Ntuliaka 2027: E yigharịala oge pati dị iche iche ga-eji nye Inec ndekọ aha ndị ga-azọrọ ha ọkwa

Mkpuchi Na Eme Ozugbo

Chinonso Ugorji, Michael Ngene, Michael Ilediagu, Marvelous Obomanu, Ikechukwu Kalu, Uche Akolisa, Uzoamaka Ewuzie, Adline Okere

1. 24 Maachị 2026Etu aka si kpara otu nwaanyị na ndị otu ya na-anapụ ndị mmadụ ọgbatumtum n'Anambra

   Ndị uweojii n'Anambra Steeti ejidela mmadụ ise a na-enyo enyo na ha so n’otu ndị omekome na-anapụ ndị mmadụ ọgbatumtum ha n'ike.

   N'ime ndị omekome ahụ gunyere otu nwaanyị e boro ebubo na ọ na-arata ndị a na-anapụ ọgbatumtum ha.

   Ọnụ na-ekwuchitere ndị uweojii n’Anambra Steeti bụ Tochukwu Ikenga, si na ndi uweojii ngalaba 'Rapid Response Squad' nọ n'Awkuzu nwchiri ndị a n’isi ụtụtụ Tuzdee na mpaghara Ihiala.

   Osi na ha nwetara otu egbe, ọgbatumtum atọ a na-enyo na ha bụ nke a napụrụ ndị mmadụ n'ohi, nakwa ihe ndị ọzọ.

   Ikenga sị na e jichiri ndị a n'isi ụtụtụ nke abalị iri abụọ na anọ n'ọnwa Maachị, afọ 2026.

   Ọ kpọrọ aha ha dịka Sunday Chukwudebele (gbara afọ iri abụọ na abụọ), Adaobi Udeze (dị afọ iri abụọ na isii), Chimezie Ifebi (dị afọ iri atọ na ise), Kelvin Chukwuejike (dị afọ iri abụọ na asatọ), na Uzi Chukwuejike Williams Umeh (dị afọ iri abụọ na isii).

   Ọ sị na nnyocha ha mere gosiri na nwaanyị ahụ a na-enyo enyo na-eme ka ọ bụ onye njem, mana rata ndị na-akwọ ọgbatumtum ebe ndị otu ya ndị ọzọ ga-anọ chere iwakpo ha ma zuo ha ohi.

   Kọmishọna ndị uwe ojii na steeti ahụ bu Ikioye Orutugu, jara ndị ọrụ ya ike etu ha si zaa oku mgbe a kpọrọ ha.

   Akụkọ ndị ọzọ ga-amasị gị:

   Tuberculosis symptoms: Etu m si rịa ọrịa ụkwaranta afọ iri na anọ na-achọpụtaghị - Janet

   "Ngwaaghịa m gbara ọkụ n'Onitsha Headbridge karịrị nde naịra iri abụọ na ise"

   Ihe m ma mere mgbe ndị 'City Boys' nwere ọgbakọ n'Owere - Obi Cubana

2. 24 Maachị 2026Ụgbọelu ndịagha mba Kolombịa akpọkaala ma gbuo mmadụ 66

   Ndị ọchịchị mba Kolombịa ekwuola na ụgbọelu ndịagha ụgbọelu kụkpọrọ na mpaghara ndịda mba ahụ ma gbuo mmadụ 66 ebe ọtụtụ ndị ọzọ merụrụ ahụ.

   Onyeisi ndịagha ụgbọelu bụ Ọchịagha Carlos Fernando Silva Rueda kwuru na ụgbọelu ahụ bu ndịagha 114 nakwa ndị ọrụ ụgbọelu 11 oge ụgbọelu ahụ kpọkara.

   Ụgbọelu C-130 Hercules nke mba Amerịka rụrụ, bụ nke e ji ebu ndịagha, kụkpọrọ na nso nso obodo Puerto Leguízamo, dị na mpaghara Putumayo.

