کې یو تورن د ګرځبندیز پر مهال د ورزشي کلبونو د بیا پرانیستلو د وخت په هکله د ایالتي حکومت رول غندي.

اېف بي ای د چارشنبې په ورځ په دې تړاو ۱۳ کسان یوه کور کې ونیول.

شپږ کسان- چې پنځه یې د مېشېګن او یو یې د دیلاور دی- په فدرالي محکمه کې د انسان تښتونې په دسیسته تورن شول.

ویل کېږي دوی نیت درلود چې مېرمن وایټمر د "خیانت په جرم" محاکمه کړي.

دې دوسیه کې اوه نور کسان د ترهګرۍ او بدماشۍ جرمونو اړوند تورونو سره مخ دي.

د چارواکو په خبره، دې ډلې غوښتل د دوو سوو کسانو په مټ د والۍ په مقام برید وکړي او ان د والۍ تښتولو په ګډون کسان یرغمل کړي.

دوی هیله درلوده چې خپل پلان د نومبر میاشتې تر ټاکنو مخکې پلی کړي.

چارواکي وايي، د ماتې پر مهال دې کسانو غوښتل د مېشېګن د والۍ پر استوګنځي برید وکړي.

اېف بي ای وايي، تورنو څو ایالتونو کې پوځي مانورې کړې دي او ان د بم جوړولو هڅه یې کړې ده.

اېف بي ای وايي، د دې تمرینونو ویډیو يي هم ضبط کړې ده.

د مېشېګن لوی څارنواله دانا نسل وايي، د "ولورین واچمن" وسلوالې ډلې اوه غړي پر تښتولو سربېره له لوټمارو ډلو سره په تړاو او له ترهګرو د مادي ملاتړ په برابرولو هم تورنېږي.

د هغې په خبره، د دې ډلې غړو د کورنۍ جګړې پیلولو هیله درلوده.

والۍ څه وايي؟

مېرمن وایټمر د پنجشنبې په ورځ خبري غونډه کې د دې ډلې پلان د ولسمشر ټرمپ له شعارونو سره وتاړه او ویې ویل:

"د امریکا ولسمشر وروستۍ څو میاشتې بې باورۍ ته لمن وهلو، غوسې پیدا کولو او هغو کسانو ته تسلي ویلو باندې تېرې کړې چې وېره، کرکه او بېلتون خپروي. "

هغې له جوبایډن سره د ډونلډ ټرمپ د تېرې اوونۍ تلوېزوني مناظرې ته په اشاره وویل، چې سپين پوستي برتري غوښتونکي یې په ښکاره ونه غندل:

"د هغه خبرې د کرکجنو ډلو د بسیج په شعار بدلې شوې."

خو ښاغلي ټرمپ وروستیو ورځو کې څو ځلې دا ډلې غندلې دي.

ښاغلي بایډن دا وسلوال د "ریښتونی ګواښ" په توګه غندلي او ویلي یې دي چې د ولسمشر ټرمپ یوه ټوېټ دا ډلې هڅولې دي.