Ana m akwado enyemaka ndịagha Amerịka na Naịjirịa – Ali Ndume

Mkpuchi Na Eme Ozugbo

Michael Ngene, Chinonso Ugorji, Uzoamaka Ewuzie, Ikechukwu Kalu, Michael Ilediagu, Adline Okere, Marvelous Obomanu, Uche Akolisa

1. 10 Febụwarị 2026Mmadụ 53 anwụọla mgbe ụgbọ epepe bu ndị Afrịka eme njem kpuru n'osimiri

   

   Ebe foto si, AFP via Getty Images

   Ụgbọ epepe bu mmadụ iri ise na ise gụnyere ụmụaka eku n’aka abụọ ekpuola n’osimiri dị n’akụkụ mba Libya dịka ngalaba na-ahụ maka njem nke otu United Nations si kwuo.

   Naanị ndị fọrọ ndụ n’ọdachi ahụ bụ ụmụnwaanyị Naịjirịa abụọ bụ ọrụ mba Libya zọpụtara n’ụbọchị Fraịde dịka ụlọọrụ International Organisation for Migration (IOM) si kwupụta na Mọnde.

   Ha kwuru na ụgbọ epepe ahụ bu ndị si mba Afrịka dị iche iche na-eme njem ịbanye mba ofesi.

   Ụgbọmmiri ahụ kpuru dịka oke ifufe osimiri kụrụ ya n’ihe dịka awa isii o si n’ọnụmmiri obodo al-Zawiya ndị na Libya pụọ njem.

   Ụlọọrụ IOM kwuru na ndị njem ruru narị ise anwụọla maọbụ fuo dịka ha na-agba mbọ isi na mba Libya gafee osimiri Mediterranean kamgbe afọ 2026 a.

   Libya abụrụla ebe ọtụtụ ndị njem a si mba Afrịka na-esi abanye mba ofesi Yurope kamgbe e gbuchara onyendu ha bụ Muammar Gaddafi n’afọ 2011.

   Ndị a fọrọ ndụ gwara ụlọọrụ IOM na ụgbọepepe ahụ hapụrụ obodo al-Zawiya n’elekere iri na otu nke abalị ma kpuo dịka ọtụtụ awa gachara.

   A mabeghi ihe mere akụkọ a jiri nọtee aka tupu ọ na-apụta ihe.

   Otu n’ime ndị a fọrọ ndụ kwuru na di ya nwụrụ n’ọdachi ahụ ebe onye nke ọzọ kwuru na ụmụaka ya abụọ nwụrụ.

   Ụlọọrụ IOM na-enye ụmụnwaanyị ndị a ọgwụwgọ na-egbughi oge.

   Akụkọ ndị ọzọ ga-amasị gị:

   Etu ọtụtụ ndị mbịarambịa si nwụọ n'obodo Melilla

   Ụmụafọ Naịjirịa tọrọ na Sudan adịla njikere ịlọta taa – Gọọmentị etiti

2. 10 Febụwarị 2026Ndị ojiegbe atọrọla mmadụ itoolu n'ụlọụka Katọlik dị na Benue Steeti

   

   Ebe foto si, Getty Images

   Ndị ojiegbe atọrọla ndị na-efe ofufe n’ụlọụka Katọlika dị n’obodo Ojije mpaghara Utonkon nke okpuruọchịchị Ado dị na Benue Steeti.

   A tọọrọ ndị a n’ụbọchị Sọnde oge ha na-eme ekpere ime abalị n’ime ụlọụka ha.

   Onye bụbu Kanselọ na-anọchiteanya Ukwuenyo wọọdụ dị n’okpuruọchịchị Ado bụ Emmanuel Udah kwuru na nke a mere n’ezie.

   Udah gwara ndị ụlọọrụ ntaakụkọ Channels TV n’ekwentịna nke a “bụ nkata a kpara ma mee megide ụlọụka, mgbe ndị na-efe ofufe nọ n’ala dị nsọ, ebe udo na nzereonwe, ma kwuo na ha enweghizi nchekwa”.

   O kwuru na ndị mmadụ bi na mpaghara ahụ nọzi na nnukwu ụjọ.