   Ndị ọrụ gbatagbata ruru ebe ahụ, malitere ịgba mbọ ịzọpụta ndị ka dị ndụ dịka a na-eme nnyocha iji chọpụta ihe kpatara ọdachi ahụ.

   Mịnịsta nchekwa mba Kolombịa Pedro Sánchez kwuru na ụgbọelu ahụ nwere ihe mberede ngwa ngwa o si n’ọdọụgbọelu dị n’obodo Puerto Leguízamo ma kwuo na o bu ọtụtụ ndịagha.

   Ọ kọwara ọdachi dịka nke dị ezi mwute ma bụrụ ihe mgbawa obi.

   Akụkọ kwuru na ogbunigwe ụgbọelu bu tiwapụrụ oge njiji ahụ jiri nke mere ka ụgbọelu ahụ wuru ọkụ.

   Otu onye ọrụ ndịagha kwuru na ndịagha 58 nwụrụ ebe ndịagha ụgbọelu isii na ndị uweojii abụọ nwụkwara.

   Njinji a bụ nke a kwuru na ọ bụ kachasị njo kemgbe ọtụtụ afọ ndịagha ụgbọelu mba Kolombịa na-arụ ọrụ.

   Akụkọ ndị ọzọ ga-amasị gị:

   Tuberculosis symptoms: Etu m si rịa ọrịa ụkwaranta afọ iri na anọ na-achọpụtaghị - Janet

   "Ngwaaghịa m gbara ọkụ n'Onitsha Headbridge karịrị nde naịra iri abụọ na ise"

   Ihe m ma mere mgbe ndị 'City Boys' nwere ọgbakọ n'Owere - Obi Cubana

3. 24 Maachị 2026Ndị omekome agbaala ogbunigwe abụọ na mpaghara Kwara na Naịja steeti

   Ndị a na-enyo dịka ndị omekome tụrụ ogbunigwe n'abalị Monde n'okporoụzọ Luma dị n'okpuruọchịchị Borgu nke Naịja Steeti, ka ha chọrọ iwakpo ndị ọrụ nchekwa na-agara ọrụ ha na mpaghara ebe ahụ. Ihe a mere n'elekere 2 n'ụtụtụ.

   Ndị hụrụ ihe mere sị na ebe ndị o metụtara gụnyere obodo Luma, Babana na Agwara nke na-ahụkarị mwakpo na ọgbụgba ogbunigwe.

4. 24 Maachị 2026Ụtụtụ ọma Igbo ndị ọma

   Anyị ji obi aṅụrị anabata gị n'ọgbakọ BBC News Igbo taa bụ Tuzde 24 Maachị, 2026 ma bụrụkwa ahịa Nkwọ

   Taa ga-akwọtara gị ihe ọma.

   Gaa n'ihu sọnyere anyị maka akụkọ mere na Naịjirịa, n'Afrịka nakwa n'ụwa niile.

   Sonyekwara anyị na Facebook, Instagram nakwa WhatsApp chanelụ maka akụkọ ndị ahụ na-amasị gị.

   Ndewo!

5. 23 Maachị 2026Gọvanọ Soludo ahọpụtala nwaanyị mbụ ga-abụ odeakwụkwọ gọọmenti Anambra Steeti

   Gọvanọ Charles Soludo na-achị Anambra Steeti a họpụtala Chiamaka Nnake dịka odeakwụkwọ gọọmenti Anambra steeti.

   Ihe nke a pụtara bụ na Chiamaka Nnake gbara afọ 39, ga-abụ nwaanyị mbụ ga-eji ọkwa odeakwụkwọ gọọmenti Anmbra steeti.

   Chiamaka bụ onye Nwafia dị n’okpuru ọchịchị Njikoka steeti ahụ ma bụrụ onye maara ihe ekwe na-akụ n’ihe gbasara akụnaụba, ego nakwa nhazi.

