बायडन यांना पेन्सिल्वेनियातही आघाडी

लाईव्ह कव्हरेज

1. 6 नोव्हेंबर 2020जॉर्जियामध्ये मतांची फेरमोजणी होणार

   जॉर्जिया राज्याचे गृहमंत्री ब्रॅड रॅफन्सबर्गर यांनी राज्यात राष्ट्राध्यक्षपदाच्या निवडणुकीत पुन्हा मतमोजणी होणार असल्याचं जाहीर केलं आहे.

   त्यांनी दिलेल्या माहितीनुसार 4,169 मतं मोजणं अजून बाकी आहे. तसंच सैनिकांनी दिलेली 8,000 ॲब्सेंटी मतं आज दिवसअखेर पर्यंत पोहोचली तरंच मोजली जातील. “पण सध्याची स्थिती पाहता, दोन्ही उमेदवारांमध्ये अगदी थोडंच अंतर आहे.

   त्यामुळे जॉर्जियातल्या नियमांनुसार इथे फेरमोजणी होईल. जॉर्जियाच्या निकालाचा देशावर परिणाम होऊ शकतो. ” रॅफन्सबर्गर यांचे सहाय्यक गॅब्रिएल स्टर्लिंग यांनी स्पष्ट केलं आहे, की निवडणुकीत कुठलाही घोटाळा दिसून आलेला नाही आणि केवळ मतांचा फरक अगदी कमी असल्यानं पुन्हा मतमोजणी केली जाईल.

   पेन्सिल्वेनियात बायडन यांची आघाडी आणखी वाढताना दिसते आहे. तिथले ट्रंप यांच्या रिपब्लिकन पक्षाचेच सिनमेटर पॅट टूमी यांनी निवडणुकीत मोठा घोटाळा झाल्याचा आरोप फेटाळला असून ट्रंप यांच्यावरच टीका केली आहे.

2. 6 नोव्हेंबर 2020‘ही निवडणूक अजून संपलेली नाही’

   ट्रंप यांच्या टीमचा दावा डोनाल्ड ट्रंप यांच्या टीमनं नुकतंच एक पत्रक जाहीर केलं आहे. “ही निवडणूक अजून संपलेली नाही” असं ट्रंप यांचे वकील मॅट मॉर्गन यांनी म्हटलं आहे.

   पेन्सिल्वेनियामध्ये बायडन यांना आघाडी मिळत असून, ते हे राज्य जिंकले, तर राष्ट्राध्यक्षपदही जिंकतील. त्या पार्श्वभूमीवर हे पत्रक जाहीर करण्यात आलं आहे. "जो बायडन विजयी ठरू शकतील असं चुकीचं भाकीत ज्या चार राज्यांतील निकालाच्या आधारवर केलं जात आहे, तिथला निकाल अजून बाकी आहे.” असं या पत्रकात म्हटलं आहे.

   कुठलाही पुरावा न देता त्यांनी दावा केला आहे की जॉर्जियातली मतं चुकीच्या पद्धतीनं ‘पिकवण्यात’ आली होती आणि पेन्सिल्वेनियातमध्ये निरीक्षकांना मतमोजणीच्या ठिकाणी योग्य पद्धतीनं पाहणी करण्याची संधी दिली नाही. पण कालच तिथे एका न्यायाधीशांनी निरीक्षकांना प्रवेश दिला होता.

   अनेक वृत्तवाहिन्या अरायझोनामध्ये बायडन जिंकण्यची शक्यता असल्याचं सांगत आहेत, ते मॉर्गन यांना मान्य नाही. त्यांनी नेव्हाडामध्ये हजारो मतदारांनी चुकीच्या पद्धतीनं मत दिल्याचाही दावा केला आहे. “बायडन यांचा व्हाईट हाऊससाठीचा बनावट दावा या चारही राज्यांवर अवलंबून आहे. पण निवडणूक संपेल तेव्हा राष्ट्राध्यक्ष ट्रंप पुन्हा निवडून आलेले असतील.” अमेरिकेत निवडणुकीत कुठलाही मोठा घोटाळा झाल्याचा कुठलाही पुरावा नाही आणि ट्रंप यांच्या समर्थकांनीही आपल्या या दाव्यांविषयी कोणताही पुरावा सादर केलेला नाही.