   Dịka ọ dị ugbua, o nwebeghi ihe ndị nchekwa kwuru banyere nke a

   Akụkọ ndị ọzọ ga-amasị gị:

   Mmadụ 38 a tọọrọ na Kwara Steeti alakwurula ezinaụlọ ha

   Gọọmenti emepeela ụlọakwụkwọ a tọọrọ ụmụakwụkwọ ha na Kebbi Steeti

3. 10 Febụwarị 2026Igbo ndị ọma e ji eme ọnụ, daalụ nụ ooo!

   Obi sara mbara ka anyị anabata gị n'ọgbakọ BBC News Igbo taa bụ Tuzde Febụwarị 10, 2026.

   Buru oche gị bịa nọnyere anyị n'ọgbakọ BBC News Igbo ebe a na-ewetere gị akụkọ gbara ọkpụrụkpụ si Naịjirịa, Afrịka na mbaụwa niile.

   Sonyekwara anyị na Facebook, Instagram nakwa Whatsapp Chanelụ anyị maka akụkọ, foto na vidio dị iche iche anyị ji bịa taa.

   Ndewo!

4. 9 Febụwarị 2026Ụlọikpe Mkpegharị dị n’Abuja akwadola nkwụsịtụ ọrụ nke Sinetọ Natasha

   

   Ebe foto si, Natasha Akpoti/ Facebook

   Ụlọikpe Mkpegharị dị n’Abuja akwadola nkwụsịtụ ọrụ nke Sinetọ Natasha Akpoti-Uduaghan, na-ekwu na nkwụsịtụ ọrụ ahụ e mebighị ikike omeiwu ya maọbụ ikike iwu kwadoro ya.

   N’agbanyeghị nke a, ụlọikpe ahụ gara n’ihu akagbuo ntaramahụhụ ụgwọ naịra nde ise (5m) e nyere Sinetọ Natasha n'ihi "mgbaghara ọchị" o nyere onyeisioche Sineti bụ Godswill Akpabio nke ụlọikpe ukwu kwuru na ọ bụ nnupụisi.

   Ya mere, ụlọikpe wepụrụ ikpe nlelị ahụ na ntaramahụhụ nde naịra ise nke e nyere Sinetọ Akpoti-Uduaghan.

   Justice Abba Muhammed kwadoro mkpebi na Onyeisioche sineti emebeghị ihe ọbụla site na ịjụ ka Sinetọ Natasha, onye na-anọghị n'oche e nyere ya n'oge nzukọ ndị omeiwu n’ọnwa Febụwarị 20, 2025, ohere ikwu okwu.

   O kwuru na iwu nyere Onyeisioche Sineti ikike ikenye ndị otu ya oche, na-agbakwụnye na a na-enye ndị omeiwu ohere ikwu okwu naanị site n’oche e nyere ha.

   Lee akụkọ ndị ọzọ ga-amasị gị

   * Ụlọikpe enweghị ikike ịṅụ ikpe Sịnetọ Natasha - Ọkaiwu Idahosa

   * Ụlọikpe akagbuola ebubo nkwutọ na nkatọ gọọmenti Naịjirịa boro Sinetọ Natasha Akpoti-Uduaghan

5. 9 Febụwarị 2026Ndị ojiegbe atọrọla mmadụ itoolu n’ime ụlọụka Katọlik na Benue Steeti

   

   Ebe foto si, Getty Images

   Ndị ojiegbe atọrọla mmadụ itoolu oge ha na-efe ofufe n’ụlọụka St John’s Catholic Church Ojije, Utonkon dị n’okpuru ọchịchị Ado na Benue Steeti.

   Ozi anyị nwetara kwuru na a tọọrọ mmadụ ndị ahụ n’ubọchị Sọnde, oge ha na-enwe ekpere abalị na mbaraezi ụlọụka ahụ.

   Onye bụbu omeiwu nọchitereanya Ukwuenyo Wọọdụ n’okpuru ọchịchị Ado bụ Emmanuel Udah kọwara nke a dịka eziokwu n’ụbọchị Mọnde 9 Febụwarị 2026.

   Akụkọ ndị ọzọ ga-amasị gị:

   * Ndị a na-enyo enyo maka ọnwụ Somtochukwu Maduagwu abịaghị ụlọikpe - Ọkaiwu

   * Ifunanya Nwangene: Ihe ikpeazụ nwa anyị gwara anyị - Nne na nna ya

   * Ndị ojiegbe gburu ọtụtụ ndị okpukperechi Alakụba maka na ha achọghị isonye ha - Gọvanọ Kwara Steeti

   N’otu aka ahụ, ọnụ na-ekwuru ndị uweojii Benue Steeti bụ Udeme Edet kwuru na nke a bụ ihe mere eme, dịka ọ sịrị na a tọọrọ ndị ụka itoolu.

