IndvsEng: हेडिंग्ले कसोटीत भारताचा पहिला डाव 78 धावांतच गुंडाळला
फोटो स्रोत, PAUL ELLIS
लॉर्ड्स टेस्ट जिंकत दमदार आघाडी घेणाऱ्या टीम इंडियाला हेडिंग्ले टेस्टमध्ये नामुष्कीला सामोरं जावं लागलं. भारताने टॉस जिंकून प्रथम फलंदाजीचा निर्णय घेतला मात्र इंग्लंडच्या भेदक गोलंदाजीपुढे भारतीय फलंदाजांनी 40.4 ओव्हर्समध्ये 78 धावांतच गुडघे टेकले.
इंग्लंडच्या वेगवान गोलंदाजांनी केलेल्या शिस्तबद्ध माऱ्यासमोर भारतीय फलंदाज निरुत्तर ठरले.
भारताने लॉर्ड्स टेस्टचा संघच कायम ठेवला तर इंग्लंडने डॉम सिबले आणि मार्क वूड यांच्याऐवजी डेव्हिड मलान आणि क्रेग ओव्हर्टन यांना संघात समाविष्ट केलं.
जेम्स अँडरसनने पहिल्याच ओव्हरमध्ये लोकेश राहुलला बाद केलं. राहुल भोपळाही फोडू शकला नाही. भरवशाचा चेतेश्वर पुजारा अँडरसनच्या आक्रमणासमोर नामोहरम ठरला. त्याला केवळ एका धावेचं योगदान देता आलं.
गेल्या काही महिन्यांपासून फॉर्मसाठी झगडणारा कर्णधार विराट कोहली अँडरसनचाच शिकार ठरला. टेस्ट क्रिकेटमध्ये कोहलीला सर्वाधिक वेळा (7) वेळा ऑस्ट्रेलियाच्या नॅथन लॉयन आणि जेम्स अँडरसनने बाद केलं आहे. ऑफस्टंपच्या बाहेरचा चेंडू खेळण्याचा मोह कोहलीच्या अंगलट आला. कोहलीने 7 धावा केल्या.
अँडरसनचा पहिला स्पेल 8-5-6-3 असं होतं. रोहित शर्माने एका बाजूने खिंड लढवत प्रतिकार केला. रोहित शर्माने अजिंक्य रहाणेच्या साथीने चौथ्या विकेटसाठी 92 चेंडूत 35 धावांची भागीदारी केली. ओली रॉबिन्सनने रहाणेचा प्रतिकार संपुष्टात आणला. त्याने 18 धावा केल्या. रॉबिन्सननेच ऋषभ पंतला चकवत बाद केलं.
रोहित रवींद्र जडेजाच्या साथीने डाव सावरणार असं वाटत होतं. मात्र ओव्हर्टनच्या गोलंदाजीवर विचित्र पद्धतीने पूलचा फटका खेळण्याचा प्रयत्न रॉबिन्सनच्या हातात जाऊन विसावला.
फोटो स्रोत, PAUL ELLIS
आक्रमक पवित्र्याला मुरड घालून संयमाने खेळणाऱ्या रोहितची एकाग्रता भंग पावली. त्याने 105 चेंडूत 19 धावांची खेळी केली.
लॉर्ड्स कसोटीत अर्धशतकी खेळी करणारा मोहम्मद शमी पहिल्याच चेंडूवर बाद झाला. सॅम करनने रवींद्र जडेजाला पायचीत केलं. त्याने 4 धावा केल्या. जसप्रीत बुमराहही भोपळाही फोडू शकला नाही. सिराजला ओव्हर्टनने बाद केलं. इंग्लंडचा विकेटकीपर जोस बटलरने पाच झेल टिपले.
अँडरसन आणि ओव्हर्टन यांनी प्रत्येकी 3 तर ऑली रॉबिन्सन आणि सॅम करन यांनी प्रत्येकी 2 विकेट्स घेतल्या. भारतीय फलंदाजांना 50 ओव्हर्सही खेळता आल्या नाहीत. भारतीय संघाची इंग्लंडमधली ही तिसऱ्या क्रमांकाची नीचांकी धावसंख्या आहे. भारतीय संघासाठी ही एकूण नववी नीचांकी धावसंख्या आहे.
19 वर्षांपूर्वी हेडिंग्लमध्येच मिळवला होता विजय
भारतीय संघाने क्रिकेटची पंढरी अर्थात लॉर्ड्सवर दिमाखदार विजय मिळवत इंग्लंडविरुद्धच्या मालिकेत 1-0 आघाडी घेतली होती.
आजपासून तिसरी टेस्ट हेडिंग्ले, लीड्स इथं सुरू झाली. भारतीय संघ तब्बल 19 वर्षांनंतर या मैदानावर टेस्ट खेळतो आहे.
फोटो स्रोत, PAUL BARKER
योगायोग म्हणजे 19 वर्षांपूर्वी झालेल्या त्या टेस्टमध्ये भारतीय संघाने दणदणीत विजय मिळवला होता.