3. 6 नोव्हेंबर 2020कोव्हिडग्रस्त निवडणूक अधिकाऱ्याचं निधन

   मिसूरी राज्यातल्या सेंट लुईसच्या उपनगरातील एका मतदानकेंद्रावर काम केलेला एक निवडणूक अधिकारी कोव्हिडनं ग्रस्त असल्याचं आणि त्याचं निधन झाल्याचं समोर आलं आहे. त्यामुळे त्याच्या संपर्कात आलेल्या जवळपास 2,000 मतदरांना विषाणूची लागण झाली असू शकते.

   सरकारी अधिकाऱ्यांनी संबंधित व्यक्तीचं नाव न घेता याविषयीची माहिती दिली आहे. चार दिवसांपूर्वी या व्यक्तीला कोव्हिड झाल्याचं निदान झालं होतं आणि रुग्णाला चौदा दिवस क्वारंटाईनमध्ये राहण्याचा सल्लाही देण्यात आला होता.

   या रुग्णाच्या मृत्यूचं नेमकं कारण स्पष्ट नाही. मिसूरीमध्ये आतापर्यंत 2 लाखांहून अधिक जणांना कोरोना विषाणूचा संसर्ग झाला 3,117 जणांचा मृत्यू झाला आहे. तर देशभरात 2 लाख 34 हजार 944 जणांचा मृत्यू झाला आहे.

4. 6 नोव्हेंबर 2020जो बायडन बहुमताच्या उंबरठ्यावर

5. 6 नोव्हेंबर 2020बायडन यांना पेन्सिल्वेनियातही आघाडी

   पेन्सिल्वेनियातील अधिकाऱ्यांनी दिलेल्या माहितीनुसार, राज्यातली 95 टक्के मतमोजणी झाली असून, बायडन यांना ट्रंप यांच्यावर 5,587 मतं मिळाली आहेत.

   पेन्सिल्वेनियात विजय मिळाला, तर ट्रंप यांना बहुमतासाठी आवश्यक 270 चा आकडा सहज पार करता येणार आहे. बीबीसी न्यूजचे न्यूयॉर्कमधले प्रतिनिधी निक ब्रायंट यांनी ट्वीट केलं आहे, की बायडन जॉर्जिया, नेव्हाडा आणि अरायझोनामध्येही आघाडीवर आहेत.

6. 6 नोव्हेंबर 2020चिल डोनाल्ड, चिल' !

   अमेरिकेचे राष्ट्राध्यक्ष कोण होणार या प्रश्नाचं उत्तर अजून मिळालेलं नाही. त्यामुळे दोन्ही उमेदवारांसह अमेरिकेतले नागरीकही बेचैन असतील. जो बायडन आणि डोनाल्ड ट्रंप या दोघंही त्यावर आपली बाजू सातत्यानं मांडत आहेत.

   पण ट्रंप ट्विटरवर आपल्याच शैलीत ट्वीट करत आहेत. त्यातले काही ट्वीट्स चुकीचे किंवा दिशाभूल करणारे असल्याचं कारण देत ट्विटरनं ते झाकून ठेवले आहेत. ट्रंप यांचं ‘स्टॉप द काऊंट’’ म्हणजे मतमोजणी थांबवा असं म्हणणारं एक ट्वीट रिट्वीट करत पर्यावरणवादी ग्रेटा थनबर्गनं लिहिलं आहे, “काय फालतूगिरी आहे? डोनाल्डनं पहिले आपल्या रागावर नियंत्रण मिळवणं शिकावं आणि मग कुठल्या तरी मित्रासोबत जुन्या काळातल्यासारखं एखादा चित्रपट पाहायला जावं. चिल डोनाल्ड चिल.”

   ग्रेटा थनबर्ग आणि डोनाल्ड ट्रंप यांच्यात यांच्यात आधीही असे खटके उडाले आहेत. पण जया भाषेत ग्रेटानं ट्रंप यांना उत्तर दिलं आहे, ते खरंतर ट्रंप यांचेच शब्द आहेत. . 2019 साली टाईम मॅगझिननं पर्सन ऑफ द ईयर म्हणून ग्रेटाची निवड केली होती, तेव्हा ट्रंप यांनी ट्वीट केलं होतं, “काय फालतूगिरी आहे? ग्रेटान पहिले आपल्या रागावर नियंत्रण मिळवणं शिकावं आणि मग कुठल्या तरी मित्रासोबत जुन्या काळातल्यासारखं एखादा जुना चित्रपट पाहायला जावं. चिल डोनाल्ड चिल.'

