तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
घटनाको १३ औँ दिनसम्म प्रहरीको निगरानीमा रहेका किशोरलाई दुई दिनअघि नियन्त्रणमा लिइएको प्रहरीले बताएको छ।
बैतडीको दोगडाकेदार गाउँपालिकामा १७ वर्षीया भागरथी भट्टको शव भेटिएको दुई सातापछि प्रहरीले एक किशोरलाई आरोपितको रूपमा बुधवार सार्वजनिक गरेको छ।
प्रारम्भिक अनुसन्धानका क्रममा देखिएको प्रमाण र सन्दिग्धको स्वीकारोक्तिका आधारमा उनलाई सार्वजनिक गरिएको सुदूरपश्चिम प्रहरी प्रमुख डीआईजी उत्तमराज सुवेदीले बताएका छन्।
घटनाको १३ औँ दिनसम्म प्रहरीको निगरानीमा रहेका उनलाई दुई दिनअघि नियन्त्रणमा लिइएको प्रहरीको भनाइ छ।
दुबईकी शासकी छोरी लतिफालाई बन्धक बनाइएको विषयमा संयुक्त राष्ट्रसङ्घले यूएईसमक्ष कुरा उठाउने बताएको छ।
आफ्ना पिताले उनलाई सन् २०१८ देखि बन्धक बनाएको आरोप राजकुमारी लतिफाले लगाएकी छन्।
बीबीसीलाई उपलब्ध गराइएका भिडिओहरूमा उनले आफ्नो ज्यान सङ्कटमा परेको बताएको सुनिन्छ। ती भिडिओ उनले लुकेर खिचेकी थिइन्।
भिडिओ सार्वजनिक भएपछि संसारभरिबाट राष्ट्रसङ्घले अनुसन्धान गर्नुपर्ने आवाज उठेको छ।
लतिफाले सन् २०१८ मा आफू भाग्न खोजेपछि बन्धनमा परेको बताएकी छन्।
उनका पिता शेख मोहम्मद बिन रशिद अल मक्तुम संसारका धनी शासकमध्ये एक हुन्। उनी दुईका शासक र यूएईका उपराष्ट्रपति हुन्।
म्यान्मारमा सैन्य शासनको विरोध गर्न प्रदर्शनकारीहरूले याङ्गुनको सडकमा गाडी तेर्स्याएर अवरोध गरेका छन्। याङ्गुनमा आज दशौँ हजार मानिसहरू भेला भएर प्रदर्शन गरे।
माघ १९ मा सेनाले शासनसत्ता आफ्नो हातमा लिएपछि आयोजित प्रदर्शनमध्ये यसलाई सबैभन्दा ठूलो मानिएको छ। प्रदर्शनकारीहरूले नेत्री आङ सान सू चीसहित सबै नेताहरूलाई मुक्त गर्न माग गरेका छन्।
आजको प्रदर्शनले याङ्गुनको ट्राफिक व्यवस्था प्रभावित भएको छ।
मङ्गलवार सेनाले सू चीलाई अदालतसमक्ष पेस गर्दा दोस्रो अभियोग पनि लगाएको थियो। सेनाले म्यान्मारमा फेरि निर्वाचन गराउने बताएको छ।
चितवन राष्ट्रिय निकुञ्जमा एउटा गैँडा मृत फेला परेको राष्ट्रिय समाचार समितिले जनाएको छ।
नवलपरासीको गैँडाकोट नगरपालिकास्थित गिद्धेनी पोस्टनजिक एउटा भाले गैँडाको शव फेला परेको हो।
निकुञ्जका अनुसार झन्डै ३० वर्षे उक्त गैँडाको शरीरबाट खाग तथा खुर नझिकिएको हुनाले त्यो सिकारीको निसानामा नपरेको अनुमार गरिएको छ।
निकुञ्जमा यो आर्थिक वर्षको अहिलेसम्म २४ वटा गैँडा मरिसकेको तथ्याङ्कले देखाउँछ।
तीमध्ये चारवटा अवैध सिकारीले मारेका हुन् भने अन्य प्राकृतिक कारणबाट मरेका हुन्।
पछिल्लो गणनाअनुसार नेपालमा ६४५ गैँडा छन् तीमध्ये चितवन राष्ट्रिय निकुञ्जमा मात्रै ६०५ वटा छन्।
यो पनि हेर्नुहोस्
नेपाल आयल निगमले मङ्गलवार मध्यरातदेखि लागु हुने गरी पेट्रोलियम पदार्थको मूल्य समायोजन गरेर नयाँ मूल्य कायम गरेको छ।
