वसुंधरा दिनानिमित्ताने पाहा पृथ्वीच्या मनोहारी छटा

आज पन्नासावा Earth Day म्हणजे पृथ्वी दिन आहे. पृथ्वीचा, इथल्या निसर्गाचा, जीवनाचा सोहळा साजरा करण्याचा दिवस.

एरव्ही दरवर्षी 22 एप्रिलला पर्यावरणाविषयी जागरूकता निर्माण करण्यासाठी अनेक कार्यक्रमांचं आयोजन केलं जातं. ठीकठीकाणी प्रदर्शनं, निदर्शनं, स्वच्छता मोहीम हाती घेतली जाते.

यावेळेचा पृथ्वी दिन मात्र वेगळा आहे. कोरोना विषाणूच्या साथीचं संकट जगभरात पसरलं आहे. लोक एकमेकांपासून दूर, आपापल्या घरात आहेत. पण त्याचवेळी वसंत ऋतू बाहेर फुलला आहे. निसर्ग कात टाकतो आहे.

हीच ती वेळ आहे, जेव्हा एकत्र न येताही आपण एकत्र असल्याची जाणीव एकमेकांना करून देऊ शकतो. पृथ्वीविषयी आपली कृतज्ञता व्यक्त करू शकतो आणि ती अशीच सुंदर राहावी यासाठी आपण काय करायचं, याचाही विचार करू शकतो.

दरवर्षीप्रमाणे यंदाही NASA या अमेरिकेच्या अंतराळ संशोधन संस्थेनं हा दिवस साजरा करण्यासाठी पृथ्वीचे काही फोटोज पोस्ट केले आहेत. नासाच्या संग्रहातले पृथ्वीचे हे काही नेत्रदीपक फोटोज.

'द ब्लू मार्बल' या नावानं ओळखला जाणारा हा प्रसिद्ध फोटो 7 डिसेंबर 1972 रोजी अपोलो-17 यानाच्या सदस्यांनी टिपला होता. भूमध्य सागरापासून अंटार्क्टिकापर्यंतचा भाग यात दिसतो आहे.

रात्रीच्या अंधारात दिव्यांनी उजळलेला भारत आणि पाकिस्तानचा भाग. पृथ्वीपासू 261 मैल उंचावर आंतरराष्ट्रीय अंतराळ स्थानकातून यंदा मार्चमध्ये हा फोटो टिपला गेला.

अंतराळातून दिसणाऱ्या मुंबई नगरीचा हा फोटो 25 मार्च 2004 रोजी टिपण्यात आला होता.

मोरोक्कोतील या पर्वतरांगा म्हणजे 80 दशलक्ष वर्षांपूर्वी आफ्रिकन आणि युरेशियन टेक्टॉनिक प्लेट्सच्या टकरीतून निर्माण झालेला प्रदेश आहे.

इजिप्तमधल्या लेक नासरचं टिपलेले दृश्य.

नासाचे छायाचित्रकार रिकी अरनॉल्ड यांनी मादागास्कर प्रदेशाची टिपलेली छटा. सदाहरित जंगलं आणि किनारी खारफुटी यांची कत्तल होत चालल्याने ड्रेनेज समुद्रात रवाना होताना.

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)