تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پکتیا؛ ډنډ پټان ولسوالۍ کې د جومات مخ ته چاودنې مرګژوبله اړولې
د افغانستان سویل ختیځ کې د پکتیا ولایت چارواکو ویلي چې د دغه ولایت ډنډ پټان ولسوالۍ کې یوې چاودنې ۲۳ کسانو ته مرګژوبله اړولې ده.
رپوټونه وايي دا چاودنه د ډنډ پټان ولسوالۍ د خروټو په نوم کلي کې د یوه جومات مخ ته شوې ده.
پژواک خبري اژانس د سیمې د یوه اوسېدونکي مدین خان له خولې لیکلي: "چاودنه هغه مهال رامنځته شوه چې د خروټو په کلي کې خلک د جمعې له لمانځه څخه د راوتلو په حال کې وو."
پژواک لیکلي د پکتيا د اطلاعاتو او کلتور ریيس خالقيار احمدزي هم د دې چاودنې پخلی کړی.
هغه ویلي چې په دې پېښه کې درې تنه وژل شوي او ۲۰ نور ټپيان دي.
هغه زیاته کړې چې د ځینو ټپيانو وضعیت ښه نه دی.
د طالبانو د حکومت امنیتي ادارو تر اوسه د دې چاودنې په اړه څه نه دي ویلي او نه یې هم تر اوسه چا مسوولیت منلی.
د یادونې وړ ده چې نن تر ډېورنډ کرښې هاخوا د پېښور د قصه خوانۍ سیمې یوه جومات کې هم د جمعې لمانځه پر مهال مرګونې چاودنه شوې وه.
د پېښور چاودنه د شعیه مذهبو یوه جومات کې شوې او ۵۶ کسان پکې وژل شوي وو.
د افغانستان پخواني ولسمشر حامد کرزي دا دواړه چاودنې بشري ضد جنایتونه او "د ټولو انساني او اسلامي ارزښتونو خلاف عمل" بللی دی.
د طالبانو ویاند ذبیح الله مجاهد هم د پېښور چاودنې په اړه پر خپل ټویټر لیکلي چې "په ملکي خلکو او عبادت کوونکو برید هېڅ توجیه نه لري".