Anthony Joshua vs Pulev: Anthony Joshua akụpụla Kubrat Pulev ọkwụrụ n'anya

Mkpuchi Na Eme Ozugbo

1. 30 Nọvemba 2020E gbuola mmadu abụọ n'Ebonyi n'ime esemokwu 'ndọrọndọrọ ọchịchị na otu nzuzo'

   Onye oji egbe gburu otu nwoke aha ya bụ Shedrak Chinedu Nwode bụ onye Umuezoka na otu nwaanyị a sị bụ enyi ya nwaanyị n'obodo Oriuzo dị n'okpuru ọchịchị Ezza Nọt nke Ebonyi steeti.

   Ihe a mere n'ụbọchị ụka dịka okwu ndọrọndọrọ ọchịchị nan'otu nzuzo butere esemokwu.

   Otu onye hụrụ oge ihe a mere gwara onye ntaakụkọ BBC na ọ bụ ha ma aha ya ka a na-eche na ọ bụ ya gbara egbe gburu Maazị Nwode na enyi ya nwaanyị.

   Onye a nọ n'oge ihe a mere sị na nsogbu malitere oge Nwode Oriuzo ruru ebe otu Kancilọ si Ezza Nọt na-eme emume "thanksgiving" ndị mmadụ were na-eti "APC, APC" nke pụtara (All Progressive Congress).

   Ọ sị: "Nwode sị na ya abụghị onye APC kama ya bụ onye PDP (Peoples Democratic Party), nke mere otu onye jiri si ya kwụsị ikwu etu ahụ."

   Onye hụru ihe mere sị: "Nwode jụrụ ihe mere ya agaghị ekwu okwu e were malite ịgwọ ọnụ tupu Onyeisi okpuru ọchịchị Ezza pụtara ka ya na onye nwụrụ kpaa nkata ma mechaa see foto."

   Ọ sị: "Ka nkeji iri gachara, nwode na enyi ya nwaanyị pụrụ. Dị ka ha na-apụ a nọchịrị ha ụzọ nwere gba ya egbe n'isi. Ọ bụ mgbọ egbe ahụ tụrụ enyi ya nwaanyị were gbukwaa ya."

   Onye ọzọ ma maka ihe gwara BBC na ọ bụ esemokwu dị n'etiti ndị otu nzozu a kpọrọ Baggers na Aye butere ihe a.

   Onye an-akọwa na Nwode na-akwado ịlụ nwaanyị tupu ihe a eme.

   Onye ntaakụkọ BBC gbara mbọ ịnụta n'ọnụ ndi uweojii n'Ebonyi maka okwu a mana Ọnụ na-ekwuru ha na steeti ahụ bụ Loveth Odah sị na ya enwetebeghi ozi banyere ya bụ okwu.

   Agbanyeghị nke a, kepu kepu BBC na-anụ bụ na anwụchiela otu onye maka ogbugbu Maazị Nwode.

2. 30 Nọvemba 2020Ndị agha enyebeghi ikike ka amalite ịkọ ugbua n'ebe ndị omekome wakporo

   Ndị agha Naịjirịa enyebeghi ikike ọrụ ugbo ma kwuo na Boko Haram anọghị na mpaghara ndị omekome wakporo ma gbuo ndị ọrụ ugbo karịrị iri anọ na atọ.

   Garba Shehu bụ ọnụ na-ekwuru Onyeisiala Muhammadu Buhari bụ Garba Shehu gwara BBC na ụfọdụ mpahara ugwu Naịjirịa ka nọ n’aka Boko Haram.

   Ọ sị na na ndị nwụru ka nwere ike rịa karịa mmadụ ole ama maka ya ugbua.

   Ọ bụ ụbọchị Sọnde ka elili ndị a nwụrụ.

   Garba Shehu sị: "Ihe a mere na-agbawa gọọmentị obi ... akụkọ ihe a mere ga-agbanwe dịka a na-achọpụta maka ya."

   Ọ sị na a na-achọ ndị kpara ike a ugbua. Ọ sịkwa na a na-eche na ndị a bụ omekome ofufe alakụba.

   He said there was an operation underway to pursue the attackers, suspected to be militant Islamists.

3. 30 Nọvemba 2020Etu ndị ekperima si bata gbuo ndị be anyị - Onye hụrụ ihe merenụ

   Okwu a kpụ n'ọnụ n'ụbọchị Sọnde bụ ogbugbu ndị ọrụ ubi karịrị mmadụ iri anọ na atọ na Borno Steeti.

