You’re viewing a text-only version of this website that uses less data. View the main version of the website including all images and videos.
युक्रेनची राजधानी कीव्हच्या रस्त्यांवर रशियन सैन्यासोबतची धुमश्चक्री सुरू झालेली आहे. काळ्या समुद्रातून कीव्हवर 2 क्षेपणास्त्रं डागण्यात आली.
कीव्ह शहरात रात्री झालेल्या संघर्षात 35 लोक जखमी झाले आहेत, अशी माहिती युक्रेनची राजधानी कीव्हचे महापौर विताली क्लित्श्को यांनी दिली. जखमींमध्ये दोन लहान मुलांचाही समावेश असल्याचं त्यांनी सांगितलं.
महापौर ज्या जखमींबाबत बोलतायेत, ते सर्व सर्वमान्य लोक आहेत का, याबाबत अद्याप माहिती समोर आली नाही.
कीव्ह शहरात मोठ्या प्रमाणात रशियन सैन्य हजर नाहीय. मात्र, तोडफोड करणारे रशियन गट सक्रीय झाले आहेत, असेही ते म्हणाले.
नमस्कार, तुम्ही आताच आमच्या लाईव्ह पेजवर आला असाल, तर सकाळपासून आतापर्यंत काय काय घडलं, हे आपण थोडक्यात जाणून घेऊ.
24 फेब्रुवारीच्या सकाळी रशियानं युक्रेनवर 'आक्रमण' केलं आणि आज तिसरा दिवस आहे. युक्रेन-रशिया संघर्षाच्या सर्व घडामोडी आम्ही या लाईव्ह अपडेट्सच्या माध्यमातून तुमच्यापर्यंत पोहोचवत आहोत.
युरोपियन कमिशननंने घातलेल्या निर्बंधांच्या पार्श्वभूमीवर रशियानं फ्रेंच गयानामधून होणारी आपली प्रक्षेपणं रद्द केली.
रशियन सोयूझ यानाचा वापर अनेक देश सॅटेलाईट प्रक्षेपणासाठी वापरतात. रशियन अंतराळ संस्था Roscosmos, ESA आणि NASA मधल्या सहकार्यावरही याचा परिणाम होऊ शकतो.
युक्रेनची राजधानी कीव्ह शहराच्या नैऋत्य भागामध्ये आज सकाळी दोन क्षेपणास्त्रं आदळल्याचं वृत्त रॉयटर्सने दिलं आहे. ही क्षेपणास्त्रं नेमक्या कोणत्या लक्ष्यावर रोखण्यात आली होती, हे अद्याप स्पष्ट नाही.
यापैकी एक क्षेपणास्त्र रहिवाशी इमारतीवर आदळल्याचं कीव्ह शहराचा कारभार पाहणाऱ्या यंत्रणेने म्हटलंय.
तर एक क्षेपणास्त्र कीव्हमधल्या झुलैनी विमानतळाच्या जवळ कोसळल्याचं रॉयटर्सने म्हटलंय.
सैन्याला शस्त्रं टाकण्यास सांगितलं नसून आपण शरणागती पत्करणार नसल्याचं युक्रेनचे राष्ट्राध्यक्ष झेलेन्स्की यांनी स्पष्ट केलंय.
युक्रेनच्या सैन्याला रशियन सैन्यासमोर हत्यारं टाकण्यास सांगण्यात आल्याची अफवा असल्याचं झेलेन्स्की यांनी म्हटलंय.
युक्रेनचे राष्ट्राध्यक्ष वोलोदिमीर झेलेन्स्की यांनी कीव्हच्या रस्त्यावर चालत स्वतः शूट केलेला एक व्हिडिओ सोशल मीडियावर पोस्ट केलाय. या व्हिडिओमधून त्यांनी शरणागतीच्या या अफवांचं खंडन केलंय.
"मी सैन्याला शस्त्रं टाकायला सांगितलं असून स्वतः दुसरीकडे जात असल्याचं खोटी माहिती ऑनलाईन पसरवण्यात येत आहे. मी इथेच आहे. आम्ही आमची शस्त्रं खाली टाकणार नाही. आम्ही आमच्या देशाचं रक्षण करू," कीव्हमधल्या गोरोदेत्स्की हाऊससमोर शूट केलेल्या व्हिडिओत झेलेन्स्की सांगताना दिसतात.