   Tupu a nhọpụta a, Chiamaka bụbu kọmishọna na’ahụ maka ego mmefu na nhazi akụnaụba n’Anambra steeti ma rụkwa ọrụ dịka onyeisioche ụlọọrụ Solution Fun City Ltd.

   Ọ gụrụ akwụkwọ na mahadum Benson Idahosa University ma nweta nzere n’ụlọakwụkwọ Lagos Business School.

6. 23 Maachị 2026Onyeisiala Trump ekwuola na Amerịka na Ịran ga-enwe mkparịtaụka taa banyere ịkwụsị agha

   Onyeisiala Donald Trump mba Amerịka ekwuola na Amerịka na Ịran enweela mkparịtaụka banyere etu a ga-esi agha dị na mpaghara middle east.

   O kwuru na ọ bụ maka mkparịtaụka a mere o jiri nye iwu ka a kwụsịtụ mwakpo Amerịka na-eme n’ogige mmanụ agbidi mba Ịran nke mere ka ọnụahịa mmanụ ụgbọala daa.

   Mana mịnịstrị mba Ịran na-ahụ maka mmekọ mba ofesi gọnarịrị mkparịtaụka ahụ ma kwuo na ha n amba Amerịka enweghị mkparịtaụka ọbụla.

   N’agbanyeghị nke, Onyeisiala Trump kwuru na ọ bụ Steve Witkof na Jared Kushner nọchitere anya Amerịka na mkparịtaụka ahụ. O kwuru na ọ bụrụ na nkwụsịtụ ahụ gaa nkeọma, agha ahụ ga-akwụsị kpam kpam.

   Cheta na Onyeisiala Trump nọrọ n’ụbọchị Satọde nye Ịran awa iri anọ na asatọ ka ha mepee awara mmiri Hormuz ma kwuo na ọ ga-amalite ịwakpo ha ma ọ bụrụ na ha emeghị ihe o kwuru.

   Akụkọ ndị ọzọ ga-amasị:

   Ịran ọ ga-emerinwu mba Amerịka?

   Ndị uweojii Enugwu anwụchiela nkwaokoroọbịa dị afọ 24 maka ebubo idina nwaanyị dị ime n'ike

   City Boy Movement: Kedụ ndị a ma ama n'Ọwụwa Anyanwụ Naịjirịa so na ya?

7. 23 Maachị 2026Ụlọikpe atụọla onye bụbu nnukwu odekọ ego mịnịstrị nchekwa Naịjirịa mkpọrọ afọ 72.

   Ọkikpe James Omotosho nke Ụlọikpe Ukwu dị n’Abuja, atụọla onye bụbu nnukwu odekọ ego Naịjirịa bụ Chukwunyere Nwabuoku mkpọrọ afọ iri asaa na abụọ.

   N’ikpe ya, Ọkaikpe Omotosho kwuru na ụlọọrụ Economic and Financial Crimes Commission (EFCC) nwetere ihe akaebe dị okpụrụkpụ gosiri na ebubo nrụrụaka ahụ ha boro Nwabuoku bụ eziokwu.

   Ọkaikpe Omotosho tụrụ Nwabuoku mkpọrọ afọ asatọ n’otu n’otu n’ebubo itoolu ahụ EFCC boro ya.

   Ọkaikpe Omotosho gara n’ihu katọọ nrụrụaka ego ahụ Nwabuoku mere oge o ji ọkwa dịka onyeisi na-ahụ maka ego na mịnịstrị nchekwa Naịjirịa ma too EFCC maka mbọ ha gbara iwuchi ya ma kpụpụta ya n’ụlọikpe.

   Ụlọikpe kwuru na ọ bụ eziokwu na Nwabuoku weghachitere nde narị nde naịra abụọ (N200m) dịka nnyocha e mere si kwuo.

