د قطر هوايي شرکت وايي، له بیروت څخه یې تر سبا پورې الوتنې په موقتي توګه
ځنډولې دي.
د اې اېف پي خبري اژانس، د قطر هوايي شرکت له قوله ویلي، "موږ ته زموږ
د مساپرو خوندیتوب تر ټولو ستر لومړیتوب دی."
نن سهار، د بیروت په رفیق حریري نړیوال هوایی ډګر کې د ترکش ایرلاین،
ایر فرانس او اردن هوايي شرکت په ګډون ګڼې الوتنې لغوه شوې دي.
په وروستیو ورځو کې د جرمني لفتانزا، ایر فرانس او ډېلټا ایر لاین هم
بېروت ته الوتنې ځنډولي، چې ورسره اسرائیلو او ایران ته د ځینې بار وړونکو الوتکو
چارې هم اغېزمنې شوې دي.
تیره اونۍ، د قطر هوايي شرکت او همدارنګه د ایران ملي هوایي شرکت هما بیروت
ته د الوتنو پر مهال له مساپرو سره د پېجرونو او واکي ټاکي مخابرو لېږد هم منع کړی
و.
بل پلو اسرائیلي پوځ د تېرې ورځې هوايي بریدونو په اړه په خپل وروستي او
تازه رپوټ کې ویلي، د دوشنبې په ورځ یې په لبنان کې شاوخوا ۱۶۰۰ ځایونه په نښه
کړي دي.
ډېری بریدونه پر سویلې برخو ورټول وو، خو ځینې یې د لبنان ختیځ او شمال
ختیځ ته هم غځېدلي دي.
یو برید د هرمیل ښار په سوېل کې د اسرائیلو له پولې څخه شاوخوا ۱۳۰ کیلومتره لېرې پر یوه ځای شوی دی.
د لبنان د روغتیا وزارت وايي، په دغو بریدونو کې د ۳۵ ماشومانو په
ګډون ۴۹۲ تنه وژل شوي
او دا له ۲۰۰۶ کال راهیسې د
اسرائیل او حزب الله د جګړې تر ټولو خونړۍ ورځ بلل شوې ده.
اسرائیل وايي، د حزب الله هدفونه یې په نښه کړي، خو لبنان وايي، زیاتره
بریدونه د استوګنې پر ځایونو شوي دي.
دغه راز د اسرائیلو پوځ وايي، په ځايي
وخت د سهار له ۹:۳۰ او ۹:۴۵ لسګونه توغندي
د اسرائیلو پر شمالي سیمو توغول شوي دي."ځینې یې خنثی کړای شوي او پاتې یې په
خلاص سیمه کې لګېدلي دي."
په ورته وخت کې د لبنان
لومړی وزیر نجیب میقاتی وايي نیویارک ته ځي چې په هېواد کې یې د نویو رامنځ شویو
پېښو په اړه خبرې وکړي.
دا مهال په نیویارک کې د
ملګرو ملتونو د عمومي اسمبلۍ غونډه روانه ده او ټاکل شوې وه چې ښاغلی میقاتي په دې
غونډه کې ګډون وکړي.
خو نوموړي د شنبې په ورځ
په لبنان کې د سختو بریدونو له امله خپل سفر لغوه کړ.
په یوه بیانیه کې راغلي، نیویارک
ته د میقاتي د سفر معنی دا ده چې هغه د حکومت د کابینې هغه غونډه هم لغوه کوي چې ټاکل
شوې وه نن سه شنبې ترسره شي.