कोरोना लसीकरण : महाराष्ट्रातील 30 जिल्हे आणि 25 महापालिका क्षेत्रांमध्ये आज ड्राय रन

भारत सरकारच्या मार्गदर्शक सूचनांनुसार आज (8 जानेवारी) महाराष्ट्रातील 30 जिल्हे आणि 25 महानगरपालिका क्षेत्रांमध्ये कोरोना लसीकरणासाठी ड्राय रन मोहीम राबवण्यात येणार आहे.

प्रत्येक जिल्ह्यात 3 आरोग्य संस्था आणि प्रत्येक महानगरपालिका क्षेत्रात एका आरोग्य संस्थेत ड्राय रन घेण्यात येईल, अशी माहिती महाराष्ट्राचे आरोग्यमंत्री राजेश टोपे यांनी दिली आहे.

याआधी 2 जानेवारी रोजी पुणे, नंदुरबार, जालना, नागपूर या जिल्हयात आणि नागपूर, पिंपरी-चिंचवड या महानगरपालिका क्षेत्रात ही मोहीम राबविण्यात आली होती.

ड्राय रन कशासाठी घेतला जातो?

केंद्र सरकारने दिलेल्या प्रसिद्धी पत्रकानुसार, कोविन मोबाईल अॅपचा वापर स्थानिक पातळीवर कसा केला जातो, हे पाहणं या ड्राय रनचा प्रमुख उद्देश आहे.

कोरोना लसीकरणाची पूर्वतयारी म्हणून ड्राय रन घेण्यात येत आहे. यात आरोग्य यंत्रणा आणि प्रशासन विविध स्तरांवरील कामाचे नियोजन करणार आहेत.

क्षेत्रीय स्तरावर कोविन अॅप किती सोयीस्कर व उपयोगी आहे हे तपासणे, कोरोना लसीकरणाबतचे नियोजन, अंमलबजावणी तसेच अहवाल तयार करणे, या सर्व बाबींची पडताळणी आणि तपासणी, प्रत्यक्ष लसीकरण सुरू करण्यापूर्वी, लसीकरणाबाबतची आव्हाने आणि त्यानुसार मार्गदर्शक सूचना तयार करणे अशी पूर्व तयारी ड्राय रन अंतर्गत अपेक्षित आहे.

तसंच, लसीकरण करण्याच्या प्रक्रियेचं नियोजन कशा पद्धतीने चालतं, यामध्ये समन्वय राखण्यात कोणती आव्हानं येऊ शकतात, हे पाहिलं जाईल. यामुळे ग्राऊंड लेव्हलवर काम करणाऱ्या लोकांमध्ये आत्मविश्वास निर्माण होईल.

लसीकरणासाठी राज्यात आतापर्यंत झालेली पूर्व तयारी

महाराष्ट्रातील 30 जिल्हे आणि 25 महानगरपालिका क्षेत्रांमध्ये कोरोना लशीकरणासाठी ड्राय रन मोहिम राबवण्यात येणार असल्याने प्रत्येक जिल्हा प्रशासनाने आपआपल्या जिल्ह्यांचे यूजर आयडी तयारी केले आहेत.

जिल्हास्तरावरुन आरोग्य संस्थेचे आणि लसीकरण पथकाचे यूजर आयडी तयार करण्याचे कामही पार पडले आहे.

कोरोना लस घेणाऱ्यांची निवड करून त्यांचे कोविन अॅपमध्ये लसीकरण सत्र तयार करणे आणि त्याचे मॅपिंग करण्याचे काम जिल्हापातळीवर सुरू आहे.

लस घेणाऱ्या व्यक्तींची माहिती कोविन पोर्टलवर अपलोड केली जाणार आहे.

तसेच आरोग्य सेविकेचे सत्र स्थळ निश्चित करणे, लस वाटप करणे, शितसाखळी केंद्राला कळवणे, आरोग्य सेविकेला सत्राचा दिवस आणि वेळ कळविणे, लसीकरण अधिकारी आणि पर्यवेक्षक यांच्या जबाबदाऱ्या निश्चित करण्यात आल्या आहेत अशी माहिती आरोग्य विभागाने दिली आहे.

ड्राय रनअंतर्गत लसीकरण कसे केले जाणार?

प्रभारी अधिकाऱ्याला लसीकरणासाठी निवडण्यात आलेल्या 25 लोकांची ओळख पटवावी लागेल. हे सगळं काम एका मॉक-ड्रिलप्रमाणे असेल. प्रत्यक्षात कुणाला लस दिली जाणार नाही.

एका केंद्रावर 25 जणांना लस देण्याचा ड्राय रन होईल. लशीसाठी कोविन अॅपवरील नोंदणीनुसार कक्षात सोडले जाईल. लस घेणाऱ्या व्यक्तीच्या माहितीची कोविन अॅपमध्ये पडताळणी केली जाणार आहे.

या प्रक्रियेनंतरच लसीकरणाची नोंद कोविन ॲपमध्ये करण्यात येईल.

भारतात अजूनही कोणत्याही लशीला मंजुरी मिळालेली नाही. ड्राय रनचा उद्देश लस देणं नव्हे तर लसीकरण प्रक्रिया योग्य प्रकारे अंमलात येईल किंवा त्यामध्ये आणखी काही सुधारणा करणं गरजेची आहे, हे तपासणं आहे.

कोरोना लसीकरण सत्र आयोजित करताना हात धुण्याची व्यवस्था, सॅनिटायझरची उपलब्धता करावी. मास्क वापरणे आणि योग्य ते अंतर (Social Distancing) राखणे या नियमांची अंमलबजावणी करण्याच्या सूचना देण्यात आल्या आहेत.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)