   Cheta na ụlọọrụ EFCC kpụpụrụ Nwabuoku n’ụlọikpe n’ọnwa Jenụwarị 15, 2025 maka ebubo itoolu gbadoro ụkwụ na nrụrụaka oge o ji ọkwa dịka onyeisi na-ahụ maka ego na mịnịstrị nchekwa Naịjirịa n-afọ 2019 ruo 2021.

   Akụkọ ndị ọzọ ga-amasị gị:

   Ndị uweojii Enugwu anwụchiela nkwaokoroọbịa dị afọ 24 maka ebubo idina nwaanyị dị ime n'ike

   Ndị ahịa akọwaala ihe kpatara ọkụ ọgbụgba n'ahịa Head Bridge Ọnịcha

   Emume a na-eji echeta ụmụagbọghọ na-amatabeghị nwoke n'Ebonyi steeti

8. 23 Maachị 2026Starmer ekwuola na enwebeghị ihe gosiri na mba Ịran chọrọ ịwakpo Briten

   Praịm mịnịsta mba Briten bụ Keir Starmer ekwuola na enweghị ihe gosiri na Iran chọrọ iwakpo ha.

   Starmer kwuru nke a dịka onyeisi ọrụ nchekwa mba Izrel kwuru na mba Iran enweela ngwaagha nwereike iru Lọndọn, Paris maọbụ Berlin”.

   E kwuru n’akara X na Iran atụọla ogbunigwe ruru Diego Garcia bụ ebe mba Amerịka ji mee ọdọ agha.

   Mana mgbe a jụrụ Starmer na mba Briten a nọ ebe Iran nwereike ịtụ ha ogbunigwe ka o kwuru na “enwebeghị ihe gosiri na Ịran chọrọ iwakpo anyị”.

   Ọ gara n’ihu kwuo n amba Briten na-agba mbọ etu agha Amerịka na Izrel na-alụ n’Iran ga-esi akwụsịtụ ma ghara ime ka Briten soro lụọ ya.

   Akụkọ ndị ọzọ ga-amasị gị:

   Ndị uweojii Enugwu anwụchiela nkwaokoroọbịa dị afọ 24 maka ebubo idina nwaanyị dị ime n'ike

   Ndị ahịa akọwaala ihe kpatara ọkụ ọgbụgba n'ahịa Head Bridge Ọnịcha

   Emume a na-eji echeta ụmụagbọghọ na-amatabeghị nwoke n'Ebonyi steeti

9. 23 Maachị 2026Ekpere m bụ ka ụmụnwaanyị ndị e metọrọ n’ozoro nata ọgwụgwọ - Oluremi Tinubu

   Nwunye onyeisiala Naịjirịa bụ Oluremi Tinubu akatọọla mmetọ e metọrọ ụmụnwaanyị n’obodo Ozoro dị n’okpuru ọchịchị ime obodo Isoko North na Delta Steeti, ma kpee ekpere ka ụmụnwaanyị ọnọdụ ahụ metụtara nata ọgwụgwọ nsọ.

   Nke a dị n’ozi Oluremi Tinubu binyere aka na ya n’ụbọchị Sọnde 22 Maachị 2026 ma mee ka o rute anyị aka.

   “Ahụla m onyonyoo si n’Ozoro dị n’okpuru ọchịchị ime obodo Isoko North na Delta Steeti, nke gosiri ebe a na-emetọ ụmụaka ndị nwaanyị, n’ihe kwesịrị ịbụ emume obodo”.

   “Dịka m nwere nnukwu ịhụnaanya maka ụbara omenala na ọdịnaala ndị mere ka anyị bụrụ mmadụ, ekwenyere m na o nweghị omenala ọbụla nyere nwoke ikike ịmetọ ugwu na nnwereonwe nke nwaanyị,” ka nwunye onyeisiala kwuru.

   Tinubu kelere ndị uweojii Naịjirịa maka ndị ha nwuchirila, ma gbaa ụlọọrụ niile kwesịrị ekwesị ume ka ha hụ na ndị niile aka ha dị n’arụ ahụ nwetara ntaramahụhụ kwesịịrị ha dịka ọ dị n’iwu.