7. 6 नोव्हेंबर 2020जॉर्जिया आणि अरायझोनामध्ये यामुळे ट्रम्प पिछाडीवर?

   अमेरिकन पत्रकार आणि सोशल मीडियावरील काही जणांच्या मते जॉर्जिया आणि अरायझोना या राज्यांच्या नायकांवर टीका करणं ट्रंप यांच्या विरोधात गेलं असावं.

   बायडन सध्या दोन्ही राज्यांमध्ये आघाडीवर आहेत. अरायझोनातले रिपब्लिकन पक्षाचे दिवंगत सिनेटर जॉन मॅककेन यांच्याविषयी ट्रम्प यांनी केलेलं विधान वादग्रस्त ठरलं होतं. व्हिएतनाममधील युद्धात मॅककेन युद्धबंदी होते. त्यामुळे त्यांना अमेरिकेचा युद्ध नायक मानले जावे का, असा सवाल ट्रंप यांनी केला होता, जे अनेकांना पटलं नाही.

   दरम्यान, जॅार्जियात ज्या क्लेचन काऊंटीमध्ये ट्रंप यांची पिछेहाट होते आहेत, ती काऊंटी दिवंगत मानवी हक्क नेता आणि कॉंग्रेसमन जॉन लुईस यांची आहे. लुईस यांनी कृष्णवर्णियांना समान हक्क मिळावेत यासाठी अमेरिकेत सुरू झालेल्या चळवळीत सहभाग घेतला होता. ट्रंप राष्ट्राध्यक्षपदी निवडून आले त्यात रशियाचा हात असावा असे आरोप झाल्यावर लुईस यांनी ट्रंप यांच्यावर प्रश्नचिन्ह उभं केलं होतं तेव्हा ट्रंप यांनी “लुईस फक्त बोलतात. त्यांनी आपल्या मतदारसंघाकडेच लक्ष द्यावं असं म्हणत नाराजी व्यक्त केली होती.

8. 6 नोव्हेंबर 2020अमेरिकन राष्ट्राध्यक्षपदाची निवडणूक ‘टाय’ झाली तर?

   अमेरिकेत राष्ट्राध्यक्षपदाच्या निवडणुकीत 538 इलेक्टोरल मतांपैकी दोन्ही उमेदवारांना प्रत्येकी 269 मतं अंधुकशी का असेना, पण शक्यता आहे. असं होणं कठीण आहे. पण ट्रंप यांचा जॉर्जियामध्ये पराभव झाला आणि त्यांनी अरायझोना, नॉर्थ कॅरोलायना, नेव्हाडा आणि पेन्सिल्वेनिया ही चारही राज्यं जिंकली, तर असं घडू शकतं.

   पण निवडणूक टाय झाली, तर नियम काय सांगतात? कुठल्याही एका उमेदवाराला बहुमत मिळालं नाही, तर अमेरिकन संसदेचं कनिष्ठ सभागृह म्हणजे काँग्रेस त्याविषयी निर्णय देतं. काँग्रेसमध्ये प्रत्येक राज्याच्या प्रतिनिधिंना मिळून एक मत असतं आणि पन्नासपैकी किमान 26 मतं मिळालेला उमेदवार विजयी ठरतो. तर उपराष्ट्राध्यक्षाची निवड सिनेट हे वरिष्ट सभागृह करतं. पण यंदा तिथेही मेख आहे.

