Chukwuma Soludo anatala asambodo mmeri ya n'Awka

Mkpuchi Na Eme Ozugbo

1. 14 Julaị 2024NDLEA ejichiela ọgwụike e zoro n’ime akpụkpọụkwụ na Lagos

   

   Ebe foto si, NDLEA/Facebook

   Ụlọọrụ na-ebu agha megide ịṅụ na ire ọgwụike bụ National Drug Law Enforcement Agency (NDLEA) ejichiela ogogo ọgwụike cocaine dị iche iche gụnyere tramadol, pentazocine, morphine sulphate, ketamine na ọtụtụ ndị ọzọ.

   Ozi ọnụ na-ekwuru NDLEA bụ Femi Babafemi wepụtara n’ọbaozi ụlọọrụ ahụ n’ụbọchị Sọnde 14 Julaị 2024, kọwara na e zoro ọgwụike ndị ahụ n’ime akpụkpọụkwụ, akwa na ngwongwo ndị ọzọ a chọrọ ịtụga mba Amerịka na Saịprọs.

   Dịka ozi ahụ siri kwuo, ọ bụ ndị ọrụ NDLEA nke ngalaba Directorate of Operations and Investigations (DOGI) nyopuru ọgwụike ndị ahụ na Legọs steeti.

   

   Ebe foto si, NDLEA/Facebook

   N’otu aka ahụ, ndị ọrụ NDLEA jichikwara ọgwụike loud arụ ya dị 440 gram nke e si Kanada atụbata Legọs steeti.

   Ka osiladị, ndị ọrụ NDLEA nọọrọ n’ụbọchị Wenezde 10 Julaị 2024 jichie otu ụgbọala na mpaghara Ewu Junction dị n’Okpuruọchịchị Esan Central oge ha nwetara kepukepu banyere ya.

   Oge ha mere nnyocha, ha chọpụtara na otu n’ime ndị njem nọ n’ime ụgbọala ahụ bụ Aminu Abdullahi gbara afọ iri atọ na abụọ (32) kwajuru ọgwụike tramadol dị puku atọ (3,000) n’ime iko custard.

   Mgbe a gbara ya ajụjụ, ọ sịrị na ya zụtara ọgwụike ndị ahụ n’Ọnịcha dị n’Anambra steeti ma buru ya na-aga Mararaba dị n’Abụja ebe ọ chọrọ ịga ree ya.

   

   Ebe foto si, NDLEA/Facebook

2. 13 Julaị 2024Nnwereonwe Okpuruọchịchị ga-ebupụrụ anyị ibu arụ - Ndị gọvanọ

3. 12 Julaị 2024Onyeisi ndị uweojii na Kenya agbaala arụkwaghịm

4. 12 Julaị 2024Ndị a ma ama na-azọ ọkwa Onyeisiala mba Ghana na ndị osote ha

5. 8 Julaị 2024Nnamdi Kanu ahapụghị okwu nnwereonwe Biafra, ọ ga-agba ụtụ n’ụlọmkpọrọ - Primate Ayodele

6. 8 Julaị 2024Afọ 25 ọchịchị onyekwuoucheya: Kedụ ebe ndị ji ọgbọ n'afọ 1999 nọ ugbua?

7. 6 Julaị 2024Ahọpụtala Massoud Pezeshkian dịka onyeisiala Iran

   

   Ebe foto si, Reuters

   Ahọpụtala Massoud Pezeshkian dịka onyeisiala ọhụrụ nke mba Ịran dịka o merichara Saeed Jalili nke otu Conservative.

   Okwe ntụliaka ahụ gosiri na Pezeshkian nwetara pasenti vootu iri ise na atọ na ụma atọ (53.3%) iji merie Jalili nwetara pasenti vootu iri anọ na anọ na ụma atọ (44.3%) nke ọnụọgụ vootu karịrị nde iri atọ (30m) a tụrụ na Ịran.

   A haziri ntụliaka ahụ dịka onye bụbu onyeisiala Iran bụ Ebrahim Raisi nwụrụ na mkpọka ụgbọelu helikọpta n’ime ọnwa Mee.

   Pezeshkian gbara afọ iri asaa na otu (71) bụụrụ dọkịta na-awa obi nakwa onye omeiwu Ịran tupu ahọpụta ya dịka onyeisiala.

   O kwere nkwa na ya ga-eweta udo na ịdịnootu ma hụkwa na Ịran kwụsịrị iwezuga onwe ya iche na mbaụwa.

8. 4 Julaị 2024Ihe mere ndị ndu Ọwụwa Anyanwụ ji akpọ oku ka a tọhapụ Nnamdi Kanu

9. 3 Julaị 2024Nsogbu nchekwa, Nnamdi Kanu na ihe ndị ọzọ Gọvanọ ọwụwa anyanwụ kpara na nzukọ ha

10. 30 Juun 2024Agha mba Sudan: Anyị na-eri nri naanị otu mgbe kwa ụbọchị

11. 29 Juun 2024Minimum wage: Ndị gọvanọ agaghị ekpebiri anyị ụgwọọnwa ha ga-akwụ - NLC

    

    Ebe foto si, NLC/X

    Otu jikọtara ndị ọrụ Naịjirịa bụ Nigeria Labour Congress (NLC) akatọọla okwu ahụ a sị ndị gọvanọ kwuru na steeti ọbụla kwesịrị ikpebi ego ole ha ga-akwụ dịka ụgwọọnwa opekatampe na steeti ha dị iche iche.