   Ọ gwara ụmụnwaanyị niile ọnọdụ ahụ metụtara ka ha chọọ enyemaka ndị kwesịrị ekwesị maka ahụike na uche ha.

   Akụkọ ndị ọzọ ga-amasị gị:

   * Ndị uweojii Enugwu anwụchiela nkwaokoroọbịa dị afọ 24 maka ebubo idina nwaanyị dị ime n'ike

   * Ihe m ma mere mgbe ndị 'City Boys' nwere ọgbakọ n'Owere - Obi Cubana

   * Gịnị mere Ọkaikpe jiri gwa Ọkaiwu Sowore ka o sekpuru ala n'ime ụlọikpe?

   N’ọzọ yiri ya, Obieze Ozoro dị na Delta Steeti akatọọla omume ike, mmetọ, mmaja na mmekpaahụ e mesoro ụmụnwaanyị n’oge emume Alue-Do nke afọ 2026.

   N’ozi Anthony Ovietoboro bụ Ogbogbo Ibuka I, Ovie nke obodo Ozoro wepụtara n’ụbọchị Sọnde 22 Maachị 2026, Obieze ahụ kọwara mmetọ e metọrọ ụmụnwaanyị abụọ n’oge emume ahụ dịka ihe dị njọ, ihe na-ekweghị nnabata nakwa nke na-agbasoghị njirimara na ọdịnaala ndị Ozoro nakwa Isoko.

   O mere ka o doo anya na Obieze ahụ anaghị akwado ụdị mmetọ ọbụla, ma kwuo na ọ bụghị eziokwu na obodo Ozoro kwadoro omume ọjọọ ahụ, dịka e si ebugharị ya na soshal midịa.

   Ka ọ dị, ọnụ na-ekwuchitere ndị uweojii Delta Steeti bụ Bright Edafe ekwuola na aka ndị uweojii akparala mmadụ iri na isii a na-enyo enyo na aka ha dị na mmetọ ụmụnwaanyị n’oge emume Alue-Do.

   Oge ọ na-ekwu okwu n’ihe omume a haziri n’ụlọmgbasaozi Channels TV, Edafe kwuru na a kpụgaala ndị ahụ a nwuchiri n’isi ụlọọrụ ndị uweojii maka ime ha nnyocha miri emi.

   O kwukwara na ọ bụghị eziokwu na emume ahụ bụ “emume idina ụmụnwaanyị n’ike”, ma sị na o nwebeghị mkpesa ọbụla ha nwetara gbasara idina nwaanyị n’ike site n’emume ahụ.

10. 23 Maachị 2026Tinubu ekwela nkwa ịga n’ihu n’ọgụ ọ na-alụ megide enweghị nchekwa

    Onyeisiala Naịjirịa bụ Bola Tinubu ekwela nkwa na ya ga-agbasikwu mbọ ike n’agha a na-ebu megide enweghị nchekwa n’akụkụ mba ahụ dị iche iche.

    Tinubu kwuru nke a n’ụbọchị Sọnde 22 Maachị 2026 oge ọ nabatara Osote Onyeisiala bụ Kashim Shettima na ndị gọvanọ iri abụọ na atọ ndị ọzọ n’ụlọ ya dị na Legọs maka emume Eid el-Fitr.

    Ozi ọnụ na-ekwuchitere onyeisiala bụ Bayo Onanuga wepụtara kwuru na Onyeisiala sịrị na enweghị nchekwa bụ nsogbu kachasị echere Naịjirịa aka mgba n’oge ugbua.

    Tinubu gwara ndị gọvanọ ka ha na-elekọta ndị ụwa na-atụ n’ọnụ n’oge a ọkachasị dịka ọgbaaghara dị na mpaghara Middle East kawanyere njọ ma bute ihe isiike.

