په نیویارک کې د لارۍ بریدګر ته لس ځله د عمري زندان او ۲۶۰ کاله بند سزا ورکړل شوه

د اسلامي دولت نومې ډلې یا داعش هغه پلوي کس ته چې د امریکا په نیویارک کې یې پر پلي خلکو لارۍ ګاډی خېژولی و، د څو ځله عمري زندان سزا ورکړل شوې.

سایفولو سیپوف ۲۰۱۷ کال کې د نیویارک په منهټن واټ خپله لارې پر پلي روانو خلکو وخېژوله، چې له کبله یې اته کسان وژل شوي وو.

نوموړي ته د لس ځله عمري زندان – جمع ۲۶۰ کاله بند سزا ورکړل شوې، چې اته سزاګانې به یې یو ځای دوام کوي او هېڅکله به له زندانه نه خوشی کېږي.

ده ته د سزا له اورېدل کېدو سره هممهاله وویل شول، چې د ډېرو خلکو ژوند یې تباه کړی، خو نوموړي د محاکمې پر مهال هېڅ ډول پښېماني څرګنده نه کړه.

د ازبکستان اوسېدونکي سیپوف چې اوس یې عمر ۳۵ کالو ته رسېږي، د ۲۰۱۷ کال د هالوین مراسمو پر مهال د منهاټن واټ لوېدیځ لور ته پر بایسکل سپرو او پلي کسانو کرایه کړې لارې خېژولې وه.

نوموړي له ګاډي د وتلو پر مهال ''الله اکبر'' ناره کړې وه او پولیسو پرې هغه مهال ډزې کړې وې.

د نوموړي محاکمې لړ کې مخکې محکمې ته ویل شوي و، سیپوف هیله من و، چې له دې برید وروسته به د داعش غړیتوب ورکړل شي.

ښايي، دی به د کولوراډو په 'سوپر ماکس' زندان کې ساتل کېږي، چې سخت امنیتي تدبیرونه لري او زندانیان یې هره ورځ تر ۲۳ ساعتونو پورې د زندان په کوټو کې ساتل کېږي.

په هغه پېښه کې پنځه وژل شوي کسان له ارجنټاینه امریکا ته تللي سیلانیان و او یوه ۳۱ کلنه ښځه وه، چې د ښار لیدو ته تللې وه.

پېښه کې دوه امریکایان وژل شوي و، چې یو یې ۳۲ کلن اقتصادي کارکوونکی او بل یې ۲۳ کلن سوفټوئر انجینر و.