    Ndị otu ahụ kwupụtara nke a n’ụbọchị Fraịde 28 Juun 2024 n’ozi sitere n’aka onyeisi na-ahụ maka mgbasaozi ha bụ Benson Upah.

    Dịka Benson Upah siri kwuo, ụdị mkpebi dị etu ahụ bụ nke na-agba ụkwụ megide ebumnoobi e ji nabata ụgwọọnwa opekatampe na Naịjirịa.

    O kwukwara na ọ bụ ihe na-agba anyammiri na mgbe ụfọdụ gọọmenti na-ahụta ụgwọọnwa ndị ọrụ dịka ihe ọma a na-emere ha karịa ụgwọọrụ maka nrụsi ọrụ ike.

    NLC gbara onyeisiala Naịjirịa bụ Bola Tinubu ume ka ọ hara ikwe ka ụfọdụ ndị gọvanọ na-ebughị ọdịmma Naịjirịa n’obi mee ya ka o chefuo ihe gbasara ụgwọọnwa obibi ndụ o kwere ndị ọrụ na nkwa.

    Cheta na otu e hiwere maka iwepụta ụgwọọnwa opekatampe ọhụrụ kwupụtara puku naịra iri isii na abụọ (N62,000) dịka ụgwọọnwa opekatampe ọhụrụ ebe ndị ọrụ gbara isi akwara sị na ha chọrọ narị puku naịra abụọ na iri ise (N250,000).

12. 28 Juun 2024Tinubu enyela iwu ka ewepụta N155bn maka ịzụta ihe oriri gburugburu Naịjirịa

    

    Onyeisiala Naịjirịa bụ Ahmed Bola Tinubu enyela iwu ka azụta ma kesaa ihe oriri ruru otu narị ijeri naịra na iri ise na ise (N155bn) gburugburu Naịjirịa.

    Tinubu nyere iwu ahụ n’Abuja oge otu na-ahụ maka akụnaụba Naịjirịa bụ National Economic Council (NEC) nwere nzukọ n’ụbọchị Tọzde 27 Juun 2024.

    N’oge ha na-enwe nzukọ ahụ, onyeisiala gwara ndị gọvanọ ka ha gbakọta aka n’ọrụ iji mezuo ọchịchọ obi ndị ha na-achị.

    N’ozi ọnụ na-ekwuru Onyeisiala bụ Ajuri Ngelale tinyere aka na ya, Tinubu kwuru na ya dị nkwadobe ịrọpụta enyemaaka niile a chọrọ iji hụ na a napụtara ụmụafọ Naịjirịa n’ọnọdụ iheisiike.

    Ọzọ dị ka ibe ya bụkwa na Onyeisiala enyela nkwado ka e kesaara ezinaụlọ otu narị puku (100,000) na steeti ọbụla puku naịra iri ise (N50,000) ruo ọnwa atọ.

13. 27 Juun 2024Ndị ojiegbe agbagbuola mmadụ isii na mpaghara Garki dị n’Okigwe, Imo Steeti

14. 26 Juun 2024Kedụ ihe mmeri Trump ga-emere mbaụwa?

15. 22 Juun 2024A họpụtala onye ọkpaọchị dịka Osote Onyeisiala ọhụrụ nke mba Malawi

16. 21 Juun 2024Ụlọikpe akagbuola nkpọghachị a kpọghachịrị Muhammadu Sanusi n'ọkwa Emir Kano

17. 19 Juun 2024E duola Cyril Ramaphosa n’iyi ọrụ ugboro abụọ dịka Onyeisiala mba Saụt Afrịka

18. 18 Juun 2024Fubara edochiela ndịisioche okpuruọchịchị Rivas steeti

    

    Ebe foto si, Fubara/Instagram

    Aka na-achị Rivas steeti ekwuola okwu gbasara ndịisioche okpuruọchịchị steeti ahụ dịka ndị mmadụ na-enwe ụjọ.

    Gọvanọ steeti ahụ bụ Siminalayi Fubara nọọrọ n’ụtụtụ Tuzde 18 Juun 2024 nye iwu ka ndị isi ọrụ n’okpuruọchịchị niile e nwere na Rivas steeti malite ilekọta okpuruọchịchị ha n’otu n’otu.

    Fubara nyere iwu ahụ n’ozi ọ gbasaara ndị Rivas steeti dịka oge ọchịchị ndịisioche okpuruọchịchị steeti ahụ kụụrụ ọnụ n’ụbọchị Monde 17 Juun 2024.