   Otu onye aha ya bụ Usman Ismail, onye hụrụ etu ya bụ ihe si mee, kọọrọ ndị ntaakụkọ ihe merenụ.

   Ismail kwuru na ndị Boko Haram na-abata n'obodo ha kwa mgbe kwa mgbe na-amanye ndị mmadụ amanye inyere ha aka.

   O kwuru sị: "Ọtụtụ oge ka ha na-abịa amanye anyị ka anyị buru ibu ha si n'ebe a baa n'ime ọhịa ebe ha bi."

   "Onweghi ihe anyị ga-emenwu n'ihi na ha bucha egbe, mana ha na-ekwu na onwghị ihe ọbụla ha ga-eme anyị."

   "Ọtụtụ oge, anyị na-arahụ n'ubi anyị n'ime ọhịa n'ihi na onweghị ihe ha na-eme anyị. Ọ bụladị n'abalị ụnyaahụ (Satọde), anyị rahụkwara n'ubi anyị."

   "Oge anyị hụrụ ha ka ha na-akpọkọ ndị mmadụ, anyị chekwa na ọ bụ ka anyị nyere ha aka etu anyị si emebu na mbụ."

   "Ha malitere ịkpọrọ ụfọdụ baa n'ime ọhịa mana ndị ahụ agaghị eso ha apụta. Ha akpọrọkwa ndị ọzọ baa n'ọhịa, ndị ahụ agaghị eso ha pụta."

   "Oge ahụ ka ụfọdụ n'ime anyị ji malite ịtụ egwu wee chọwa ụzọ ịmịpụ ma gbaghachi azụ n'obodo."

   Oge ndị ntaakụkọ jụrụ Ismail ihe kpatara na ha akpọghị ndịagha oge ha hụrụ ndị ekperima ahụ, o kwuru sị:

   "Anyị anaghị eji ekwentị anyị aga ọrụ n'ihi na ha ga-anara gị ya. Ọ bụrụ na ha nara gị ekwentị gị, gịnị ka ị ga-eme?"

   Ismail kwuru na mwakpo ahụ malitere n'elekere asaa nke ụtụtụ, mana ọ bụ n'elekere iri na otu ka ha nwetara ohere ịmịpụ ma gbaa ọsọ. Tupu ha erute n'obodo ha, ọ kụọla elekere atọ nke ehihie.

   Ọ gara n'ihu kwuo na osikapa ha kọrọ mere nnọọ nke ọma n'afọ a, mana ha amaghịzi etu ha ga-esi gaghachi n'ubi ha bute ya.

   Gọvanọ Borno steeti bụ Babagana Zulum kwuru na ha ga elebagharị anya n'usoro ha ji ebuso ndị ekperima Boko Haram agha.

4. 30 Nọvemba 2020Mmadụ 82 ọzọ ebutela ọrịa coronavirus na Naijirịa

   Ngalaba NCDC edepụtala na mmadụ iri asatọ na abụọ ọzọ ebutela ọrịa coronavirus na Naijirịa.

   Legọs kacha dịka mmadụ iri anọ na asatọ butere ya na steeti ahụ ebe mmadụ asatọ si Rivers state.

   Ọnụ ọgụgụ ha gosiri na mmadụ abụọ ọzo anwụọla ebe mmadụ narị abụọ na iri atọ na isii agbakeela n'aka ya bụ ọrịa.

5. 30 Nọvemba 2020Onye tiri ndị ọrụ mmenyụ ọkụ Legọs steeti isi aba okpu?

   Akụkọ na-ekwu na ndị omekome tiri mmadụ atọ bụ ndị ọrụ mmenyu ọku nke Legọs steeti ihe ma mebie ụgbọala ha ji arụ ọrụ dịka ha gara ịmenyụ ọkụ n'ụbọchị Sụnde.

   Onyeisi ha kwuru na ọ bụ ndị uweojii nke Alabo Police division zọpụtara ndịa.

   Dịka ọ dị ugbu a, mmadụ ato a na-anata ọgwụgwọ n'Agege General Hospital ebe ebidola nyocha maka ihe butere ya bụ mkpamkpa.

6. 30 Nọvemba 2020'Ndị Naijirịa nde iri abụọ na ise ga-erite igwe ọkụ solar' - Gọọmentị Naijirịa

   Gọọmentị Naijirịa ekwuola na mmadụ nde iri abụọ na ise ga-akwụ naira puku anọ kwa ọnwa n'ime afọ atọ iji nweta igwe ji ike anyanwụ emepụta ọkụ latrik n'ụlọ ha.