    Akụkọ ndị ọzọ ga-amasị gị:

    * Ihe m ma mere mgbe ndị 'City Boys' nwere ọgbakọ n'Owere - Obi Cubana

    * Ndị ahịa akọwaala ihe kpatara ọkụ ọgbụgba n'ahịa Head Bridge Ọnịcha

    * Chuck Norris na-eme ejije anwụọla ka ọ gbachara afọ 86

11. 23 Maachị 2026Igbo ndị ọma, ụnụ asaala chi?, Ka Afọ taa fọtara anyị ihe ọma ooo

    Anyị ji obi aṅụrị anabata gị n'ọgbakọ BBC News Igbo taa bụ Mọnde Afọ 23 Maachị, 2026.

    Gaa n'ihu sọnyere anyị maka akụkọ mere n'ala Igbo, na Naịjirịa, n'Afrịka nakwa n'ụwa dum gbaa gburugburu.

    Sonyekwara anyị na Facebook, Instagram nakwa WhatsApp chanelụ maka akụkọ ndị ahụ na-amasị gị.

    Ndewo!

12. 22 Maachị 2026Ụlọọrụ mmanụ gaasị ekwesịghị ịnọ nso ebe obibi - Gọvanọ Bassey Otu

    Gọvanọ Krọs Riva Steeti bụ Bassey Otu ekwuola na ụlọọrụ mmanụ gaasị ekwesịghị ịnọ nso ebe ndị mmadụ bi ma kwuo na ọchịchị ya ga-eme ihe gbasara ya.

    Otu kwuru nke a dịka ọ gara njem nleta n'obodo Edibe Edibe dị n’okpuru ọchịchị Calabar South ebe ihe gbawara n’otu ụlọọrụ mmanụ gaasị ma merụọ ọtụtụ ndị mmadụ ahụ.

    Gọvano Bassey Otu kọwara mgbawa ahụ mere n’ụbọchị Satọde abalị iri abụọ na otu nke ọnwa Maachị afọ 2026 dịka nnukwu mmebi, ma kwupụta na gọọmenti ya ga-akwụ ụgwọ ahụike n'efu maka ndị niile ihe metụtara ma tụlee ịkwụghachi ndị ihe onwuwe ha mebiri emebi.

    Gụọ akụkọ ndị ọzọ ebea:

    Ọ bụ ọkụ 'Natural Gas' ka ọ bụ nke sị na 'Pipe' na-agba n'Amaoji Nike, Enugwu Steeti?

    Clean Energy: Lee ihe gaasị ji kara nkụ mma iji si nri

13. 22 Maachị 2026NDLEA anwụchiela ndị chọrọ ibu ọgwụike gaa Yurop n'ọdọụgbọelu Legọs

    Ndị ụlọọrụ na-ebu agha megide ọgwụike na Naịjirịa bụ National Drug Law Enforcement Agency (NDLEA) anwụchiela ndi na-atụ mgbere ọgwụike chọrọ ịbu 'mkpụrụmmịrị' - e zoro n'ime igbe akwụkwọ, uwe oyi, na ude ahụ gaa mba Yurop.

    A nwuchiri ndị a n'ọdọụgbọelu Murtala Muhammed Airport dị n'Ikeja, nakwa n'otu ụlọọrụ nzipuozi dị na Legọs.

    E jidere mmadụ abụọ a na-enyo enyo na ha tụrụ mgbere ọgwụike a chọrọ ibuga na mba Ịtali.

    Otu n'ime ha bụ Friday Ehianuka dị afọ iri atọ na asaa, onye e jidere n'ụbọchị Fraịde, 20 Maachị 2026, oge ọ na-achọ ịga Rome dị na mba Ịtali.

    A nwuchịrị ya ka ọ na-achọ ịbanye n’ụgbọelu Ethiopian Airlines ebe o zoro mkpụrụ ọgwụike Tramadọl (225mg) ruru puku abụọ, narị isii na iri itoolu na asatọ (2,698) n'ime mkpọ ude ahụ dị n'ime akpa ya.