    O mere mgbasaozi ahụ dịka ụfọdụ ndịisioche jụrụ ịhapụ ọkwa ha, bụ nke mere ka ụfọdụ ndị ntorobịa gaa nọchie n’ogige ụlọọrụ okpuruọchịchị dị iche iche.

    Ihe kpatara nke a bụ na ụfọdụ ndịisioche siri ọnwụ na ha agaghị ahapụ ọkwa ha n’ihi na onyeisioche ụlọomeiwu steeti ahụ bụ Martin Amaewhule megharịrị iwu hiwere okpuruọchịchị ma were ọnwa isii gbatịa oge ọrụ ha.

    Ka osiladị, ụlọikpe ukwu dị na Rivas steeti kachapụrụ iwu ahụ ma kwuo na iwu Naịjirịa akwadoghị ya.

    Ọkaikpe Daketima Kio kwupụtara iwu ọhụrụ ahụ nyere ohere ka a gbatịa oge ọrụ ndịisioche a kpọrọ ‘Local Government Law No. 2 of 2024’ dịka nke iwu na-akwadoghị.

19. 17 Juun 2024Atụmatụ ịzụtara Onyeisiala na osote ya ụgbọelu abụọ gosiri na gọọmenti enweghị mmetụta gbasara ndị ọ na-achị - Peter Obi

    

    Ebe foto si, Peter Obi/Instagram

    Onye jiri aha Labour Party zọọ ọkwa onyeisiala Naịjirịa na ntụliaka 2023 bụ Peter Obi akatọọla atụmatụ ụlọomeiwu na-eme ịzụtara Onyeisiala Bola Tinubu na osote ya bụ Kashim Shettima ụgbọelu ọhụrụ abụọ ma kwuo na nke ahụ gosiri na gọọmenti enweghị mmetụta gbasara ndị ha na-achị.

    Obi depụtara nke a n’akara ọbaozi X ya n’ụbọchị Mọnde 17 Juun 2024.

    O kwuru na mkpebi ahụ bụ nke na-ekwesịghị ekwesị n’ihi ogogo ihe isiike ndị Naịjirịa na-agabiga ugbua tinyere enweghị nchekwa, agụụ, ụbịam ọnụntụ na ikikere naịra na-agba ọnyụpa.

    Obi gara n’ihu kwuo na ihe gọọmenti kwesịrị ime ugbua bụ ịchọta ụzọ a ga-esi belata nhujuanya ụmụ mmadụ ma gboo nsogbu ha karịa ị dị na-ebi ndụ okomoko.

    Peter Obi depụtara ozi ahụ dịka kọmitii ụlọomeiwu nnọchiteanya na-ahụ maka nchekwa obodo gwara Gọọmenti Etiti ka ọ zụta ụgbọelu ọhụrụ abụọ maka Onyeisiala Bola Tinubu na Osote ya bụ Kashim Shettima n’ihi na ndị nke ochie ha nwere etozughị oke ife n’elu.

20. 16 Juun 2024Ndị uweojii anwụchiela ndị ohi 2 n’Anambra steeti, napụta ha egbe

    

    Ebe foto si, Anambra Police

    Ndị uweojii Anambra steeti anwụchiela mmadụ abụọ a na-achọ achọ n’ihi ebubo idina nwaanyị n’ike na iji egbe ezu ohi.

    Ọnụ na-ekwuru ndị uweojii Anambra steeti bụ Tochukwu Ikenga kwupụtara nke a n’ozi ọ wepụtara n’ụbọchị ụka Sọnde 16 Juun 2024.

    Dịka o siri kwuo, ọ bụ n’ụtụtụ Satọde 15 Juun 2024 ka ndị uweojii nwụchiri Chukwuma Diji gbara afọ iri atọ na ise (35) a na-etu Sympathy maọbụ Chi-boy na Michael Edochie gbara afọ iri atọ na otu (31) a na-etu Mikel.

    Ozi ahụ kọwara na Chukwuma Diji bụ nwaafọ Obinagu Umudun dị n’Abagana ebe Michael Edochie bụ nwaafọ Eziabunabu Abagana.

    

    Ebe foto si, Anambra Police

    A na-ebo ha ebubo ịkwaso otu nwaanyị nọ na di iko n’ike n’Obinagu Abagana tinyekwara nwaagbọghọ ha tikara ụlọ ya ma kwasoo ya na enyi ya nwaanyị iko n’ike ma werekwa egbe napụ ha ego.

    N’oge a nwụchiri ha, ndị uweojii napụtara ha egbe ntụ ‘double barrel’ abụọ na otu egbe ntụ ‘single barrel’ tinyekwara mgbọ egbe isii na otu ọgbaatumtum Q-link.

    Ka o siladị, kọmịshọna ndị uweojii Anambra steeti bụ Nnaghe Itam enyela iwu ka enyefee ha n’aka ngalaba ndị uweojii Criminal Investigation Department maka ilebaara ha anya.

    

    Ebe foto si, Anambra Police