You’re viewing a text-only version of this website that uses less data. View the main version of the website including all images and videos.
कोरोना व्हायरस विषयीचे महाराष्ट्र, देश आणि जगातले सर्व ताजे अपडेट्स
नागपूर महापालिकेनं भिकारी आणि बेघर व्यक्तींसाठी नवीन प्लान तयार केला आहे. त्याअंतर्गत या व्यक्तींना अन्नासोबतच कौशल्य प्रशिक्षणही दिलं जात आहे. याद्वारे नागपूरमधील दारिद्र्य निर्मूलन करणं हा महापालिकेचा उद्देश असल्याचं नागपूर महापालिकेचे आयुक्त तुकाराम मुंडेंनी म्हटलं आहे.
मॉर्निंग वॉकसाठी बाहेर पडून लॉकडाऊनचे नियम मोडणाऱ्या पुण्यातील नागरिकांना पोलिसांनी योगा करायला लावला.पुण्यातील बिबवेवाडी परिसरात गुरुवारी सकाळी हा प्रकार समोर आला.
अमेरिकेतील कोरोना व्हायरसच्या रुग्णांच्या संख्येचा वाढता आलेख आता खालावत चालला असून लवकर देशातील काही राज्यांमधील व्यवहार सुरू करण्यात येतील, असं अमेरिकेचे राष्ट्राध्यक्ष डोनाल्ड ट्रंप यांनी म्हटलं आहे.
यासंबंधीची नवीन मार्गदर्शक तत्व 16 एप्रिलला जाहीर करण्यात येईल, असंही त्यांनी म्हटलंय.
अमेरिकेत जवळपास 6 लाख 40 हजार व्यक्तींना कोरोनाची लागण झाली असून आतापर्यंत 30 हजार 800 जणांचा मृत्यू झाला आहे.
उत्तर प्रदेशच्या मुराबादमध्ये पोलीस आणि आरोग्य कर्मचाऱ्यांवर हल्ला केल्याचा आरोप असल्यामुळे 17 जणांना अटक करण्यात आली आहे.
या 17 जणांमध्ये 10 पुरुष, तर 7 महिला आहे.
पोलीस आणि आरोग्य कर्मचाऱ्यांची एक टीम कोरोनाची लागण झालेल्या व्यक्तीच्या कुटुंबाला क्वारंटाईन करण्यासाठी गेली असता त्यांच्यावर हल्ला करण्यात आला.
या हल्ल्यात डॉक्टर, पोलीस आणि रुग्णवाहिकेच्या चालकाला जखम झाली आहे.
भारतातील कोरोनाग्रस्तांची संख्या 12 हजार 380 वर पोहोचली आहे. कोरोनामुळे आतापर्यंत देशात 414 जणांचा मृत्यू झाला आहे.
देशातील कोरोनाग्रस्तांचा आकडा 12 हजारांहून अधिक आहे, पण दिलासादायक बाब म्हणजे कोरोनातून बऱ्या झालेल्या रुग्णांची संख्या 1489 इतकी आहे, असं आरोग्य आणि कुटुंब कल्याण मंत्रालयानं म्हटलं आहे.
देशात सर्वाधिक कोरोना रुग्णांची संख्या महाराष्ट्रात आहे. महाराष्ट्रात आतापर्यंत कोरोनाचे 2916 रुग्ण आढळले असून 187 जणांचा मृत्यू झाला आहे.
महाराष्ट्राखालोखाल दिल्लीत 1,578 कोरोनाचे रुग्ण आढळले असून 33 जणांचा मृत्यू झालाय.
रुग्णांना त्यांच्या धर्मानुसार वेगवेगळ्या वॉर्डमध्ये ठेवण्यात येत असल्याचा आरोप अहमदाबादमधील सिव्हिल हॉस्पिटलवर करण्यात आला आहे.
12 एप्रिलपर्यंत सगळ्या रुग्णांना एकाच वॉर्डमध्ये ठेवण्यात येत होतं. पण आता हिंदू आणि मुस्लीम रुग्णांना वेगवेगळ्या वॉर्डमध्ये ठेवण्यात येत आहे, असं इथल्या रुग्णांचं म्हणणं आहे.
12 एप्रिलच्या रात्री मुस्लीम समुदायाच्या रुग्णांना दुसऱ्या वॉर्डमध्ये जाण्यास सांगितलं आणि हिंदू समाजाच्या रुग्णांना मात्र जुन्याच वॉर्डमध्ये ठेवण्यात आलं, असं इथल्या एका रुग्णानं बीबीसीला सांगितलं.
या हॉस्पिटलमधल्या C4 वॉर्डमध्ये फक्त मुस्लीम समाजाचे रुग्ण आहेत, असंही त्यांनी सांगितलं.
पण, हॉस्पिटलचे मेडिकल सुपिरिटेंडंट डॉ. जी.एच.राठोड यांनी हा आरोप फेटाळून लावला आहे.
मुंबईसारख्या हॉटस्पॉटमध्ये एवढे लोक एकत्र रस्त्यांवर का आले..दिल्ली, सुरत, चेन्नई, हैद्राबाद, मुंबई अशा ठिकाणी हे मजूर वारंवार बाहेर कापडत आहेत?
मुंबईसारख्या हॉटस्पॉटमध्ये एवढे लोक एकत्र रस्त्यांवर का आले..दिल्ली, सुरत, चेन्नई, हैद्राबाद, मुंबई अशा ठिकाणी हे मजूर वारंवार बाहेर कापडत आहेत? पाहूया #सोपीगोष्ट कोविडच्या काळातल्या स्थलांतरित मजुरांची.
पाहा व्हीडिओ -
अमेरिकेत गेल्या 24 तासांत 2 हजार 600 लोकांना कोरोना व्हायरसमुळे जीव गमवावा लागला आहे. आतापर्यंत एका दिवसात नोंदवलेल्या गेलेल्या मृत्यूंमध्ये ही संख्या सर्वाधिक आहे. जॉन हॉपकिन्स विद्यापीठानं ही माहिती दिली आहे.
सुप्रभात...बीबीसी मराठीच्या या लाइव्ह पेजवर तुमचं स्वागत. कोरोनासंबंधी दिवसभरात घडणारे अपडेट आपण इथं जाणून घेणार आहोत. दिवसभरातल्या घडामोडी जाणून घेण्यापूर्वी काल घडलेल्या घटनांचा थोडक्यात आढावा आणि अधिक अपडेट्स जाणून घेण्यासाठी क्लिक करा.