د افغانستان والیبال ملي لوبډلې د مالیزیا لوبډله ماته کړه

د افغانستان والیبال ملي لوبډلې په خپله دویمه سیالي کې د مالیزیا لوبډلې ته ۱ - ۳ ماتې ورکړه. او په دې سره یې د دغو سیالو منځ لوبو ته لار ومونده.

افغان لوبډلې په ښې تخنيکي سیالۍ سره وکولای شول، خپلې سيالې لوبډلې ته ماتې ورکړي.

د افغانستان والیبال ملي لوبډلې لومړی او دویم سېټونه ۲۵ د ۲۲ او ۲۵ د ۲۱ نمرو سره وګټل. درېيم سېټ بیا د مالیزیا لوبډلې ۲۵ د ۱۹ نمرو په وړاندې وګاټه. خو د لوبې برخلیک په څلورم سېټ کې وټاکل شوو په دغه سېټ کې افغانستان د مالیزیا پر وړاندې ۲۵ د ۱۹ نمرو په لرلو سره برلاسي حاصله کړه او لوبه یې هم وګټله.

د نشنل کپ سیالۍ د مالدیف په کوربتوب د څلورو هېوادونو ترمنځ روانې دي چې د روانې فبرورۍ میاشتې په ۲۳ مه پیل شوي او د همدې میاشتې تر ۲۷ مې نېټې به دوام وکړي.

افغان لوبډلې په خپله لومړۍ سیالي کې سنګاپور لوبډلې ته هم یو - درې ماتې ورکړې وه.

افغان ملي لوبډله به سبا د شنبې په ورځ په بله لوبه کې د مالدیف له لوبډلې سره مخ کېږي.

په تېر ۲۰۲۲ کال کې د افغانستان والیبال لوبډلې د اسیا مرکز زون په سیالیو کې چې د پاکستان په لاهور کې ترسره شوې ګډون کړی و، خو هلته یې خپلې ټولې لوبې د بنګله دېش، شري لنکا او پاکستان لوبډلو ته بایللې وې.

د افغانستان والیبال فدراسیون تر روانو سیالیو مخکې ویلي وو، دوی په بشپړې تیارۍ دغو سیالیو ته روان دي.