You’re viewing a text-only version of this website that uses less data. View the main version of the website including all images and videos.
अयोध्येची मूळ जागा हिंदूंना राम मंदिरासाठी देण्यात यावी आणि मुस्लिमांना मशिदीसाठी पाच एकर पर्यायी जागा देण्यात यावी, असा ऐतिहासिक निकाल सुप्रीम कोर्टाने आज दिला.
अयोध्या प्रकरणाचा निकाल लागल्यामुळे आपणास आनंद झाल्याची भावना माजी उप-पंतप्रधान लालकृष्ण आडवाणी यांनी व्यक्त केली. या निर्णयामुळे मी समाधानी आणि धन्य झालो असल्याचं ते माध्यमांशी बोलताना म्हणाले.
मशिदीसाठी पाच एकर जमीन देण्यात यावी असं सुप्रीम कोर्टानं सांगितलं. या गोष्टीचं आडवाणींनी समर्थन केलं आहे.
अयोध्या निकाल हा कायद्याला अनुसुरून आहे की भाजपच्या जाहीरनाम्यानुसार आहे, अशी टीका पाकिस्तानने केली आहे.
पाकिस्तानी लष्कराचे प्रवक्ते आसिफ गफूर, पाकिस्तानचे परराष्ट्र मंत्री शाह महमूद कुरेशी तसंच विज्ञान आणि तंत्रज्ञान मंत्री चौधरी फवाद हुसैन यांनी आक्रमकपणे अयोध्येच्या निकालावर टीका केली आहे.
ते नेमकं काय म्हणालेत, वाचा या बातमीत
अयोध्येचा निकाल आल्यानंतर पंतप्रधान मोदी हे राष्ट्राला उद्देशून भाषण करत आहेत. पाहा संपूर्ण भाषण इथे
मोदींच्या भाषणातील महत्त्वाचे मुद्दे -
अयोध्येच्या निकालानंतर लालकृष्ण अडवाणींची भेट घेणार असल्याचं उद्धव ठाकरे यांनी सांगितलं आहे.
येत्या 24 नोव्हेंबरला पुन्हा एकदा अयोध्येला जाणार असल्याचं उद्धव ठाकरे यांनी सांगितलं आहे. मी पुन्हा पुन्हा इथं जाईल असंही त्यांनी म्हटलंय.
येत्या 2 ते 3 दिवसांमध्ये सर्वांत आधी शिवनेरीला जाणार असल्याचं उद्धव ठाकरे यांनी सांगितलं आहे.
हिंदू मानणाऱ्या सर्व पक्षांनी इतर स्थळांबाबत निर्णय घ्यावा, असं इतर मंदिर-मशिद वादांबाबत बोलताना त्यांनी म्हटलं आहे.
"अयोध्याप्रकरणी सर्वोच्च न्यायालयाने निर्णय जाहीर केला आहे. न्यायालयाच्या या निर्णयाचं स्वागत करताना सगळ्यांनी शांतता आणि बंधुभाव जपायला हवा. सर्व भारतीयांनी एकमेकांशी प्रेम आणि विश्वासाने वागावे," असं काँग्रेस नेते राहुल गांधी यांनी म्हटलं आहे.
सर्वोच्च न्यायालयाने एकमताने महत्त्वाचा निर्णय दिला आहे. या निर्णयामुळे देशासमोरील जो गंभीर प्रश्न होता तो सोडवण्यासाठी मदत होणार आहे. समाजातील सर्वांनी त्याचं स्वागत आणि सन्मान करावा. शांतता राखण्याचा प्रयत्न केला पाहिजे असं मी आवाहन करतो. या निर्णयाचा महाराष्ट्राच्या राजकारणावर परिणाम होणार नाही, असं राष्ट्रवादी काँग्रेसचे अध्यक्ष शरद पवार म्हणालेे.
"सर्वोच्च न्यायालय सर्वोच्च आहे. पण पूर्णतः बरोबर असू शकत नाही. ज्यांनी बाबरी मशीद उद्ध्वस्त केली, त्यांनाच एक ट्रस्ट बनवून मंदिर बांधायला सांगितलं आहे. आज ती मशीद तिथे उभी असती तर न्यायालयाने काय निर्णय घेतला असता, हा प्रश्न मला पडला आहे," असं ऑल इंडिया मजलिस ए- इत्तेहादुल-मुसलमीन अर्थात MIM पक्षाचे प्रमुख असदुद्दिन ओवेसी म्हणाले.
"काँग्रेसने त्यांचे खरे रंग दाखवले आहेत. काँग्रेसने त्यांचं ढोंगी आणि दांभिक धोरण स्वीकारले नसते, 1949 मध्ये मूर्तींची स्थापना झाली नसती. राजीव गांधींनी जागा खुली केली नसती तर आज मशीद असती. नरसिंह राव यांनी त्यांची जबाबदारी निभावली असती तरीही तिथे मशीद असती," अशी टीका एमआयएम पक्षाचे प्रमुख असदुद्दीन ओवेसी यांनी केली.
"सर्वोच्च न्यायालयाच्या निर्णयाचे आम्ही स्वागत करतो. हा निर्णय म्हणजे कुणाचा जय किंवा पराजय नाही. भारतीय अस्मितेचं जे प्रतीक आहे, त्या संदर्भातील आस्था बळकट करणारा हा निर्णय आहे.
