تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
افغانستان سره څه باندې یو میلیارد ډالره نغدې مرستې؛ ملګري ملتونه وايي واکمنو ته نه ورکول کېږي
په افغانستان کې د ملګرو متلونو استازولۍ یوناما وايي، تېر یوه کال کې یې څه باندې یو میلیارد نغد ډالر د بشري مرستو په ډول دغه هېواد ته وړي دي.
د دغو مرستو د یوې برخې په ډول پرون (دوشنبه) هم ۴۰ میلیونه ډالره افغانستان ته استول شوي دي.
یوناما وايي:"افغانستان سره شوې بشري مرستې په یوه شخصي بانک کې اچول کېږي او اوسنیو واکمنو او یا هم د هغوی تر واک لاندې د افغانستان بانک ته نه ورکول کېږي."
ملګرو ملتونو د روان کال په پیل کې د افغانستان د بشري کړکېچ لپاره د څه باندې څلور میلیارد ډالرو مرستې غوښتنه کړې وه خو تر اوسه یې د غوښتل شویو پيسو ډېره برخه نه ده تر لاسه کړې.
د ملګرو ملتونو د کډوالو ادارې ویلي و چې د افغانستان په ګاونډیو هېوادو کې د افغان کډوالو د مرستې لپاره هم څه باندې ۶۰۰ میلیونه ډالرو ته اړتیا ده.
تېر اګست کې پر افغانستان د طالبانو له واکمنۍ راهیسې د ایران او پاکستان په ګډون سل ګونه زره افغانان ګاونډیو هېوادونو ته تللي دي.
په افغانستان کې د ملګرو ملتونو د مرستو د همغږۍ اداره وايي، په دغه هېواد کې "نژدې ۲۴ میلیونه خلک د ژوندي پاتېدو لپاره بشري مرستو ته اړتیا لري."
د دغه بنسټ په وینا، له دغې ډلې ۱۹ میلیونه افغانان د خوړو خوندیتوب نه لري.
په افغانستان کې چې اقتصاد یې د جمهوریت پرمهال هم پر بهرنیو مرستو پایېده، د طالبانو له بیا واکمنېدو وروسته د مرستو کچه کمه شوه او ډېر شمېر خلک بې دندو شول.
د کار د نړیوال سازمان د وروستیو شمېرو له مخې، تېره یوه کال کې نژدې یو میلیون خلک بې دندو شوي دي.
د ملګرو ملتونو بشري مرستې ښايي د لنډ مهال په افغانستان کې د بې وزلو لاسنیوی وکړي، خو باور دا دی چې له اقتصادي پلوه پر ځان د تکیې لپاره باید په کور دننه اقتصادي فرصتونه چمتو کړل شي، داسې څه چې اوس په نشت حساب دي.