   Ọ bụ onye ndụmọdụ osote onyeisiala maka mgbasa ozi bụ Laolu Akande kwuru nkea n'ụbọchị sụnde ma sị na gọọmentị ga-ebido itinye igwe ọkụ a n'izuụka na-abịa.

   Atụmatụ a ha kpọrọ Solar Power Naija ga-ebido n'ọnwa Disemba nke afọ 2020.

7. 30 Nọvemba 2020'Restructuring' abụghị ihe kacha mkpa ugbua - Chibuike Amaechi

   Mịnịsta njem bụ Rotimi Amaechi, ekwuola na ịhazigharị ọchịchị obodo Naịjirịa, nke a kpọrọ 'Restructuring' na Bekee, abụghị ya kacha mkpa ugbua.

   Amaechi kwuru nke a na mkparịtaụka ya ndị Channels TV n'abalị Sọnde.

   O kwuru na ihe kacha mkpa ugbua bụ iwulite ọnọdụ nchekwa site n'inye ndị mmadụ ọrụ nakwa ịkwụsị agụụ.

   "Ihe ka onyeisiala Muhammadu Buhari mkpa ugbua bụ etu ọ ga-esi kwụsị ọnọdụ enweghị ezi nchekwa dị na Naịjirịa."

   "Ihe na-akpata enweghị ezi nchekwa bụ maka na agụụ na-agụ ndị mmadụ n'ihi enweghị ọrụ."

   "Ọ bụ nke a kacha mkpa ugbua, ọ bụghị 'restructuring."

   Amaechi jụrụ ajụjụ ihe kpatara ndị mmadụ ji ekwu okwu nhazigharị ọchịchị naanị mgbe onye ugwu nọ n'ọchịchị.

   O jụrụ sị: "Obasanjọ chịrị Naịjirịa afọ asatọ, Goodluck Jonathan chịrị Naịjirịa afọ isii, gịnị mere na ha ahazigharịghị ọchịchị Naịjirịa? Gịnị kpatara o ji abụkarị mgbe onye ugwu nọ n'ọchịchị ka a na-ekwu okwu 'restructuring'?"

8. 30 Nọvemba 2020Unu asaala chi!

   Taa bụ ụbọchị ọma, soro anyị maka akụkọ niile ga-amasị gị

9. 29 Nọvemba 2020Igbo ndị ọma ka chi foo nu

   Anyị na-ekele unu maka ịnọnyere anyị taa.

10. 29 Nọvemba 2020Ndị uweojii na-enyocha dọkịta lekọtara Maradona ruo oge ọnwụ ya

    Ndị uweojii Ajentina na-enyocha ụlọọgwụ na ụlọ onye dọkịta na-agwọ Maradona bụ Leopoldo Luque.

    Ha sị na ha na-eme nke a iji maara ma o nwere etu dọkịta ahụ si leghara Maradona anya nke butere ọnwụ ya.

    Nwamadị a ụkwụ na-aghọ nkọ na bọọlụ nwụrụ ka ọ gbara afọ iri isii site n'obi nkolopu n'ụlọ ya dị na Buenos Aires dị n'Ajentina.

    Ụmụ Maradona ndị nwaanyị sị na chọrọ ịma ọgwụ a nọ na-enye nna ha.

    A wara Maradona ụbụrụ maka nkpụkọta ọbara na mbido ọnwa Nọvemba bụ nke gara nke ọma, ebe a na-achọ ịgwọ ọrịa ịṅụ mmanya.

    Ọ bụ onye ndu otu egwuregwu bọọlụ Ajentina mgbe ha mabutere Iko Mbaụwa n'afọ 1986, ebe o nyere goolu a kpọrọ "Hand of God" n'asọmpi ha ndị Ịngland gbara na-agba anọ nke ikpeazụ.

11. 29 Nọvemba 2020United Nations sị na ihe ruru mmadụ 110 ka e gburu na Borno Steetị

    Otu United Nations akatọọla ogbugbu e gburu ndị Boko Haram gburu ndị mmadụ ruru 110 na Borno Steetị ma merụọ ọtụtụ ahụ.

    Onye nchịkọta otu a na Naịjirịa bụ Edward Kallon kwuru nke a n'ụbọchị Sọnde dịka ọ na-akatọ ogbugbu ma kpọọ oku ka a tọhapụ ọtụtụ ndị a tọọrọ ngwa ngwa.