"पंतप्रधान नरेंद्र मोदींनी मांडलेल्या भारतभक्तीचं हा निर्णय प्रतीक आहे. सबका साथ, सबका विकास आणि सबका विश्वास असा हा निर्णय आहे. नवीन भारतासाठी एकजुटीने सर्व नागरिक या निर्णयाचा सन्मान करतील अशी आशा आहे," असं महाराष्ट्राचे काळजीवाहू मुख्यमंत्री देवेंद्र फडणवीस म्हणाले.
"मी सर्वोच्च न्यायालयाच्या निर्णयाचं स्वागत करतो. खटल्याशी निगडीत सर्वांनी निकालाचा सन्मान करावा. समर्थ भारताच्या उभारणीसाठी कोणत्याही स्वरूपाचा भेदभाव न बाळगता विकासाकरता काम करायला हवे," अशी प्रतिक्रिया अभिनेते रजनीकांत यांनी दिली.
"आजचा दिवस अतिशय आनंदाचा आहे. अयोध्येतील राम मंदिरासाठी कारसेवकांनी जे बलिदान दिलं, त्याचं आज सार्थक झालं," असं मनसे अध्यक्ष राज ठाकरे म्हणाले.
तसंच, "हा निर्णय ऐकायला आज बाळासाहेब असायला हवे होते, त्यांना खूप आनंद झाला असता," असंही राज ठाकरे म्हणाले.
सुप्रीम कोर्टानं ऐतिहासिक निकाल दिलाय. अयोध्येत भव्य राम मंदिर उभारलं जाईल. मुस्लिमांनाही जमीन देण्याच्या निर्णायचं मी स्वागत करतो. मशीद बांधण्यासाठी हिंदू बंधूंनीही हातभार लावला पाहिजे. - बाबा रामदेव
काँग्रेस सरचिटणीस प्रियंका गांधी यांनी शांतता राखण्याचं आवाहन केलंय.
श्रीराम जन्मभूमीबाबत सुप्रीम कोर्टाच्या निर्णयाचं राष्ट्रीय स्वंयसेवक संघ स्वागत करत आहे. या निर्णयाकडे जय-पराजय म्हणून पाहू नये. लोकांनी संयमानं आनंद व्यक्त करावा. भूतकाळ विसरून पुन्हा एकत्र येऊया. - सरसंघचालक मोहन भागवत
संघ आंदोलनात सहभागी होत नाही पण राममंदिर आंदोलनात आम्ही परिस्थितीमुळे सहभागी झालो होतो असं भागवत यांनी पत्रकार परिषदेत म्हटलं.
सुप्रीम कोर्टानं अयोध्यावर आपला निर्णय दिला आहे. या निर्णयाकडे कुणाचा विजय किंवा कुणाचा पराभव या दृष्टीनं पाहू नये. रामभक्ती असो वा रहीमभक्ती, ही वेळ सर्वांसाठी भारतभक्तीच्या भावनेला सशक्त करण्याची आहे. देशवासियांनी शांतता, सद्भावना आणि एकता कायम ठेवावी. - पंतप्रधान नरेंद्र मोदी
सुप्रीम कोर्टाच्या निर्णायचं स्वागत करतो. या निर्णयामुळं दोन्ही समूहांचा आदर राखला गेलाय. यामध्ये कुणाचा विजय किंवा कुणाचा पराभव नाहीय, तर यातून भारताची प्रतिष्ठा वाढलीय. - श्री श्री रविशंकर
श्रीराम जन्मभूमीवरील सर्वसहमतीनं देण्यात आलेल्या सुप्रीम कोर्टाच्या निर्णयाचं मी स्वागत करतो. सर्वधर्मियांनी या निर्णयाचं स्वागत करून, शांतता आणि सौहार्दपूर्ण 'एक भारत-श्रेष्ठ भारत' या आपल्या संकल्पाशी कटिबद्ध राहावं. - भाजपचे राष्ट्रीय अध्यक्ष अमित शाह
सर्वोच्च न्यायालयाचा निकाल हा समाधानकारक आहे. जी विवादित जागा आहे, त्या ठिकाणी राम मंदिर होते. या निर्णयामुळे मुस्लीम बांधव सुद्धा समाधानी होतील. कारण पाच एकर जागा मशिदीला दिली आहे. - मा. गो. वैद्य, आरएसएसचे माजी प्रवक्ते
अयोध्या निकालाच्या विजयानंतर अशोक सिंघल यांना आठवूया. नरेंद्र मोदी सरकारनं तातडीनं अशोक सिंघल यांना 'भारतरत्न' द्यावा. - सुब्रह्मण्यम स्वामी
सुप्रीम कोर्टाचा निकाल ऐतिहासिक आहे. या निकालामुळं भारताची सामाजिक बांधणी आणखी मजबूत होईल - संरक्षण मंत्री राजनाथ सिंग
राम मंदिर उभारणीच्या बाजूनेच आम्ही आहोत. या निकालामुळं केवळ मंदिर बांधण्याचा मार्गच मोकळा झाला नाहीय, तर या मुद्द्याचं राजकारण करणाऱ्या भाजपचे दरवाजे बंद झालेत - रणदीप सुरजेवाला, काँग्रेस प्रवक्ते