रशियाने हल्ला केल्यानंतर आतापर्यंत त्यांचे 3,500 सैनिक ठार केल्याचा दावा युक्रेनच्या लष्कराने केलाय.
युक्रेनच्या लष्कराच्या फेसबुक पोस्टनुसार हल्ला करणाऱ्या 3,500 पेक्षा जास्त सैनिकांना मारण्यात आलं असून सुमारे 200 पेक्षा अधिकांना बंदी बनवण्यात आलं आहे.
आतापर्यंत रशियाचे 14 विमान, 8 हेलिकॉप्टर्स आणि 102 रणगाडे निकामी करण्यात आल्याचं वा पाडण्यात आल्याचंही युक्रेनने म्हटलंय.
बीबीसीने या दाव्यांची स्वतंत्रपणे पडताळणी केलेली नाही.
या हल्ल्यात आपलं किती नुकसान झालं याची रशियाने अधिकृत माहिती जाहीर केलेली नाही.
युक्रेनवर काळ्या समुद्रातून क्षेपणास्त्रांद्वारे हल्ला केला जात असल्याचंही वृत्त आहे.
अनेक भागांमध्ये हवाई हल्लेदेखील झाल्याचं वृत्त असून त्यामुळं मोठ्या प्रमाणात हिंसाचार झाला असल्याची शक्यता व्यक्त करण्यात आली आहे.
युक्रेनचे राष्ट्राध्यक्ष वोलोदोमीर झेलेन्स्की यांनी अमेरिकेचा युक्रेन सोडून जाण्याचा प्रस्ताव फेटाळला असल्याचं अमेरिकेतील काही माध्यमांनी म्हटलं आहे.
"याठिकाणी युद्ध सुरू आहे. आम्हाला शस्त्रं हवी आहेत, निघून जाण्यासाठी मदत नव्हे," असं झेलेन्स्की यांनी म्हटल्याचं वृत्त एसोसिएटेड प्रेसनं दिलं आहे. त्यांनी एका वरिष्ठ गुप्तचर अधिकाऱ्याच्या हवाल्यानं हे वृत्त दिलं आहे.
वॉशिंग्टन पोस्टनंदेखील अमेरिका आणि युक्रेनच्या अधिकाऱ्यांच्या हवाल्यानं अमेरिका झेलेन्स्की यांना मदत करायला तयार होती, असं म्हटलं आहे.
झेलेन्स्की यांनी रशियाच्या आक्रमणाला ज्या पद्धतीनं उत्तर दिलं आहे, त्यासाठी त्यांचं सोशल मीडियावर कौतुक होत आहे. त्यांनी देशाला उद्देशून केलेल्या भाषणात रशियाला इशारा देताना, "तुम्ही हल्ला केली तरी आम्ही तुम्हाला पाठ दाखवणार नाही," असं म्हटलं होतं.
झेलेन्स्की युक्रेनमधून निघून गेल्याच्या बातम्या समोर आल्यानंतर, त्यांनी स्वतःचा आणि इतर अधिकाऱ्यांचा व्हीडिओ पोस्ट करून आपण कीव्हमध्येच असल्याचं स्पष्ट केलं होतं. आम्ही इथेच आहोत आणि इथेच राहणार असं ते म्हणाले होते.
कीव्हमध्ये जसजशी सकाळ होत आहे तशी संघर्षाची तीव्रता वाढत चालली आहे.
युक्रेनच्या लष्कराच्या फेसबुक पेजवरील एका पोस्टनुसार सध्या शहरातील वासिलकीव्ह भागामध्ये सध्या तीव्र संघर्ष पाहायला मिळत आहे.
कीव्हच्या रस्त्यांवर आता प्रत्यक्ष लढाईला सुरुवात झाली असल्याचं त्यात म्हटलं आहे. कीव्ह येथील प्रशासनानंही निवेदनामध्ये संघर्ष सुरू झाल्याच्या वृत्ताला दुजोरा दिला आहे. तसंच नागरिकांना घरात राहणयाचा सल्ला दिला आहे.
