Batanci: An dakatar da Francesco Magnanelli da Matteo Scozzarella

An dakatar da wasu 'yan wasan Italiya wasa daya sakamakon samun su da laifin sabo lokacin da suke fafatawa a gasar Seria A.

An nuno dan wasan Sassuolo Francesco Magnanelli da kuma dan wasan Parma Matteo Scozzarella a talabijin suna furta kalaman sabo a wurare daban-daban.

Akwai tsauraran matakai kan duk wanda aka samu yana shagube da sunan Allah a Italiya.

Ko a shekarar 2010 ma hukumar kwallon kafar kasar ta ladabtar da 'yan wasan da aka samu da aikata laifin.

A shekarar 2018 an dakatar da dan wasan tsakiyar Udinese Rolando Mandragora, sakamakon aikata makamancin laifin.