تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
طالبان: پاکستاني پلاوي سره د امنیتي اندېښنو، ډرون الوتنو او د وسله والو پر فعالیت خبرې شوې
افغانستان کې د طالبانو حکومت وایي کابل ته له ورغلي پاکستاني پلاوي سره یې "د دواړو لوريو پر امنيتي اندېښنو" د بې پیلوټه الوتکو یا ډرون پر الوتنو او د وسله والو پر فعاليت "واضحې او مفصلې خبرې" کړې دي.
کابل ته د تللي پاکستاني پلاوي مشري دفاع وزیر خواجه اصف کوله او په خپرو شویو عکسونو کې ښکاري چې د دغه هېواد د پوځي استخباراتي ادارې "ای اېس ای" مشر جنرال ندیم انجم، افغانستان لپاره د پاکستان ځانګړی استازی محمد صادق خان او د پاکستان سفیر عبیدالرحمن نظاماني هم ورسره مله دي.
دوی د طالبانو حکومت د لومړي وزیر له اقتصادي مرستیال ملا عبدالغني برادر، ملي دفاع وزیر مولوي محمد یعقوب مجاهد، کورنیو چارو وزیر سراج الدین حقاني، بهرنیو چارو وزیر امیر خان متقي او همدا راز د استخباراتو لوی رییس ملا عبدالحق وثیق سره لیدلي دي.
د طالبانو حکومت ویاند ذبیح الله مجاهد پر خپل ټویټر خپره کړې اعلامیه کې زیاته کړې چې "د دواړو هېوادونو ترمنځ پر ترانزیټ، تجارتي او اقتصادي اړيکو، د کرښې په اوږدو کې د تګ راتګ پر ستونزو او پاکستان کې د افغان مهاجرینو د مشکلاتو په اړه ګټور بحثونه وشول. دواړو لوريو وپتېيله چې اقتصادي او سوداګريز مسايل بايد د سياسي ستونزو له امله زيانمن نه شي."
د پاکستان بهرنیو چارو وزارت هم په دې اړه یوه اعلامیه کې ویلي چې د دواړو خواو ترمنځ سیمه کې د ترهګرۍ د زیاتېدونکي ګواښ، په ځانګړې توګه د پاکستاني طالبانو تحریک (ټيټيپي) او داعش پر خطرونو خبرې وشوې.
د پاکستان اعلامیه کې دا هم ویل شوي چې دواړو خواوو د بېلابېلو ډلو او سازمانونو له خوا د ترهگرۍ گواښ پر وړاندې کارنده مبارزې لپاره په "گډه همکارۍ هوکړه کړې" ده.
دا د ۲۰۲۱ کال اګست کې پر افغانستان د طالبانو له بیا واکمنېدو راهیسې کابل ته د پاکستان د دفاع وزیر خواجه اصف او د 'ای اېس ای' د مشر په توګه تر ټاکل کېدو وروسته د ندیم انجم لومړنی سفر دی.
دا پاکستانی پلاوی داسې مهال افغانستان کې طالبانو حکومت د همکارۍ جلبولو لپاره کابل ته تللی، چې هېواد کې یې د سیاسي او اقتصادي کړکېچ ترڅنګ د ناامنۍ پېښې په ډېرېدو دي.
په دې لړ کې له تېرې یوې میاشت کمې موده کې په پېښور او کراچۍ پر پولیسو دوه مرګوني بریدونه هم وشول.
اسلام اباد د پاکستاني طالبانو تحریک دغو ناامنیو او بریدونو کې ښکېل ګڼي او وايي دا ډله افغانستان کې خوندي پټنځایونه لري.
خو طالبان افغانستان کې د بهرنیو وسله والو له حضور انکار کوي او وايي چا ته اجازه نه ورکوي چې د افغانستان خاوره د بل هېواد خلاف وکاروي.
د سفر مثبتو پایلو ته د پاکستان هیلې
یوه پاکستاني چارواکي کابل ته یې د دغه پلاوي په سفر کې برخه لرله، پاکستاني رسنیو ته ویلي د پاکستاني پلاوي سفر ښه و او پایله یې مثبته وه.
یوه بل چارواکي هم د سفر ګټورتیا تایید کړې او ویلي چې په افغانستان کې د طالبانو حکومت د ترهګرو ډلو په ځانګړي ډول د پاکستاني طالبانو غورځنګ پر ضد د خپلو کړنو جزییات له پاکستاني پلاوي سره شریک کړي دي.
دوی ویلي، پاکستاني پلاوي د طالبانو حکومت چارواکو سره خپلې اندېښنې شریکې کړې او ډانګ پېیلې یې ورته وویل چې له ټيټيپي سره یې د خبرو اترو سیاست پای ته رسېدلی دی.
د سرچینو په خبره، دا ځل د طالبانو حکومت چارواکو هم د ټي ټي پي او اسلام اباد ترمنځ د سولې پر خبرو ټینګار نه دی کړی.
دغو پاکستاني چارواکو ډاډ ور کړی چې راتلونکو اونیو کې به د پاکستاني پلاوي د سفر پایلې ولیدل شي، ځکه پاکستان تمه لري د طالبانو حکومت به افغانستان کې د ترهګرو ډلو پر وړاندې ځانګړي ګامونه اوچت کړي.
د یادونې ده چې د طالبانو حکومت په کوربتوب او منځګړیتوب د اسلام اباد او ټيټيپي ترمنځ د سولې خبرې او ان لنډمهاله اوربند هم شوی و.
خو دا پروسه وروسته ناکامه او اوربند مات شو.
تر دغه پاکستاني پلاوي شاوخوا درې میاشتې وړاندې بهرنیو چارو کې د پاکستان د دولت وزیره حنا رباني کهر هم د یوه پلاوي په مشرۍ کابل ته تللې وه او د طالبانو حکومت د بهرنیو چارو وزیر امیرخان متقي او څو نورو لوړ پوړو چارواکو سره یې لیدلي و.