प्रमुख विपक्षी नेपाली कांग्रेसले भारतले दार्चुलाको महाकाली नगरपालिका-५ गल्फैमा
एकतर्फी रूपमा बनाइरहेको तटबन्ध निर्माणको
काम तत्काल रोक्न कूटनीतिक रूपमा पहल गर्न सरकारसँग माग गरेको छ।
प्रतिनिधिसभाको बैठकमा बोल्दै नेपाली कांग्रेसका नेता दिलेन्द्र
प्रसाद बडूले नेपाल समेतको जमिनलाई समेटेर भारतले तटबन्ध बनाएको र त्यसले भविष्यमा
नेपालमा गाउँ नै सखाप हुने स्तरमा बाढी निम्त्याउने चेतावनी दिए।
उनले गृह मन्त्रालय र परराष्ट्र मन्त्रालयलाई बारम्बार
ताकेता गर्दा पनि भारतका तर्फबाट भइरहेको तटबन्ध निर्माण रोक्न कुनै पहल नभएको
बताए।
“पटकपटक ताकेता गर्दा
नेपाल सरकार सुतेर बसेको छ। अहिले हाम्रो ३५ हेक्टर जमिनमा तटबन्ध बनाउन लागिएको
छ। यस्तो भयो भने दुई-तीन वर्षभित्र हाम्रो घना जनसङ्ख्या भएका गाउँ र कृषियोग्य जमिन सखाप हुने खतरा
छ।”
सीमामा कुनै संरचना बन्दा जानकारी
दिनुपर्ने अन्तर्राष्ट्रिय मान्यता रहेको भन्दै उनले यस विषयमा सरकार मौन रहनुको
कारणबारे जबाफ दिन परराष्ट्र मन्त्रालय र गृह मन्त्रालयसँग माग गरेका छन्।
बैठकमा
प्रधानमन्त्री तथा मन्त्रिपरिषद्को केपी शर्मा ओलीको तर्फबाट कानुनमन्त्री
लीलानाथ श्रेष्ठले न्याय परिषद्, र न्याय सेवा आयोगको वार्षिक आर्थिक प्रतिवेदन पेस गरेका
थिए।
उद्योग तथा वाणिज्य र श्रम तथा उपभोक्ता हित समितिको वार्षिक प्रतिवेदन समितिका
सभापति विमलप्रसाद श्रीवास्तवले प्रस्तुत गरेका थिए।
प्रतिनिधिसभाको
बैठक चैत १८ गते बुधवारसम्मका लागि स्थगित भएको छ।