کورونا وېروس: په اسپانیا کې د مړو کسانو شمېر په تدریجي ډول لږ شوی

برتانیا کې د کورونا وېروس له کبله تېرو ۲۴ ساعتونو کې ۸۱۳ کسان مړه شوي دي او دې سره په برتانیا کې د کورونا وېروس له کبله د ټولو مړو شویو کسانو شمېر له ۲۰ زره واوښت.

اوس برتانیا له ایټالیا، اسپانیا، فرانسې او امریکا وروسته پنځم هېواد شو، چې د مړو کسانو شمېر پکې له ۲۰ زرو اوښتی دی. په ټوله نړۍ کې بیا د کورونا وېروس له کبله د تایید شویو مړو کسانو شمېر نژدې ۱۹۵ زره کسانو ته رسېدلی او د وېروس ښکار شویو ټولو کسانو شمېر له ۲۷ لکو تنو اوښتی دی.

دغه راز له دغې ناروغۍ د رغېدلیو شمېر له اووه لکه ۸۱ زره کسانو زیات دی. داسې حال کې چې اروپا او امریکا کې د دغه وېروس د ښکار کسانو شمېر د نړۍ د نورو برخو پرتله زیات دی، په اسپانیا کې د کوویډ - ۱۹ ناروغۍ له کبله د مړینې شمېر په تدریجي ډول کم شوی دی.

که څه هم د شنبې پر ورځ د مړو کسانو ټول شمېر ۲۲۹۰۲ تنو ته ورسېد، خو په تېرو ۲۴ ساعتونو کې ۳۷۸ کسان مړه شوي دي.

د جمعې پر ورځ بیا ۳۶۷ کسان مړه شوي وو، چې دا په تېره یوه میاشت کې د مړینې تر ټولو ټیټ شمېر بلل شوی دی. د اسپانوي رسنیو په رپوټونو کې پر کورونا وېروس د اخته ټولو کسانو شمېر ۲۲۳۷۵۹ ښوول شوی دی.

د افغانستان په ګاونډي ایران کې تېره یوه ورځ کې د ۶۷ کسانو له مړینې وروسته د کورونا وېروس له کبله د ټولټال مړو شویو کسانو شمېر ۵۶۵۰ کسانو ته رسېدلی او په دغه هېواد کې د رسمي شمېرو له مخې ۸۹۳۲۸ کسان پر دغې ناروغۍ اخته دي.

د هند حکومت بیا له یوه میاشت قرنطین وروسته کوچنیو دکانونو یا هټیو ته د کاروبار اجازه ورکړې، خو په دې شرط چې نیمايي کارکونکي به پکې فعال وي او له یوه بله به د واټن ساتلو محدودیت پکې پلي کېږي. هند حکومت هڅه کوي، په تدریجي ډول اقتصادي فعالیتونه فعال کړي.

په دغه هېواد کې پر کورونا وېروس د اخته ۲۵۰۰۰ کسانو نومونه ثبت شوي دي او تر اوسه ۷۸۰ کسان له همدې کبله مړه شوي دي.

د افغانستان یوه بل ګاونډي پاکستان کې بیا چارواکي وايي، له کورنا وېروسه د اغېزمنو کسانو شمېر تر ۱۲۰۰۰ تنو اوښتی دی، چې له ۵۳۲۶ ناروغانو سره په پنجاب صوبه کې ډېر کسان پر دغه ناروغۍ اخته دي، خو د مړینې شمېر له پلوه خیبر پښتونخوا ډېره اغېزمنه صوبه ده، چې تر اوسه پکې ۸۹ کسان د کوویډ - ۱۹ ناروغۍ له کبله مړه شوي دي.

پاکستاني چارواکي وايي په ټول هېواد کې د اپریل تر ۲۵ نېټې پورې د ۲۵۶ مړو شویو کسانو له ډلې د ۷۵ سلنه کسانو عمرونه د ۵۰ او ۷۹ کلونو تر منځ وو. دې کې ۲۱ سلنه ښځې او ۴۴ سلنه نارینه شامل دي.

په دې هکله یوه رپوټ کې ویل شوي، په ټول هېواد کې له وېروسه د اغېزمنو کسانو له ډلې د نژدې ۳۸ سلنه کسانو عمرونه د ۲۰ او ۳۹ کلونو تر منځ دي او له ۴۰ تر ۵۹ کلنو پورې ۳۰ سلنه خلک په دې کې شامل دي.