تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د ترکیې لوېدیځ 'دوزجه' ښار کې زوروره زلزله شوې
د ترکیې د تر ټولو ستر ښار استانبول ختیځ خوا دوزجه ښارګوټي کې د رېښتر په کچه ۶ درجې زلزله شوې ده.
رپوټونه وايي دا زلزله دومره زوروره وه چې ټکانونه یې شاوخوا ۲۱۰ کیلومتره لېري د استانبول مرکز او پلازمېنه انقره کې هم محسوس شوي دي.
د دې زلزلې ژور والی د ۲ او ۱۰ کیلومترو ترمنځ اټکل شوی دی.
رپوټونو کې راغلي چې په سیمه کې د برېښنا جریان ټکنی شوی او یو شمېر کسانو د کورونو له برنډو ځانونه غورځولې دي.
د ترکیې کورنیو چارو وزیر سلیمان سویلو ویلي تر اوسه د مړینې کوم راپور نشته.
پر خواله رسنیو د دې زلزلې ځینې ویډیوګانې هم خپرې شوې دي.
دوزجه کې په ۱۹۹۹ کال هم د رېښتر په کچه یوه ۷ اعشاریه ۲ درجې زلزله شوې وه.
دې زلزله کې لږ تر لږه ۸۴۵ کسان وژل شوي وو.
تر هغې څو میاشتې وړاندې په اېزمیت ښار کې یوې بلې تر دې زورورې زلزلې له ۱۷ زرو ډېر کسان وژلي وو.
د دوزجه ښاروال رسنیو ته ویلي د دغه ښار شاوخوا ۸۰ سنله ودانۍ د ۱۹۹۹ کال تر زلزلو وروسته رغول شوې دي.