   Ka ọ dị, o kwuru na Kọmịshọna ndị uweojii steeti ahụ bụ Ifeanyi Emenari ezipụla ndị ọrụ ha ka ha gbakọọrọ ndị nche aka iji chọta ndị ekperima ahụ ma napụta mmadụ niile ha tọọrọ.

6. 9 Febụwarị 2026‎Ndị a na-enyo enyo maka ọnwụ Somtochukwu Maduagwu abịaghị ụlọikpe - Ọkaiwu

   

   Ebe foto si, Arise News

   E nwere ihe ndọghachiazụ n’ikpe a na-ekpe ndị a na-enyo enyo na ha gburu onye ntaakụkọ Arise News bụ Somtochukwu Maduagwu na onye nche bụ Barnabas Danlami.

   Ihe ndọghachiazụ a dapụtara n’ụbọchị Mọnde 9 Febụwarị 2026 dịka ụlomkpọrọ kụrụ afọ n’ala ịkpọta ndị na-azara ọnụ ha n’ụlọikpe.

   ‎Ọ bụ oge a malitere ịnụrụ ikpe ahụ n’Ụlọikpe Ukwu nke Isi Obodo ka Ọkaiwu na-ekpe ikpe bụ Adama Musa gwara ụlọikpe na ndị a na-ekpe ikpe abịaghị n’agbanyeghị na ndị Ọkaiwu ha bịara.

   ‎Musa gosiri obi mgbawa dịka o kwuru na ndị ọrụ ụlọmkpọrọ sị na ha amaghị na ikpe ha bụ n’ụbọchị 9 Febụwarị, n’agbanyeghị na ndị akaebe anọ dị njikere ịgba ama.

   Akụkọ ndị ọzọ ga-amasị gị:

   * Ọtụtụ ndị ahịa ka na-erubeisi n'iwu ịnọrọ n'ụlọ n'Aba, Ọnịcha

   * Ihe ikpeazụ Ifunanya gwara anyị - Nne na nna ya

   * Ndị omeiwu Sineti ga-enwe ọgbakọ mberede dịka arụmụka ịgbasa mpụtara ntuliaka n'ịntanetị na-aga n'ihu

   Iji dozie ọnọdụ a, Ọkaikpe Mohammed Idris tinyeziri ikpe a n’ụbọchị Tuzde 10 Febụwarị 2026 ma gwa ndị akaebe ka ha gbaa mbọ bịa ụlọikpe iji hụ na e nwetara ikpe ziri ezi.

   Ọkaikpe Idris nyekwara iwu ka e mee ka ozi a ruo ndị mkpọrọ aka iji hụ na ha kpọtara ndị na-azara ọnụ ha n’ụlọikpe.

7. 9 Febụwarị 2026Ndị ntọrọ mmadụ atọrọla ụmụaka atọ n’Ebonyi steeti - Ndị uweojii

   

   Ebe foto si, Getty Images

   Ndị uweojii nke Ebonyi steeti ekwuola na a tọrọla ụmụaka atọ n’ụtụtụ ụbọchị Satọde abalị asaa nke ọnwa Febụwarị 2026 n'isi obodo Abakiliki.

   Dịka ọnụ na-ekwuchitere ndị uweojii n'Ebonyi steeti bụ Godswill Ukandu si kwuo, nke a mere na Nkwegu nke dị n'akụkụ ụlọ ndịagha nke dị n'okpuru ọchịchị Abakiliki.

   Ọ gara n’ihu kwuo na ndị ahụ a na-enyo enyo tọrọ otụ nwatakịrị nwoke dị afọ abụọ, ụmụntakịrị ụmụnwaanyị abụọ dị afọ anọ nakwa nke gbara afọ abụọ so na ndị a tọrọ.

   Ukandu sị na ndị uweojii ka na-eme nnyocha mana ndị ntọrọ mmadụ ahụ akpọbeghị n'ekwenti maọbụ kwuo ego nnapụta ole ha chọrọ ka ndị nwe ụmụaka ahụ kwụọ.