    Ehianuka bi na Milan, kwetara na a ga-akwụ ya ego Euro ma njem ibubata ọgwụike na mba Ịtali gara ya nke ọma.

    Akụkọ ndị ọzọ ga-amasị gị:

    * Ịran ọ ga-emerinwu mba Amerịka?

    * Iwu mba Senịgal dara CAF jiri kpebie ịnapụ ha iko AFCON 2025

14. 22 Maachị 2026Mgbawa gaasị emeruọla ụmụ mmadụ ahụ na Calabar

    Mgbawa mere n’otu ụlọọrụ mmanụ gaasị emeruọla ụmụ mmadụ ahụ na Calabar bụ isi obodo Krọs Riva Steeti.

    Mgbawa ahu butere nnukwu ụjọ ka o mere n’ụbọchị Satọde 21 Maachị 2026 n’ime obodo Edibe Edibe, dị n’okpuru ọchịchị Calabar South.

    Mgbawa ahụ mere n'otu ụlọọrụ mmanụ, merụrụ ọtụtụ mmadụ ahụ n'ụzọ dị iche iche, mebiekwa ụlọ na akụrụngwa ndị ọzọ dị ebe ahụ.

    Ndị hụrụ oge o mere kọwara na ha nụrụ mgbawa dara ụda, nakwa ọkụ na-agba n'akụkụ ụfọdụ ụlọọrụ gaasị ahụ nke mere ka ndị mmadu gbaa ọsọ ndụ.

    Ndị ọrụ gbatagbata na ndị nchekwa gbatara ọsịịsọ iji lekọta ọnọdụ ahụ ma nyere ndị merụrụ ahụ aka.

    A na-atụ anya na gọvanọ Krọs Riva Steeti bụ Bassey Otu ga-aga njem nleta ebe mgbawa ahụ mere iji hụ oke mmebi o butere.

    Akụkọ ndị ọzọ ga-amasị gị:

    * Ihe ndị i kwesịrị ịma maka ụgbọala CNG

    * Mwakpo ahụ e jiri gbuo ọtụtụ mmadụ na Borno Steeti dị ezi mwute – Gọvanọ Babagana Zulum

15. 22 Maachị 2026Amerịka ga-agbari ụlọọrụ ọkụ latrik mba Ịran ma ọ bụrụ na ha emepeghị ụzọ mmiri 'Strait of Hormuz' tupu ụbọchị abụọ agwụ - Trump

    Onyesịsịala mba Amerịka bu Donald Trump ekwuola na a ga-agbari ụlọọrụ ọkụ latrik mba Ịran ma ọ bụrụ na emepeghị ụzọ mmiri 'Strait of Hormuz' - nke dị oke mkpa n’ibupụ mmanụ ụgbọala n'ụwa niile, tupu ụbọchị abụọ agwụ.

    Na nzaghachi, Ịran kwuru na ha ga-agbarikwa akụrụngwa ọkụ latrik nke mba Amerịka dị na Middle East ma ọ bụrụ na a wakpoo ụlọọrụ ọkụ latrik ha.

    Ọtụtụ mmadụ merụrụ ahụ n'obodo Dimona dị na mba Izrel mgbe ogbunigwe agha Ịran dara n'akụkụ ebe a na-emepụta ngwaagha nuklia.

    Okwu Trump bịara mgbe o kwuchara sị: 'Ịran chọrọ ka anyị nwee nkwekọrịta, mana mụ onwe m achọghị'. Onyeisiala Amerịka kwuburu na ya na-atụle 'ibelata maọbụ kwụsị’ agha ọ na-alụso Ịran.

    Ka ọ dị ugbua, mba Izrel na-ekwu na ha tụrụ ogbunigwe n'isi obodo Ịran n'abalị ụnyaahụ. Saudi Arabia na United Arab Emirates kwukwara na ha gbochiri mwakpo ogbunigwe na 'droonu' bịara n'obodo ha.