   राष्ट्राध्यक्षपदासोबत काँग्रेसच्या जागांसाठीही निवडणुका होतात. पण यंदा काँग्रेसच्या निवडणुकीतही काही ठिकाणी निकालावरून वाद सुरू आहेत. समजा, काँग्रेसचे सदस्य एकत्र जमले पण एका उमेदवाराला बहुमत मिळालं नाही, तर? अमेरिकेच्या राज्यघटनुसार विद्यमान राष्ट्राध्यक्षांचा कार्यकाल संपेपर्यंत म्हणजे येत्या 20 जानेवारीपर्यंत काँग्रेसला राष्ट्राध्यक्षांची निवड करणं बंधनकारक आहे. पण तसं झालं नाही, तर काँग्रेसचे सभागृह प्रमुख म्हणजे स्पीकरकडे राष्ट्राध्यक्षपद जाईल. सध्या डेमोक्रॅटिक पक्षाच्या नॅन्सी पेलोसी या पदावर आहेत.

9. 6 नोव्हेंबर 2020पेन्सिल्वेनियावर बारीक लक्ष

   जो बायडन यांनी जॉर्जियामध्ये आघाडी घेतली असली, तरी आणखी एका राज्यातली लढत अटीतटीची होते आहे. ते म्हणजे पेन्सिल्वेनिया.

   डोनाल्ड ट्रंप पेन्सिल्वेनियामध्ये 20,000 मतांनी आघाडीवर आहेत. मात्र टपालानं आलेली मतं जसजशी मोजली जात आहेत, तसतशी ट्रंप यांची आघाडी कमी होत आहे, विशेषतः फिलाडेल्फिया शहरात. शहराचे आयुक्त अल श्मिट यांनी CNN ला सांगितलं आहे, की पुढच्या एक दोन तासांत इथून अपडेट मिळू शकतो.

   “फिलाडेल्फियात काल दोन तास मतमोजणी थांबवण्यात आली होती, पण प्रत्येक मत मोजणं गरजेचं आहे. दोन्ही पक्षांचे निरीक्षक इथे उपस्थित असून मतमोजणीवर बारीक लक्ष ठेवून आहेत,” असं ते म्हणाले ट्रंप यांनी पेन्सिल्वेनियातली मतमोजणी थांबवण्यासाठी कोर्टात धाव घेतली होती. पण राज्याच्या सुप्रीम कोर्टानं त्यांची याचिका फेटाळली

10. 6 नोव्हेंबर 2020ट्रंप यांना कोणती राज्यं जिंकावी लागतील?

    डेमोक्रॅटिक पक्षाच्या जो बायडन यांच्याकडे सध्या 253 इलेक्टोरल मतं असून, रिपब्लिकन पक्षाच्या ट्रंप यांच्या खात्यात 214 इलेक्टोरल मतं आहेत. राष्ट्राध्यक्षपदासाठी 270 इलेक्टोरल मतं जिंकणं आवश्यक आहे.

    बायडन यांनी जॉर्जियात विजय मिळवला आणि नेव्हाडा, अरायझोना आणि नॉर्थ कॅरोलायनामधलं एखादं राज्य जिंकलं, तर त्यांचा विजय निश्चित होईल. बायडन यांनी पेन्सिल्वेनियाही जिंकलं, तर तिथल्या 20 इलेक्टोरल मतांमुळे त्यांचा विजय आणखी भक्कम ठरू शकतो. दुसरीकडे ट्रंप यांना पेन्सिल्वेनियासोबतच जॉर्जिया, नॉर्थ कॅरोलायना, नेव्हाडा आणि अरायझोनापैकी किमान तीन ठिकाणी विजय मिळवणं आवश्यक आहे.

11. 6 नोव्हेंबर 2020बायडन यांची आघाडी थोडीशी वाढली

    जॉर्जियामध्ये उर्वरीत 1 टक्का मतांची मोजणी सुरू असून, बीबीसीच्या रिझल्ट सिस्टिमनुसार जो बायडन यांची आघाडी अंशतः वाढली आहे. बायडन यांच्याकडे आता 1,096 मतांची आघाडी आहे.