    "Anyị natara ozi na ọ dị ka a tọọrọ ọtụtụ ụmụnwaanyị. Ana m akpọ oku ka a tọhapụ ha ngwa ngwa." Ihe onye nchịkọta a kwuru.

    "Nwakpo a bụ ihe ike kachasị ọjọọ a na-eme megide ndị mmadụ n'afọ a. Ana m akpọ oku ka a nwụchie ndị mere ihe ma taa ha ahụhụ."

    Ọ sị na nwakpo na-egbu mmụọ na olileanya ndị mmadụ nwere isi n'ọnọdụ ọjọọ pụta bụ nke United Nations na-agba mbọ ya ịnapụta ha.

    "Otu United Nations na ndị ọzọ na-arụ ọrụ enyemaka na Borno Steetị na-ewe iwe maka nwakpo a," Ihe o kwuru.

    Cheta na akụkọ pụtaburu na ọ bụ ndị ọrụ ugbo mmadụ iri anọ na atọ ka e gburu n'ụtụtụ Satọde n'obodo Marrabati na Hammayya dị n'okpuruọchịchị Jere nke Steetị ahụ.

    A wakporo ndị ọrụ ugbo a n'ọrụ ugbo osikapa ka ha na-aghọrọ osikapa. Ụfọdụ n'ime ha ka ndị ekperima a kpọọrọ pụọ.

12. 29 Nọvemba 2020Onweghi APC ọbụla Gọvanọ Ikpeazu na-aga - Abia PDP

    Otu PDP nke Abịa Steetị ekwuola na o nweghi APC ọbụla Gọvanọ Okezie Ikpeazu ji azụ aga.

    Onye odeakwụkwọ pati a bụ Fabian Nwankwo kwuru nke a iji katọọ ihe onye chiburu Abia bụ orji Uzor Kalu kwuru na gọvanọ Ikpeazu chọrọ ịbanye APC.

    Kalu sị na gọvanọ Okezie kwetere ịgafeta n'APC dịka ọnọdụ o ji nwete mmeri n'ụlọikpe kachasị maka ntuliaka 2019.

    Mana Nwankwo ebubo a bụ iji megharịa ndị mmadụ anya ka ha ghara ịhụta ọrụ ọma niile gọvanọ Ikpeazu na-arụ n'Abia Steet.

    Ọ sị ikpe banyere ntuliaka n'ụlọikpe kachasị abụghị ihe a na-ekpe maka na onye ahụ chọrọ isi n'otu pati banye na nke ọzọ.

    Nwankwo gara n'ihu rịọ ndị Abia ka ha ghara ịṅa ntị n'okwu a ma lekwa sị anya n'ịkwado Gọvanọ Ikpeazu iji nwete oke ruru ha n'ọchịchị onye kwuo uche ya.

    Ozi kwukwara na PDP tụkwasịrị Gọvanọ Ikpeazu obi n'ọrụ ya ma kwuo na onweghi mgbe ọ na-atụle ịhapụ PDP.

13. 29 Nọvemba 2020E liela ndị ọrụ ugbo ahụ karịrị 40 e che na Boko Haram gburu

    Gọvanọ Borno Steetị Babagana Zulum du ndịisi obodo na ndị ọzọ gaa n'olili ndị ọrụ ugbo dị mmadụ 43 ahụ e chere na ndị Boko Haram gburu ụnyaahụ.

    Gọvanọ Zulum sị na ọ bụ ihe obi mgbawa na e gburu ndị a n'ime ọrụ ugbo ka ha na-arụ ọrụ.

    "Ndị anyị nọ n'ọnọdụ ọjọọ, ha nọ n'akụkụ abụọ dị njo, ha nọrọ n'ụlọ agụụ egbuo ha mana ha gaa n'ugbo ndị ekperima nwereike gbuo ha."

    "Ọ dị mwute na anyị na-arịọ ka gọọmentị etiti tinye ndị ntoroọbịa na ndị dinta n'ọrụ nchekwa iji chekwaa ndị ọrụ ugbo anyị."

    Ha gwara Gọvanọ na nyocha ka na-aga n'ihu ịchọpụta kpọkwem mmadụ ole nwụrụ na mwakpo a.

    Onyeisiala Muhammadu Buhari akatọọla mwakpo a site n'ọnụ onye enyemaka pụrụiche ya bụ Garba Shehu ma tie ezinaụlọ ndị e gburu aka n'obi.

14. 29 Nọvemba 2020Anyị azọtala ogbe Mekelle dị na Tigray - Praim minista Ethiopia

    Praịm mịnista Ethiopia bụ Abiy Ahmed ekwuola na ndị agha gọọmenti ya ewegharala ogbe Mekelle bụ isi obodo ugwu Tigray.

