लढाऊ विमानं न देण्याचा अर्थ तुम्हालाही वाटतं की आम्ही मरून जावं- झेलेन्स्की
फोटो स्रोत, Reuters
विनितस्या शहरातील विमानतळ पूर्णत:उद्धव्स्त झाल्यानंतर युक्रेनचे राष्ट्राध्यक्ष व्होल्दोमीर झेलेन्स्की यांनी व्हीडिओच्या माध्यमातून जगभरातल्या नेत्यांना भावनिक आवाहन केलं आहे.
"युक्रेनच्या नागरिकांना वाचवणं हे तुमच्या सगळ्यांचंही कर्तव्य आहे. तुम्ही हे केलं नाहीत आणि आमच्या सुरक्षेसाठी लढाऊ विमानं पुरवली नाहीत तर त्याचा एकच अर्थ होतो तो म्हणजे- आम्ही हळूहळू मरून जावं असं तुम्हाला वाटतं", असं झेलेन्स्की यांनी म्हटलं आहे.
युक्रेनवर नो फ्लाय झोन घोषित करण्याचा प्रस्ताव नेटो देश फेटाळून लावत आहेत. नो फ्लाय झोन घोषित झाला तर युक्रेनच्या भूमीवर उडणाऱ्या रशियाच्या कोणत्याही विमानाला नेटोला रोखावं लागेल. आवश्यकता पडल्यास त्यांना रशियाच्या विमानांचा पाडावही करावा लागेल. यामुळे नेटो आणि रशिया यांच्यात थेट संघर्ष सुरू होईल असं नेटो देशांना वाटतं.