12. 6 नोव्हेंबर 2020‘निवडणुकीत घोटाळ्याचा पुरावा नाही’ – आंतरराष्ट्रीय निरीक्षक

    डोनाल्ड ट्रंप यांनी राष्ट्राध्यक्षपदाच्या निवडणुकीत घोटाळा झाल्याचा आणि ‘बेकायदेशीर मतं’ मोजली जात असल्याचा आरोप केला होता. टपालानं आलेली मतं मतदानाच्या दिवसानंतरही मोजण्याची अमेरिकेत पद्धत आहे, पण त्यालाच ट्रंप यांनी आक्षेप घेतला आहे

    . पण तसा कुठलाही पुरावा दिसून आलेला नाही, असं आंतरराष्ट्रीय निरीक्षकांनी बीबीसी रेडियो फाईव्हला दिलेल्या मुलाखतीत म्हटलं आहे. ऑर्गनायझेशन फॉर सिक्युरिटी अँड को-ऑपरेशन इन युरोप ही संघटना जगभरात निवडणुकांचं निरीक्षण आणि अभ्यास करत असते. मुक्त आणि स्वतंत्रपणे निवडणुका होत आहेत की नाहीत यावर या संस्थेची नजर असते.

13. 6 नोव्हेंबर 2020सर्वांचं लक्ष या राज्यांकडेच.....

14. 6 नोव्हेंबर 2020जॉर्जियातली मतं का महत्त्वाची?

    जॉर्जियातले मतांच्या फेरमोजणीचे नियमही निकालात महत्त्वाची भूमिका बजावू शकतात. दोघांपैकी कुणीही पराभूत झालं, आणि मतांचा 0.5 टक्क्यांपेक्षा कमी असेल, तर तो उमेदवार फेरमोजणीची विनंती करू शकतो. मात्र अंतिम निकाल लागल्यावर दोनच दिवसांत अशी मागणी करता येऊ शकते.

    सध्या 99 टक्के मतं मोजण्यात आली असून, जो बायडन यांच्या खात्यात 49.39% तर ट्रंप यांच्या खात्यात 49.37% मतं गेलेली आहेत. जॉर्जियामध्ये डेमोक्रॅटिक पक्षाच्या बायडन यांचा विजय झाला तर ती एक मोठी उलथापालथ ठरेल. 1964 सालापासून केवळ चारवेळाच जॉर्जियानं डेमोक्रॅटिक पक्षाच्या बाजूनं कल दिला आहे. 1992 साली बिल क्लिंटन यांच्यानंतर इथे रिपब्लिकन वर्चस्व पाहायला मिळालं.

15. 6 नोव्हेंबर 2020जॉर्जियात बायडन आघाडीवर

    बीबीसीचे रिझल्ट मॉनिटर्स आणि CBS च्या ताज्या आकडेवारीनुसार जो बायडन यांना जॉर्जियामध्ये 900 मतांची आघाडी मिळाली असून, तिथे आता केवळ काही हजार मतंच मोजण्याची बाकी आहेत.

    जॉर्जियात 16 इलेक्टोरल मतं असून, हे राज्य जिंकलं तर बायडन यांच्या खात्यात 269 इलेक्टोरल मतं जमा होतील. म्हणजेच राष्ट्राध्यक्षपद मिळवण्यासाठी त्यांना आणखी एकच मत आवश्यक असेल, आणि त्यांच्या विजयाच्या शक्यता वाढतील.

    बायडन यांनी जॉर्जियात विजय मिळवला तर ट्रंप यांना थेट विजय मिळवणं तर कठीण बनेलच, पण ही निवडणूक टाय होण्याचीही शक्यता निर्माण होईल. ट्रंप यांना राहिलेल्या सर्व राज्यांत सध्या जिथे आघाडी आहे, तिथे विजय मिळवला, तर त्यांच्याही खात्यात 269 इलेक्टोरल मतं जमा होतील.

16. 6 नोव्हेंबर 2020ट्रंप यांच्या मुलाची रिपब्लिकन पक्षावरच टीका

    अमेरिकेचे राष्ट्राध्यक्ष आणि रिपब्लिकन पक्षाचे उमेदवार डोनाल्ड ट्रंप यांच्या मुलाने त्यांच्या स्वतःच्याच पक्षावर टीका केली आहे.

    रिपब्लिकन पक्षाने ट्रंप यांना आवश्यक तो पाठिंबा दिला नाही, असं ट्रंप यांचा मुलगा डॉन ज्यूनियर यांनी म्हटलं आहे. डोनाल्ड ट्रंप हे निवडणुकीत मागे पडल्याचं खापर त्यांच्या मुलांनी रिपब्लिकन कार्यकर्ते आणि समर्थकांवरच फोडलं आहे. याबाबत त्यांनी एक ट्वीट करून आपल्या भावनांना वाट मोकळी करून दिली. रिपब्लिकन पक्ष डोनाल्ड ट्रंप यांच्या मागे मजबूतपणे उभा राहिला नाही.