त्याहून मोठा योगायोग म्हणजे याच मैदानावर भारतीय संघ आधीची टेस्ट 16 वर्षांपूर्वी खेळला होता. ती टेस्टही भारतीय संघाने जिंकली होती. 35 वर्षांनंतर हेडिंग्लेवर विजयाची हॅट्रिक साधण्याची संधी टीम इंडियासमोर आहे.
भारतीय संघाने या मैदानावर 6 टेस्ट खेळल्या आहेत. 1952, 1959,1967 या वर्षी झालेल्या टेस्ट्समध्ये भारतीय संघाला पराभवाला सामोरं जावं लागलं होतं.
1979 मध्ये झालेली टेस्ट अनिर्णित झाली होती. त्यानंतर 1986 आणि 2002 मध्ये झालेल्या टेस्टमध्ये भारतीय संघाने विजय मिळवला आहे.
हेडिंग्लेवरील आधीच्या दोन संस्मरणीय विजयांचा घेतलेला आढावा.
वेंगसरकरांची हुकूमत आणि रॉजर बिन्नी यांची भन्नाट स्विंग गोलंदाजी (19 ते 23 जून 1986)
दिलीप वेंगसरकरांच्या दमदार खेळाच्या बळावर 1986 मध्ये भारतीय संघाने हेडिंग्ले काबीज केलं होतं.
भारतीय संघाने प्रथम फलंदाजी करताना 272 धावांची मजल मारली. वेंगसरकरांनी सर्वाधिक 61 धावा केल्या. प्रत्युत्तरादाखल खेळताना इंग्लंडचा पहिला डाव 102 धावातच गडगडला. रॉजर बिन्नी यांनी 5 विकेट्स घेतल्या.
फोटो स्रोत, Getty Images
भारताने दुसऱ्या डावात 237 धावांची मजल मारली. वेंगसरकरांनी नाबाद 102 धावांची दिमाखदार खेळी केली.
बाकी फलंदाजांना मोठी खेळी करता आली नाही. इंग्लंडला 408 धावांचं लक्ष्य मिळालं. त्यांचा दुसरा डाव 128 धावातच आटोपला. मनिंदर सिंगने 4 तर कपिल देव आणि रॉजर बिन्नी यांनी प्रत्येकी 2 विकेट्स घेतल्या.
त्रिमुर्तींचा शतकसोहळा आणि हेडिंग्लेवरचा जंगी विजय (22 ते 26 ऑगस्ट 2002)
या मैदानावर झालेल्या शेवटच्या टेस्टमध्ये भारतीय संघाने दिमाखदार विजय साकारला होता.
या विजयाचं वैशिष्ट्य म्हणजे राहुल द्रविड, सचिन तेंडुलकर आणि सौरव गांगुली यांनी झळकावलेली शतकं. परदेशातील संस्मरणीय विजयांमध्ये हेडिंग्लेवरील विजयाचा समावेश होतो. भारताने चार सामन्यांची मालिका 1-1 अशी बरोबरीत सोडवली.
भारताने टॉस जिंकून फलंदाजीचा निर्णय घेतला. ढगाळ वातावरण आणि स्विंग गोलंदाजीला अनुकूल खेळपट्टीवर संजय बांगर आणि वीरेंद्र सेहवाग यांनी सुरुवात केली.
सेहवाग लवकर बाद झाला मात्र त्यानंतर बांगर-द्रविड जोडीने दुसऱ्या विकेटसाठी 170 धावांची भागीदारी केली. बांगरने 68 धावांची खेळी केली.
फोटो स्रोत, Laurence Griffiths
सचिन तेंडुलकर आणि द्रविड जोडीने तिसऱ्या विकेटसाठी 150 धावांची भागीदारी केली. द्रविड बाद झाल्यानंतर सचिन-सौरव जोडीने चौथ्या विकेटसाठी 249 धावांची भागीदारी केली.
राहुल द्रविडने 23 चौकारांसह 148 धावांची खेळी केली. सचिनने 19 चौकार आणि 3 षटकारांसह 193 धावांची मॅरेथॉन खेळी केली. गांगुलीनेही शर्यतीत मागे न राहता 14 चौकार आणि 3 षटकारांसह 128 धावांची सुरेख खेळी केली. भारतीय संघाने पहिला डाव 628/8 धावसंख्येवर घोषित केला.
इंग्लंडचा पहिला डाव 273 धावातच आटोपला. अॅलेक स्टुअर्टने 78 तर मायकेल वॉनने 61 धावांची खेळी केली. अनिल कुंबळे आणि हरभजन सिंग यांनी प्रत्येकी तीन विकेट्स घेतल्या.
प्रचंड आघाडी असल्याने भारताने इंग्लंडला फॉलोऑन देण्याचा निर्णय घेतला. दुसऱ्या डावात इंग्लंडने प्रतिकार केला मात्र तरीही त्यांचा डाव 309 धावात आटोपला. नासिर हुसेनने 110 धावांची खेळी केली. अनिल कुंबळेने चार विकेट्स घेतल्या.
राहुल द्रविडला सामनावीर पुरस्काराने गौरवण्यात आलं.
हे वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
