تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
په هند کې ډاکتران وايي، له هغه ځایه د موندل شویو مړیو شمېر ۲۷۰ ته رسېدلی، چې د پنجشنبې پر ورځ پکې د ایرانډیا الوتکه وغورځېده. هغه الوتکه د هند له احمد اباد ښاره د برېتانیا لندن ته روانه شوه او له الوت لږ وروسته د خلکو اوسېدو په یوه نژدې سیمه کې وغورځېده.
د هند احمد اباد کې د ځايي پولیسو مشر جي اېس ملک وايي، داسې نه ښکاري چې د غورځېدلې الوتکې په مسافرو کې به څوک ژوندي پاتې وي.
نوموړي دغه راز ویلي، دا چې الوتکه داسې ځای کې غورځېدلې، چې خلک پکې مېشت دي، ''ښايي ځینې ځايي خلک هم وژل شوي وي.''
د اې پي خبري اژانس په رپوټ کې د نوموړي له قوله ویل شوي، ''د کره شمېرو معلوملو لپاره کار روان دی.''
د بریتانیا لومړي وزیر کیئر سټارمر د هند په احمد اباد کې د الوتکې غورځېدو پر پېښه خواشیني څرګنده کړې.
نوموړي پر خواله رسنۍ اېکس یوه پیغام کې لیکلي: ''د هند په احمد اباد کې د هغې الوتکې غورځېدو پېښې صحنې خورا بوږنونکې دي، چې لندن ته پر لار وه او ګڼ شمېر بریتانویان هم پکې وو.
ما ته د وضعیت په هکله پرلپسې تازه معلومات راکول کېږي او په دې سخت ټکان ورکوونکي وضعیت کې زه د مسافرو او د دوی له کورنیو سره خواخوږي څرګندوم.''
د هند ملکي هوايي چلن مشر (ډي جي) فیض قدوايي، د بي بي سي هندي څانګې ته ویلي، دا بي۷۸۷ ډریم لائنر ډوله الوتکه، چې له احمد اباد نه د لندن ګیټویک هوايي ډګر ته پر لار وه، داسې ځای کې غورځېدلې، چې خلک پکې مېشت دي.
نوموړی وايي، الوتکې له ځايي وخت سره سم پر ماسپښین یوه بجه او ۳۸ دقیقې الوت وکړ او پینځه دقیقې وروسته وغورځېده.
دغه افسر زیاتوي، د الوتکې پیلوټ سمیت سبهروال و او کلائیو کیوندر ورسره د مرستیال پیلوټ په توګه دنده درلوده.
نوموړی زیاتوي په الوتکه کې ۲۳۰ لویان، دوه نوي زېږېدلي ماشومان او د عملې ۱۰ کسان ناست وو.
د ائرانډیا هوايي شرکت د دې الوتکې په هکله وايي، په دې بوئنګ ۷۸۷-۸ ډوله الوتکه کې ۱۶۹هندیان، ۵۳ برېتانویان، یو کاناډایی او ۷ هالنډي وګړي ناست وو.
په احمد اباد کې د ځايي پولیسو یوه لوړپوړي افسر اې این ای خبري اژانس ته ویلي، د پېښې ښکار شوې الوتکه د ډاکترانو په یوه لیلیه کې غورځېدلې ده.
یاد افسر وايي، د اوروژنې کارکوونکي، پولیس او نور مرستندویان په څو دقیقو کې د پېښې ځای ته رسېدلي دي او د مرستې چارې دوام لري.
په احمد اباد کې د سردار ولب بهايي پټېل هوايي ډګر یوه ویندوی ویلي، هوايي ډګر د اوس لپاره غیرفعال شوی او تر امرثاني پورې ټولې الوتنې لغو شوې دي.
اوس موږ د الوتکې غورځېدو لومړنی تصویر ترلاسه کړی دی. په لومړنیو تصویرونو کې لیدن کېږي، چې د پېښې له ځایه لوګي پورته کېږي.
د فلائټ راډار وېبپاڼې معلومات ښيي، چې غورځېدلې الوتکه بوئنګ ۷۸۷-۸ ډریم لائنر ډوله وه، چې د وې ټي-اې این بي په نامه ثبت شوې وه.
د سیټ ګورو په نامه وېبپاڼې معلومات ښيي، چې دې الوتکې د ۲۵۶ کسانو کېناستو اسانتیا درلوده، خو دا معلومه نه ده، چې د پېښې پر مهال څومره کسان پکې ناست وو.
له پلان سره سم به دغه الوتکه د ماښام پر شپږ بجو او ۲۵ دقیقو د لندن ګیټویک هوايي ډګر ته رسېده.
د دې الوتکې مخینه ښيي، چې په تېر کې یې د هند او پاریس، فرانکفرټ، توکیو، امسټردام او ملبورن تر منځ د معمول الوتنې کولې.
د هند هوايي شرکت ائرانډیا له پېښې لږ وروسته په یوه اېکس پیغام کې تائید کړه، چې: ''اې ای ۷۱ الوتکه چې د احمد اباد او لندن ګېټویک هوايي ډګر تر منځ یې سفر کاوه، نن د ۲۰۲۵ کال جون پر ۱۲ له یوې حادثې سره مخامخ شوه. اوسمهال موږ د معلوماتو یو ځای کولو په حال کې یو او ژر تر ژره به دغه معلومات شریک کړل شي.''
د هند په لوېدیځ احمد اباد کې هوايي ډګر ته نژدې یوه الوتکه غورځېدلې ده. رپوټونو کې ویل شوي، چې دا الوتکه برېتانیا ته روانه وه، چې له پېښې سره مخامخ شوه، خو دا رپوټونه تر اوسه نه دي تائید شوي.
د رویټرز خبري اژانس په رپوټ کې د ځايي پولیسو له قوله ویل شوي، چې په الوتکه کې ۲۴۲ مسافر ناست وو.