   Lee akụkọ ndị ọzọ ga-amasị gị ebe a:

   * Ebonyi state: Ihe mere steeti a ji bụrụ "elelịa nwa ite"

   *A nwuchiela otu n'ime ndị a na-enyo wakporo ma gbuo ...

   * E meela olili ozu ụmụafọ Ebonyi Steeti iri na otu e gburu n' ...

8. 9 Febụwarị 2026Onyeisiala Bola Ahmed Tinubu nabatara ndị nnọchiteanya US Africa Command (AFRICOM) n'AsoVilla

   

   Ebe foto si, State House NG

   Onyeisiala Bola Ahmed Tinubu na Sọnde ụbọchị 9 Febụwarị nabatara ndị nnọchiteanya sitere na United States Africa Command (AFRICOM), nke onye ọchịagha General Dagvin Anderson, duziri gaa na State House, n'Abuja.

   Onye enyemaka pụrụiche nye Onyeisiala Tinubu n'ihe gbasara mgbasa ozi bụ Dada Olusegun kwupụtara maka ọgbakọ a n'ọbaozi X.

   Cheta na n'izuụka gara aga ka ndị otu nchekwa si na mba Amerịka batara Naịjirịa.

   _____________________________________________________________

   Gukwo akụkọ ndị a:*Ifunanya Nwangene: Ụlọomeiwu Sịnetị enyela iwu ka e kesaa ọgwụ agwọ ọtịta n'ụlọọgwụNnamdi Kanu akagbuola Sit-at-home kpamkpam - Emma Powerful*SEDC ga-ewete mmepe zuru oke n'ala Igbo site ugbua ruo afọ 2050 - Osote Onyeisiala Naịjirịa

9. 9 Febụwarị 2026Pope Leo XIV ekwupụtala iwe ya maka mwakpo ndị omekome n'ebe dị icheiche na Naịjirịa

   

   Ebe foto si, Christopher Furlong/Getty Images

   Popu Leo XIV bụ onyeisi ụka Katọlik ekwupụtala iwe ya maka mwakpo ndị omekome na-eme n’ebe dị icheiche na Naịjirịa.

   Popu Leo mere nke a ma kwuo na ya na-atụ anya na ndị ọchịchị na Naịjirịa ga-agba mbọ chekwaa onye ọbụla.

   Popu Leo kpọrọ oku ka e tinye Naịjirịa n’ekpere.

   N’okwu ya “ọ bụ n'iwe na obi ntiwa ka m ji anụ na e gburu ndị mmadụ n’ime obodo dị icheiche na Naịjirịa”.

   Popu kwuru nke a dịka e kpechara ekpere Angelus nke ehihe.

   Cheta na kamgbe Jenuwarị na ndị omekome egbuola ọtụtụ ndị mmadụ na steeti dị icheiche na Naịjirịa ọkachasị na Kwara steeti.

   Popu kwuru sị ‘ihe na-emetụta ndị niile ọnọdụ ọgbaaghara nakwa mwakpo ndị na-enyi ọha egwu na-emetụta m”.

   _____________________________________________________________

   Lee akụkọ ndị ọzọ ga-amasị gị taata:

   Gịnị ga-eme ka ntutu isi gị too nke ọma maọbụ gbajie?Ụlọikpe enyela Briten iwu ka ha kwụọ ezinaụlọ ndị ọrụ koolu e gburu n'Enugwu n'afọ 1949 nde paụnds 420

   'Mụ na enyi m nwaanyị nwere mmekọ n'ụlọnkwari na Chaịna, mechaa chọpụta na e kesara ya n'intanet dịka ọ na-eme'Etu e si mee ngagharịiwe megide Iwu Ntuliaka ọhụrụ

   Etu e si mee ngagharịiwe megide Iwu Ntuliaka ọhụrụ

10. 9 Febụwarị 2026Ụmụ Igbo anyị ekelee unu

    Anyị ji obi aṅụrị anabata gị n'ọgbakọ BBC News Igbo taa bụ Monde Febụwarị 9, 2026.

    Biko, sonyere anyị dịka anyị na-ewetere gị akụkọ gbara ọkpụrụkpụ si Naịjirịa, Afrịka na mbaụwa niile.

    Sonyekwara anyị na Facebook, Instagram nakwa Whatsapp Chanelụ anyị maka akụkọ, foto na vidio dị iche iche anyị ji bịa taa.

    Nnọọ!