    आमचे मतदार तुम्हाला माफ करणार नाही, अशा शब्दात त्यांनी स्वतःच्या पक्षावरच टीका केली. रिपब्लिकन पक्षाचे ज्येष्ठ नेते मिट रोमनी आणि लॅरी होगन यांनी ट्रंप यांचं प्रचारतंत्रामुळे लोकशाही कमकुवत होत असल्याचं म्हटलं होतं. या पार्श्वभूमीवर ट्रंप यांच्या मुलांनी त्यांच्यावर निशाणा साधला.

17. 6 नोव्हेंबर 2020अमेरिका निवडणूक निकाल 2020 : विजयी उमेदवार कोण, हे कधी कळेल?

18. 6 नोव्हेंबर 2020अमेरिका निवडणूक निकाल : पोस्टल मतदानामध्ये घोटाळा होऊ शकतो का?

19. 6 नोव्हेंबर 2020अमेरिकेतल्या सिक्रेट सर्व्हिसने वाढवली बायडन यांची सुरक्षा

    बायडन हे कदाचित लवकरच या निवडणुकीत आपला विजय झाल्याचा दावा करू शकतात हे लक्षात घेत अमेरिकेतल्या सिक्रेट सर्व्हिसने त्यांची सुरक्षा वाढवल्याचं वृत्त वॉशिंग्टन पोस्ट वर्तमानपत्राने दिलंय. शुक्रवारी बायडन एक महत्त्वाचं भाषण देण्याची शक्यता असल्याचं बायडन यांच्या कॅम्पेनने सिक्रेट सर्व्हिसला कळवलं होतं. त्यानंतर बायडन यांच्या सुरक्षेसाठी अधिकचे एजंट्स तैनात करण्यात आले असल्याचं या वृत्तात म्हटलंय. पण सिक्रेट सर्व्हिसच्या प्रवक्ता वा बायडन यांच्या सहकाऱ्यांनी यावर कोणतीही प्रतिक्रिया द्यायला नकार दिला. बायडन आणि त्यांचा प्रचार हाताळणारी टीम ही सध्या विल्मिंगटन, डेलावेअर मधल्या कन्व्हेंशन सेंटरमध्ये तळ ठोकून आहे.

20. 6 नोव्हेंबर 2020अमेरिकेतल्या 3 मोठ्या चॅनल्सनी मध्येच थांबवलं ट्रंप यांच्या भाषणाचं प्रक्षेपण

    अमेरिकेचे सध्याचे राष्ट्राध्यक्ष आणि पुन्हा या पदासाठीच्या शर्यतीत असणारे रिपब्लिकन पक्षाचे उमेदवार डोनाल्ड ट्रंप यांनी पुन्हा एकदा समर्थकांसमोर येत भाषण दिलं. मतदानामध्ये घोटाळा झाला असून वैध मतंच मोजली तर आपणच जिंकलो असल्याचा दावा त्यांनी यावेळीही बोलताना केला, पण त्यासाठीचा कोणताही पुरावा त्यांनी दिला नाही. राष्ट्राध्यक्ष ट्रंप यांच्या या भाषणाचं प्रसारण अमेरिकेतल्या 3 महत्त्वाच्या न्यूज चॅनल्सनी अर्ध्यातच बंद केलं. ABC, CBS आणि NBC या न्यूज चॅनल्सनी ही प्रेस कॉन्फरन्स दाखवणं अर्ध्यातच थांबवलं आणि राष्ट्राध्यक्षं खोटी व्यक्तव्य करत असल्याचं आपल्या प्रेक्षकांना सांगितलं. पोस्टाद्वारे मतदान न करता स्वतः मतदान केंद्रांवर जाऊन मतदान करावं असं आवाहन ट्रंप यांनी त्यांच्या समर्थकांना केलं होतं. तर कोरोनाची जागतिक साथ लक्षात घेता, जास्तीत जास्त लोकांना पोस्टाने मतदान करावं असं आवाहन जो बायडन यांनी केलं होतं.