    O kwuru na ndị agha banyere ogbe ahụ n’agba nke ikpeazụ ọgụ ha na Tigray People's Liberation Front- mana a mabeghị akụkọ so okwu a makana ụzọ nkwụkọrịta ụka n’ogbe ahụ mechiri emechi ugbua.

    Mana otu Tigray People's Liberation Front kwuru na ha ga-alụgide ọgu iji zọọ isi ha ma kwụsị mwakpo ndị agha gọọmenti Ethiopia.

    Agha dapụtara n'etiti gọọmenti Ethiopia nakwa Tigray People's Liberation Front atala isi mmadụ narị kwụrụ narị.

15. 29 Nọvemba 2020Etu e si gba ogbunigwe n'ụlọụka nna gọvanọ Nyesom Wike

    Ndị uweojii nọ na Rivers steeti anwụchiela mmmadụ a na-eche na ha gbapụrụ ogbunigwe n’ụlọụka nna gọvanọ Nyeson Wike, Christian Universal Church International dị na streeti Azikiwe, Mile 2 Diobu area, Port Harcourt.

    Mgbe BBC gara ebe ahụ , ndị ọrụ nchekwa na-emenyu ogbunigwe nọ n’ụlọụka ahụ nakwa ndị ọrụ nchekwa ndị ọzọ juru ebe ahụ.

    Akụkọ kwuru na ya bụ ihe mere n’ụbọchị satọde, Nọvemba 28,2020 nke mere ka ndị ụlọụka ahụ gbapụ na-emerughị ahụ.

    Ọ bụ ndị ntoroọbịa bi n’ogbe ahụ nwụchiri ndị ntoroọbịa abụọ ha chere tụrụ ya bụ ogbunigwe tupu ndị uweojii awuchie.

    Ndị ọrụ nchekwa agbachiela ụzọ ebe ihe a mere nke bụ na ụgbọala maọbụ ndị ji ụkwụ aga anaghị esi ebe ahụ aga ugbua.

16. 29 Nọvemba 2020Ogbugbu ndị ọrụ ugbo osikapa 43 na Jere dị na Borno bụ ara ọpụpụ- Buhari

    Onyeisiala Naịjirịa bụ Muhammadu Buhari egosila nwute ya maka etu ndị omekome si gbu ndị ọrụ ugbo osikapa n’ugbo ha dị na Zabarmari, dị n’okpuruọchịchị Jere dị na Borno Steeti.

    O tikwara ndị bee ha aka n’obi ma na-ekwu na Naịjirịa enyela ndị agha ikike ka ha chetakwa ụmụ Naịjirịa nakwa ogige ha.

    Ọnụ na-ekwuru onyeisiala Buhari nke ukwu bụ Garba Shehu depụtara ozi a n'akara twitter ya.

    Akụkọ pụtara na ndị a na-eche na ha bụ Boko Haram gburu ndị ọrụ ugbo osikapa karịrị iri anọ n’ugbo ha.

    Kedụ ka ọdachị a si mee?

    Ndị ime obodo kwuru na ndị ọrụ ugbo ahụ egburu biara iwere ọsikapa ha karalanụ mgbe a wakporo ha.

    Akụkọ ahụ kwukwara na ndị wakporo ndị ọrụ ugbo a kere ha eriri ma na-ebepu ha isi n'ime ugbo dị na Maiduguri, isi obodo Borno.

    O nwebeghị otu poụtarala kwuo na ọ bụ ha mere mkpa mkpa a.

    Onye ntaakụkọ BBC kwuru na ndị Boko Haram na-awakpo ndị ọrụ ugbo makana ha na-eche na ọ bụ ha na-agwa ndị agha maka ebe nzuzo ha.

    N'ọnwa gara aga , Boko Haram gburu ndị ọrụ ugbo ruru iri abụọ na abụọ n'ugbo ha n'ebe abụọ.

17. 29 Nọvemba 2020Ndewo ndị be anyị!

    Anyi na-anabata unu taa. Nke onye chiri ya zere ooo!

18. 28 Nọvemba 2020'Ndị oji egbe egbuola ndị ọrụ ugbo karịrị 40'

    Akụkọ si Borno Steetị na mpaghara ugwu Naịjirịa na-ekwu na ndị e che na ga bụ ndị Boko Haram awakpoola ogige ọrụ ugbo ma gbuo ihe karịrị mmadụ 40.