11. 8 Febụwarị 2026Morgan McSweeney agbaala arụkwaghịm dịka onyeisi ọrụ n’ọchịchị Keir Starmer

    

    Ebe foto si, PA Media

    Morgan McSweeney bụ onyeisi ọrụ n’ọchịchị Praịm Mịnịsta mba Briten bụ Keir Starmer agbaala arụkwaghịm.

    Morgan McSweeney gbara arụkwaghịm maka na ha ‘nyere nwoke aha ya bụ Peter Mandelson ọrụ’ na gọọmenti Starmer.

    N’akwụkwọ Morgan jiri gbaa arụkwaghịm ka o kwuru na “mkpebi anyị kpebiri nye Peter Mandelson ọrụ adịghị mma. O mebiri otu ndọrọndọrọ ọchịchị anyị, obodo anyị nakwa ntụkwasị obi e were na ndọrọ ndọrọ ọchịchị”.

    “Ọ bụ m nyere Praịm mịnịsta ndụmọdụ ka o nye nwa amadị ahụ ọrụ, nke a mere o ji bụrụ m ga-enwete ụta ọbụla banyere ya. Etu ọnọdụ si dị ugbua, naanị ihe m kwesiri ime bụ ịpụta n’akụkụ”.

    Mara na nke a na-eme dịka ebubo Jeffrey Epstein na-aga n’ihu ọkachasị nke metụtara Peter Mandelson bụ onye e nyere ọrụ na gọọmenti Praịm Mịnịsta mba Briten bụ Keir Starmer.

    Gụọ akụkọ ndị a:

    Ndị ekperima atọrọla ụkọchukwu Katọlik na ndị ọzọ na Kaduna Steeti

    Rọshịa ekwupụtala ndị aka ha dị n'egbe a gbara ọghịagha Vladimir Alexeyev

12. 8 Febụwarị 2026Rọshịa ekwupụtala ndị aka ha dị n'egbe a gbara ọghịagha Vladimir Alexeyev

    

    Ebe foto si, Russian Defence Ministry

    N’ihe dịka abịla abụọ garaaga ka onye ojiegbe wakporo Mosko bụ isi mba Rọshịa ma gbaa ọchịagha Vladimir Alexeyev egbe ugboro ugboro ma chọọ igbu ya.

    Mana e bugara ọchịagha Alexeyev n’ụlọọgwụ ebe a sị na ọ nọ na-anara ọgwụgwọ mana ọ ka nọ na nnukwu nsogbu ọ dị ndụ ọnwụ ka mma.

    Mba Rọshịa kwuputala aha onye ha na-enyo enyo gbara Vladimir Alexeyev egbe ahụ, ma sị na nwa amaala mba Rọshịa a mụrụ na mba Yukren bụ Lyubomir Korba mara ihe mere.

    Ụlọọrụ na-eme nnyocha nke mba Rọshịa kwuru na Lyubomir Korba batara na Mosko n’ihe dịka ọnwa disemba afọ garaaga, ma kwuo na ọ bụ ndị “Ukren nyere ya ọrụ ka ọ kpaa mkpamkpa ahụ”.

    Mana akụkọ kwuru na Alexeyev, dị afọ 64, na-enweta onwe ya ugbua n’ụlọọgwụ.

    Cheta na Alexeyev bụ onye nke abụọ na ngaraba ndịagha mba Rọshịa a na-akpọ “GRU”.

    Ọnụ na-ekwuru mba Rọshịa bụ Svetlana Petrenko kwuru na a gbara Vladimir Alexeyev egbe ugboro abụọ ma kwuo na na Korba gara mba United Arab Emirates (UAE) na nkenke awa ole ma ole a gbachara Alexeyev egbe ahụ.

    Akụkọ ndị ọzọ:

    Eze Charles mba Briten ga-anabata Onyeisiala Bola Tinubu na nwunye ya

    Ndị ekperima atọrọla ụkọchukwu Katọlik na ndị ọzọ na Kaduna Steeti

13. 8 Febụwarị 2026Eze Charles mba Briten ga-anabata Onyeisiala Bola Tinubu na nwunye ya

    

    Ebe foto si, BBC Sport

    Eze Charles mba Briten na nwunye ya bụ Ugoeze Camilla ga-anabata onyeisiala Naịjirịa bụ Bola Ahmed Tinubu na nwunye ya bụ Oluremi Tinubu n’obi eze Windsor Castle malite n’ụbọchị Wenezde 18 Maachị ruo Tọzde 19 Maachị 2026.