    Ụlọọru BBC ghọtara na ndịagha Ịran gbara mbọ ịwakpo ụlọọrụ ndịagha United Kingdom na Amerịka dị na Diego Garcia n'abalị Tọzde banyere n’ụtụtụ Fraịde. Odeakwụkwọ mba ofesi na UK bụ Yvette Cooper, ekwuola na UK agaghị etinye aka n'agha ahụ.

    “Ịgbaghapụ ebe obibi gị dị njọ karịa agha n'onwe ya,” ka ndị Ịran na-akwa akwa arịrị kọọrọ BBC maka ihe ha na-ahụ n'agha ahu.

    Akụkọ ndị ọzọ ga-amasị gị:

    * Ụmụaka ji aka ha rụpụta 'smart car' n'Owere

    * Gịnị mere Ọkaikpe jiri gwa Ọkaiwu Sowore ka o sekpuru ala n'ime ụlọikpe?

    * E gbuola minista na-ahụ maka nnyopụta nchekwa n'Ịran, Esmail Khatib

16. 22 Maachị 2026Ọkụ agbariela mpaghara ahịa ‘Bridge Head Market’ Ọnịcha

    Ọkụ tiwapụrụ n’ime abalị agbariela mpaghara ebe a na-ere akụrụngwa e ji arụ ọrụ mmiri n’ahịa ‘Bridge Head’ Ọnịcha dị n’Anambra Steeti.

    Ọkụ ọgbụgba ahụ lara ọtụtụ ngwaahịa n’iyi ma bute ọnọdụ amaghị nke a ga-eme n’ahịa ahụ na-ekwo ekwo.

    Akụkọ kwuru na ahịa ahụ dị n’okporoụzọ si Ọnịcha gawa Ọka baara ọkụ n’abalị Fraịde 20 Maachị 2026 ma regide ruo n’ụzọ ụtụtụ Satọde 21 Maachị 2026.

    Ndị hụrụ oge o mere kwuru na ọkụ ahụ malitere mgbe ọ fọdụrụ ihe dịka nkeji ise ka ọ kụọ elekere iri na abụọ nke etiti abalị, ma jiri ọsịịsọ fesaa na mpaghara dị iche iche tupu a kwụsị ya, nke mere o jiri raa ndị mmadụ ahụ ibupụ ngwaahịa ha.

    Mbọ niile ndịahịa gbara iji nweeike bupụta ngwaahịa ha kụrụ afọ n’ala n’ihi etu ọkụ ahụ si agbasi ike.

    Ka ọ dị, Onyeisi okpuru ọchịchị ime obodo Ọnịcha Saụt bụ Emeka Orji kpọtara ndị mgbanyụọkụ n’ahịa ahụ, nke mere e ji nweeike gbanyụọ ọkụ ahụ.

    Akụkọ ndị ọzọ ga-amasị gị:

    * Obi jupụtara Gọvanọ Soludo n'aṅụrị mgbe ọ gara hụụ mmepe Onitsha Main Market

    * Mgbọ egbe tụtara mmadụ anọ - Onyeisioche Onitsha Main Market

    * Onitsha Main Market: Gọọmentị Anambara steeti amalitela ịkwatu ụlọ na ọdọahịa ndị adabanyeghị n'iwu

17. 22 Maachị 2026Igbo nwe mmadụ, ụnụ abọọla chi?, Ọfọ anyị bụ ka ụbọchị taa maara anyị mma ooo

    Anyị ji obi aṅụrị anabata gị n'ọgbakọ BBC News Igbo taa bụ SọndeOrie 22 Maachị, 2026.

    Gaa n'ihu sọnyere anyị maka akụkọ mere n'ala Igbo, na Naịjirịa, n'Afrịka nakwa n'ụwa dum gbaa gburugburu.

    Sonyekwara anyị na Facebook, Instagram nakwa WhatsApp chanelụ maka akụkọ ndị ahụ na-amasị gị.

    Ndewo!