"विमानात सोशल डिस्टन्सिंग शक्य नाही"- हरदीप सिंह पुरी

लाईव्ह कव्हरेज

1. 21 मे 2020जगभरातल्या रुग्णसंख्येत एका दिवसात उच्चांकी वाढ - WHO

   कोरोना व्हायरसच्या साथीपासून जगाची इतक्यात सुटका होणार नसल्याचं वर्ल्ड हेल्थ ऑर्गनायझेशनने म्हटलंय. गेल्या 24 तासांमध्ये जगभरात 1,06,000 नवीन रुग्णांचं निदान झालेलं आहे. आतापर्यंतची एका दिवसातली ही सर्वात मोठी रुग्णसंख्याआहे.

   संपूर्ण जगातली कोव्हिड-19ची रुग्णसंख्या आता 50 लाखांच्या उंबरठ्यावर आहे.

   एकीकडे श्रीमंत देश लॉकडाऊनमधून बाहेर पडण्याच्या प्रयत्नांत आहेत तर दुसरीकडे गरीब देशांमध्ये हा व्हायरस झपाट्याने पसरत असल्याचं वर्ल्ड हेल्थ ऑर्गनायझेशनचे संचालक तेद्रॉस अॅडहॉनम गिब्रिएसुस यांनी जिनिव्हामध्ये म्हटलंय.

   युरोपातल्या देशांनी संसर्गाच्या दुसऱ्या लाटेसाठी सज्ज राहावं, असा इशारा युरोपियन सेंटर फॉर डिसीज प्रिव्हेन्शन अँड कन्ट्रोलच्या संचालक डॉ. अँड्रिया अमॉन यांनी दिलाय.

2. 21 मे 2020रेल्वेच्या 200 गाड्यांसाठी आजपासून तिकिट बुकिंग

   रेल्वेने 1 जूनपासून सुरू होणाऱ्या 200 ट्रेन्सची यादी जाहीर केली आहे. या ट्रेनसाठी 21 मे म्हणजेच आजपासून बुकिंग सुरू होत आहे. सकाळी दहा वाजल्यापासून हे बुकिंग सुरू होईल.

   स्थलांतरित मजुरांसाठी सुरू केलेल्या श्रमिक स्पेशल गाड्यांहून या ट्रेन वेगळ्या असतील.

   या गाड्यांमध्ये एसी आणि नॉन एसी असे दोन क्लास तसेच जनरल कोचही असतील. अर्थात, सर्वच कोचसाठी आरक्षण करावं लागेल.

   ट्रेनच्या तिकिटांची बुकिंग ही केवळ IRCRC ची वेबसाइट किंवा मोबाईल अपवरूनच होईल. 30 दिवस आधी या गाड्यांसाठीचं आरक्षण करता येईल.

   प्रवासाला सुरूवात करण्यापूर्वी सर्व प्रवाशांचं स्क्रीनिंग केलं जाईल आणि कोरोनाची लक्षण नसलेल्या व्यक्तिंनाच प्रवासाची परवानगी देण्यात येईल, असं रेल्वेकडून स्पष्ट करण्यात आलं आहे.

   या गाड्यांव्यतिरिक्त अन्य मेल/एक्सप्रेस, पॅसेंजर आणि सबअर्बन रेल्वे सेवा अजूनतरी सुरू होणार नाहीत.

3. 21 मे 2020गेल्या 24 तासातले कोरोनासंबंधीचे महत्त्वाचे अपडेट्स

   • भारतात गेल्या 24 तासात 5,611 नवीन रुग्ण आढळले आहेत. ही एका दिवसात आजवर झालेली सर्वाधिक वाढ आहे. भारतात आता कोरोनाचे 1 लाख 6 हजार 750 रुग्ण
   • बुधवारी राज्यात 2250 नवे कोरोनाग्रस्त रुग्ण, एकूण संख्या 39 हजार 297 वर
   • 25 मेपासून देशांतर्गत विमानसेवा पुन्हा सुरू-गृहमंत्रालय़
   • नागरी सेवा पूर्व परीक्षेची तारीख 5 जून ला जाहीर होणार - यूपीएससी
   • कोव्हिड-19 मधून बरे होण्याचं प्रमाण 39.62 टक्क्यांवर
   • कोरोना व्हायरस स्वतःला बदलतोय, चीनमधील तज्ज्ञांना शंका

4. 21 मे 2020बीबीसी मराठीच्या लाइव्ह पेजवर स्वागत

   गुड मॉर्निंग. तुम्हाला जगभरातून कोरोना व्हायरससंबंधीचे सर्व अपडेट्स देण्यासाठी आम्ही इथे हजर आहोत.

   त्यामुळे हे पान तुम्ही नक्की शेअर करा आणि दिवसभरातल्या ताज्या घडामोडींसाठी यावर लक्ष ठेवा.

   कालदिवसभरात काय झालं, हेपाहण्यासाठी या पानावर अवश्य भेट द्या.

   धन्यवाद.