निगमले डिजेल, पेट्रोल, मट्टितेल र आन्तरिक हवाई इन्धनको मूल्यमा प्रतिलिटर दुई रुपैयाँ वृद्धि गरेको छ।
अब काठमाण्डू उपत्यकामा नयाँ मूल्य
वाग्मती प्रदेशसभाको सातौँ बैठक बुधवार दिउँसो बस्ने भनिएकोमा 'विशेष कारणवश' स्थगन गरिएको प्रदेशसभा सचिवालयले जनाएको छ।
सभाको बैठक अर्को सूचना जारी भएपछि मात्र सञ्चालन हुने प्रदेशसभा सचिवालयका प्रमुख सचिव कृष्णहरि खड्कालाई उद्धृत गर्दै राष्ट्रिय समाचार समितिले जनाएको छ।
यसअघि प्रदेशसभाको बैठक माघ १९ गते बस्ने भनिए पनि माघ १८ गते राति सूचना जारी गरेर फागुन ५ गतेसम्मका लागि स्थगित भएको थियो ।
नेपाल कम्युनिस्ट पार्टी (नेकपा) को प्रचण्ड-माधव नेपाल समूहका ४५ जना प्रदेशसभा सदस्यले मुख्यमन्त्री डोरमणि पौडेलविरुद्ध अविश्वासको प्रस्ताव दर्ता गराएका छन्।
आज बस्ने बैठकमा उक्त विषयमा दलगत रूपमा धारणा राख्ने गरी बैठक तय भएको थियो।
कुन दलका कति सांसद?
पेरूका पूर्वराष्ट्रपति मार्टिन भिज्कार्रालाई नियम मिचेर आफूले कोभिड-१९ खोप लिएको आरोप लागेको छ।
उनले आफूले सपत्नीक गत अक्टोबरमा खोपको परीक्षण चलिरहँदा स्वयंसेवक बनेर खोप लिएको दाबी गरेका छन्।
तर मङ्गलवार संसद्मा भएको सुनुवाइमा उपस्थित भएका एक चिकित्सकले पूर्वराष्ट्रपतिको दाबीको खण्डन गरेका छन्।
खोप परीक्षणको नेतृत्व गरेका डा. जर्मन मलागाले भने, "उनले मसँग दुईवटा खोपका लागि अनुरोध गरे।" भिज्कार्रालाई गत वर्ष नोभेम्बरमा भ्रष्टाचारको छुट्टै आरोपमा महाभियोग लगाएर पदमुक्त गरिएको थियो।
एउटा पत्रिकाले उनले तथा अन्य सरकारी अधिकारीहरूले सुरुमै खोप लिएको विषयमा समाचार प्रकाशित गरेपछि पूर्वराष्ट्रपति फेरि विवादमा परेका हुन्।
पेरूका राष्ट्रपति फ्रान्सिस्को सागास्टीका अनुसार ४८७ व्यक्तिले नियम मिचेर चीनमा बनेको कोभिडविरुद्धको खोप लिएका थिए।
म्यान्मारमा सेनाको नियन्त्रणमा भएकी नेत्र आङ सान सू चीविरुद्ध दोस्रो आपराधिक अभियोग लगाइएको छ।
उनलाई मङ्गलवार भिडिओमार्फत् सैन्य सरकारले अदालतसमक्ष पेस गरेको थियो। यसअघि उनीलाई अवैधानिक रूपमा सञ्चार उपकरण वाकीटकी राखेको अभियोग लगाइएकोमा अहिले प्राकृतिक प्रकोपसम्बन्धी कानुन उल्लङ्घन गरेको अभियोग थपिएको छ।
तर उक्त अभियोग किन लगाइएको भन्ने स्पष्ट छैन।
माघ १९ मा सेनाले देशको शासनसत्ता हातमा लिएपछि अहिले म्यान्मारमा विरोधप्रदर्शन भइरहेको छ।
सेनाले नयाँ निर्वाचन गराउने र सत्ता हस्तान्तरण गर्ने बताएको भए पनि प्रदर्शनकारीहरूले सू चीसहित सबै नेताहरूलाई तत्काल मुक्त गर्नुपर्ने र भर्खरै सम्पन्न निर्वाचनको परिणाम स्वीकार्नुपर्ने बताउँदै आएका छन्।
सेनाले उक्त निर्वाचनमा धाँधली भएको दाबी गर्ने गरेको छ।
नमस्कार तथा शुभप्रभात।
आज फागुन ५ गते बुधवार । तपाईँलाई हाम्रो लाइभ पेजमा स्वागत छ।
अहिलेसम्मका प्रमुख अन्तर्राष्ट्रिय समाचारहरू -