    Nke a bụ oge obi eze mba UK ga-anabata onyeisiala Naịjirịa ọbụla kemgbe afọ 37 gara aga. Onyeisiala Naịjirịa ikpeazụ obi eze Windsor Castle nabatara bụ Ọchịagha Ibrahim Babangida n’afọ 1989 oge ezenwaanyị Elizabeth nabatara ya na njem abalị anọ o mere n’UK.

    Ụdịrị njem a bụ nke na-enyere aka awụlite mmekọ dị n’etiti mba na mba.

    Nke a abụghị oge mbụ Onyeisiala Tinubu na-ezute Eze Charles kemgbe o meriri ntuliaka ọkwa onyeisiala e mere na Naịjirịa na 2023.

    Onyeisiala Tinubu na Eze Charles zutekwara onwe ha n’ọgbakọ COP28 Summit e mere na Dubai.

    Mana ugbua, ọ bụ Eze Charles zitere Onyeisiala Tinubu ozi ka ọ bịa mba UK ka ha nwee mkparịtaụka nke na-egosi ezi mmekọ dị n’etiti Naịjirịa na Briten.

    Ka ọ dị ugbua a, enweghị onye ma isiokwu mkparịtaụka Eze Charles na Onyeisiala Tinubu ga-enwe maọbụ atụmatụ njem ahu, mana ndị maara ihe ekwe na-akụ n’ihe gbasara mmekọ mba na mba, kwuru na ụfọdụ ihe na-emekarị n’ụdịrị nzukọ a bụ iri nri nakwa inwe mkparịtaụka ndọrọ ndọrọ dị iche iche.

    Akụkọ ndị ọzọ ga-amasị gị:

    Were vootu gị chụpụ Gọvanọ emeghị ọfụma - Uche Ekwunife

    Ndị Gọvanọ chọọ ịchụ ndị omekome ọsọ, ha ma ihe ha kwesịrị ime - Sullivan Chime

    Ifunanya Nwangene: Ụlọomeiwu Sịnetị enyela iwu ka e kesaa ọgwụ agwọ ọtịta n'ụlọọgwụ

14. 8 Febụwarị 2026Ndị ekperima atọrọla ụkọchukwu Katọlik na ndị ọzọ na Kaduna Steeti

    

    Ebe foto si, Catholic Diocese of Kafanchan - Cadiokaf

    Ndị ekperima atọrọla otu ụkọchukwu Katọlik na ọtụtụ ndị ọzọ ma gbuo ndị nchekwa atọ n’oge ha na-achọ ịzọpụta ndị a tọọrọ n’obodo Ningi dị n’okpuruọchịchị Kauru nke Kaduna Steeti.

    Ụlọụka Katọlik nke Dayọsiri Kafanchan kwupụtara nke a n’ozi ha wepụtara n’akara soshal midia ma kwuo na ọ bụ Fada Nathaniel Asuwaye nke ụlọụka Holy Trinity Katọlik dị n’obodo Karku bụ onye a tọọrọ, ya na ndị ọzọ.

    Onye chanselọ dayọsis ahụ bụ Fada Jacob Shanet kwuru na a tọọrọ Fada Asuwaye na mmadụ iri ndị ọzọ n’ihe dịka elekere nke atị nke isi ụtụtụ ụbọchị Satọde n’ụlọ ya dị n’ụlọụka ahụ.

    Akụkọ kwuru na ekperima ahụ gburu madụ atọ bụ ndị ọrụ nchekwa so na ndị e zipuru ka ha gaa zọpụta ndị a tọọrọ.

    Dịka ọ dị ugbua, o nwebeghi ozi si n’aka ndị ọrụ gọọmenti maọbụ ndị ọrụ nchekwa banyere mwakpo ahụ.

    Mana ndị ọrụ nchekwa ezigaala ndị otu ha iji chọọ ma zọpụta Fada na ndị ọzọ a tọọrọ.

    

    Ebe foto si, Catholic Diocese of Kafanchan - Cadiokaf

    Akụkọ ndị ọzọ ga-amasị gị:

    A tọhapụla Fada ụka Katọlịk a tọọrọ n’Ụmụnneochi nke Abịa steeti

    Fada Katọlik a bụkwa Dibịa anwụọla

15. 8 Febụwarị 2026Ndị mba Taịland na-eme ntuliaka iji họpụta ndị omeiwu

    

    Ebe foto si, Getty Images

    A na-eme ntuliaka na mba Taịland iji họpụta ndị omeiwu na mba ahụ nke na-enwe nsogbu ndọrọ ọchịchị kemgbe ọtụtụ afọ ugbua.