कीव्ह येथील काही पत्रकारांनीही सोशल मीडियावर रस्त्यांवर संघर्ष पेटल्याचं वृत्त दिलं आहे. अनेकांनी मोठे स्फोट आणि गोळीबाराचे आवाज शहरातून ऐकू आल्याचं म्हटलं आहे.
दरम्यान, काल दिवसभरात शत्रूच्या सैन्याची मोठ्या प्रमाणावर हानी केल्याचं युक्रेनच्या लष्करानं म्हटलं आहे. तसंच रशियाच्या सैन्याला युक्रेनमधील कोणतंही शहर ताब्यात घेण्यापासून रोखलं असल्याचंही म्हटलं आहे.
युक्रेनची वृत्तसंस्था इंटरफॅक्सनं कीव्ह प्रशासनाच्या हवाल्यानं शहरात संघर्ष पेटला असल्याचं वृत्त दिलं आहे.
"आमच्या मुख्य शहरातील गल्ल्यांमध्ये सध्या युद्ध पेटलं आहे," असं युक्रेनची राजधानी कीव्ह येथील प्रशासनानं म्हटलं आहे.
नागरिकांनी घराच्या आतच राहावं आणि खिडक्या, बाल्कनीमध्ये येऊ नये, असा इशारा प्रशासनानं नागरिकांना दिला आहे.
संयुक्त राष्ट्रांच्या सुरक्षा परिषदेत युक्रेनवर रशियानं केलेल्या हल्ल्याचा निषेध करणारा प्रस्ताप पुढं जाऊ शकला नाही. रशियानं त्यांच्या वीटो पॉवरचा वापर करत तो थांबवला आहे.
त्यानंतर काही वेळातच संयुक्त राष्ट्राचे सरचिटणीस अँटोनियो गुटेरेस यांनी युक्रेनमध्ये हल्ला करत असलेल्या रशियाच्या सैनिकांना त्यांच्या बराकमध्ये परतण्याची विनंती केली आहे.
''शांततेसाठी आणखी एक संधी देणं गरजेचं आहे,'' असं गुटेरेस म्हणाले.
''आपण हार मानता कामा नये. शांतता स्थापित करण्यासाठी आणकी एक संधी द्यायला हवी. सैनिकांनी त्यांच्या बराकमध्ये परतायला हवं. तसंच नेत्यांनीही शांतता कायम राखण्यासाठी चर्चेच्या मार्गावर पुढं जाण्याची गरज आहे," असं ते पत्रकारांशी बोलाताना म्हणाले.
संयुक्त राष्ट्रांच्या सरचिटणीसांनी एक ट्विट केलं. संयुक्त राष्ट्रांच्या चार्टरला यापूर्वीही आव्हान देण्यात आलेलं आहे. पण ही संघटना कायम शांतता, सुरक्षा, विकास, न्याय, आंतरराष्ट्रीय कायदे आणि मानवाधिकार यांच्या बाजूनं उभी राहिली आहे, असं त्यात म्हटलं होतं.
''ही मूल्यं युक्रेन आणि संपूर्ण मानवतेसाठी दृढ राहावीत, यासाठी आंतरराष्ट्रीय समुदायाला शक्य ते सर्व प्रयत्न करायला हवे,'' असं गुटेरेस यांनी म्हटलं आहे.
रशियाच्या सैन्यानं सध्या युक्रेनच्या सीमेमध्ये प्रवेश केला असून, ते राजधानी कीव्हपर्यंत पोहोचलं आहे.
युक्रेनचे राष्ट्राध्यक्ष वोलोदिमीर झेलेन्स्की यांनी आगामी काही तासांत रशिया कीव्हवर मोठ्या प्रमाणात हल्ला करण्याची शक्यता व्यक्त केली आहे. लोकांनी या आव्हानाचा धैर्यानं सामना करण्याची विनंती त्यांनी केली आहे.
रशियानं युक्रेनवर केलेल्या हल्ल्याच्या दुसऱ्या रात्री अनेक प्रकारच्या घडामोडी घडल्या आहेत. त्यातील काही प्रमुख घडामोडींवर नजर टाकूयात...
नमस्कार! बीबीसी मराठीच्या रशिया - युक्रेन संघर्षाच्या लाईव्ह अपडेट्सच्या पानावर तुमचं स्वागत आहे.