    Nke a mere n'ụtụtụ Satọde na Kwashebe Zamarmari dị n'okpuruọchịchị Jere dịka ndị bi ebe ahụ gwara BBC.

    Ha sị na ndị a wakporo ndị ụrọ ugbo ka ha na-aghọrọ osikapa ha kụrụ n'ugbo. Akụkọ sị na e kere ndị ọrụ ugbo a eriri ma gbusie ha.

    O nwebeghi ihe ndịagha maọbụ ndị uweojii kwuru maka mwakpo a.

    Otu Boko Haram na ogbo ha ISWAP na-aga n'ihu n'ịwakpo mpaghara ugwu nke Naịjirịa na-agbanyeghi ihe gọọmentị na ndị ọrụ nchekwa na-ekwu na ike agwụwala ha.

19. 28 Nọvemba 2020Gịnị gburu nwata dị afọ iri na anọ n'ụlọakwụkwọ ya? Lee ihe anyị ma

    Nwanne nwata akwụkwọ Elihan dị n’ahịa Agric nke Ikorodu Legọs gwara BBC na o cheghi na nwanne ya nwụrụ ọnwụ chi ya.

    Akụkọ sị na soshal midia sị na Boluwatife Omeleja dị afọ iri na anọ dara n’ụlọakwụkwọ ha ma nwụọ n’ụbọchị Tọsde.

    Ridwan Oyewumi, gwara BBC na ọ bụ nwanne Bola sị na ebulatara ozu Boluwatife si n’ụlọakwụkwọ ha Elihans College, Ikorodu.

    Mana o teghi aka e lie ya dịka okpukperechi ndị alakụba si dị.

    Ridwan sị na nna ha kwuru na ọ gaghị ewepu okwu ọnwụ Bolu n’ụlọikpe mana ọ dị mkpa ka ha mara ihe gburu ya.

    Kedụ etu Bolu si nwụọ?

    Akụkọ sị na a kpọrọ nna Bolu kaọ bịa n’ụlọakwụkwọ na Bolu dara n’ala ma daa mba.

    Dịka nna ya na-aga, ha hụrụ onye nkuzi na nwata akwụkwọ bu Bolu n’ụgbọala mana ọ naghị emegharị ahụ.

    Mgbe ha bu ya gaa n’ụlọọgwụ, dọkịta kwuru na Bolu anwụọla

    Mana ndịisi ụlọakwụkwọ sị na nwata ahụ dara n’ala nwụọ mgbe ọ na-aza ajụjụ.

    Kedụ ihe mgbagwoju anya dị n’ọnwụ Bolu?

    BBC hụrụ ozi Ridwan depụtara na twitter na-ebo otu onye nkuzi a kpọrọ Emmanuel ebubo ikugbu nwanne ya Bolu.

    Ọ sị na nwanne Bolu ọzọ nọ n’ụlọakwụkwọ a bụ Lateef sị na ọ bụ Emmanuel kụrụ Bolu mere o ji daa na-amaghịzi onwe ya.

    Nwanne Bolu chọọrọ onye nkuzi Emmanuel gaa n’ụlọ ya ugboro abụọ mana ahụghị ya.

    BBC Igbo kpọrọ akara ekwentị Oduwole G.A bụ onye ezinaụlọ nyere akara ekwentị ya.

    Ọ sị na ọ nọ n’ụlọọrụ ndị uweojii na ọ gaghị azali ekwentị ya ugbua.

    Kedụ ihe ndị uweojii kwuru?

    BBC Yoruba kpọrọ onyeisi ndị uweojii n’Ikorodu mana ọ sị na ọ maghị ihe banyere akụkọa a.

    Ugbua amabeghi ihe gburu Bolu kpọmkwem, ọ ga-adị mma isi imi n’ala chọpụta.

    O nweghi ebe a hụrụ onye nkuzi Emmanuel a na-ebo ebubo ka ọ bịa zara ọnụ ya n’ọnwụ Bolu.

20. 28 Nọvemba 2020Govanọ Hope Uzodimma ekeela ndị ntoroọbịa 250 n'Imo oke oyibo maka nkwalite ọrụ ugbo

    Dịka ọ na-ekwu ka ndị ntoroọbịa na steeti ya malite itinye anya n'ọrụ ugbo, Gọvanọ Hope Uzodimma nke Imo steeti akwalitela ndị ntoroọbịa 250 oke oyibo n'ogige Bekee kpọrọ Naitional Agricultural Land Development Authority (NALDA).