    Ọ bụ Praịm Mịnịsta Anutin Charnvirakul onye bụ onyendu nke atọ mba ahụ n’ime afọ atọ, chịkọrọ ntuliaka ahụ.

    Ka ọ dị ugbua, akụkọ kwuru na o doghị anya na pati ya bụ Bhumjaithai Pati maọbụ pati People's Pati ga-emeri ntuliaka.

    Mana nnukwu ajụjụ ọtụtụ mmadụ na-ajụ bụ, kedụ etu People’s Pati bụ pati ọhụrụ ga-esi chịkọba ọnọdụ ọchịchị n amba ahụ.

    Kemgbe ọtụtụ afọ, ọnọdụ akụnaụba mba Taịland kpụtụrụ afọ n’ala n’ihi oke ụgwọ mba ahụ ji, oke ọnụahịa ihe oriri nakwa ọtụtụ ihe ndị ọzọ.

    BBC chọpụtara na ọtụtụ ndị ntaakụkọ dị iche iche kwụrụ chịm na iweta ozi na ntuliaka ma kwuo na ọtụtụ ndị obodo amalitel ịpụta iji tụọ vootu ha.

    Akụkọ ndị ọzọ ga-amasị gị

    Nigeria election 2023: Ihe ndị na-azọ ọkwa kwuru na nke bụ eziokwu

    Nnamdi Kanu agbagharịala akwụkwọ n'ụlọikpe

    Ifunanya Nwangene: Ụlọomeiwu Sịnetị enyela iwu ka e kesaa ọgwụ agwọ ọtịta n'ụlọọgwụ

16. 8 Febụwarị 2026Ọ bụghị iwu na Gọvanọ ga-esonye chụọrọ Onyeisiala Tinubu nta nkwado na Rivas Steeti - Wike

    

    Ebe foto si, Bayo Onanuga/X

    Mịnịsta na-ahụ maka FCT bụ Nyesom Wike ekwuola na ọ bụghị iwu na Gọvanọ Rivas Steeti ga-akwado maọbụ soro n’achụmnta nkwado nye Onyeisiala Tinubu dịka ntuliaka afọ 2027 na-akpụdobe nso.

    Wike kwuru nke a n’oge emume nhiwe isiụlọọrụ ‘Renewed Hope Ambassadors’ (RHA) n’ụbọchị Satọde 7 Febụwarị, 2026 na Pọt Harcọt isiobodo Rivas Steeti.

    Wike kọwara na ọ dịghị n’iwu na Gọvanọ Steeti ahụ bụ Siminalayi Fubara ga-esonye chụọrọ Onyeisiala Tinubu nta nkwado ma kwuo na ha nwere nkwado ndị ụlọomeiwu Sineti nakwa ụlọ nnọchiteanya, ndị omeiwu steeti, ndịisioche okpuru ọchịchị, nakwa ndịisioche APC na PDP na steeti ahụ.

    O ji ohere ahụ too onyeisi RHA na steeti ahụ bụ Desmond Akewor maka mbọ ọ na-agba ma mee ka o doo anya na Rivas steeti ga-enye Onyeisiala Tinubu nkwado zuruoke na 2027.

    Cheta na Nyesom Wike na Gọvanọ Fubara na-enwe nsogbu kemgbe e mechara ntuliaka afọ 2023 nke mere ka Onyeisiala Tinubu manye ọchịchị nchere oge (emergency rule) nke nọrọ ọnwa isii na steeti n'afọ 2025.

17. 8 Febụwarị 2026Ọtụtụ ọme ndị ọma

    Anyị ji obi aṅụrị anabata gị n'ọgbakọ BBC News Igbo taa bụ Sọnde 8 Febụwarị, 2026.

    Biko, sonyere anyị dịka anyị na-ewetere gị akụkọ gbara ọkpụrụkpụ si Naịjirịa, Afrịka na mbaụwa niile.

    Sonyekwara anyị na Facebook, Instagram nakwa Whatsapp Chanelụ anyị maka akụkọ, foto na vidio dị iche iche anyị ji bịa taa.

    Nnọọ!