Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Wannan shafi ne da ke kawo muku labarai da rahotanni kai tsaye kan cefanen 'yan kwallo da labarin wasanni.
Mohammed Abdu
Sky Sports ta wallafa cewar sabuwar kungiyar da za ta buga Premier League a bana, Nottingham Forest ta kusan daukar Neco Williams kan fam miliyan 16.
Dan wasan tawagar Wales, wanda ya yi wasa 33 a dukkan karawa a Liverpool tun bayan da ya fara yi mata tamaula a Oktoban 2019 ya buga rabin kakar da ta wuce a Fulham a wasannin aro.
Franck Kessie a Barcelona…
Kungiyar Belgium, Anderlecht na son daukar aron dan kwallon Wolverhampton, Fabio Silva.
Silva ya koma Wolves kan fam miliyan 35.6 daga Porto a 2020 a matakin wanda ta dauka mafi tsada a kungiyar.
Anderlecht ta ce za ta biya albashin Silva, hakan zai ba ta damar daukar aron dan wasan.
Tawagar Najeriya ta mata ta Super Falcons za ta kara da Bostwana a wasa na biyu a rukuni na uku a gasar kwallon mata a Morocco.
Falcon tana mataki na uku a rukunin ba tare da maki ba, ita kuwa Botswana ita ke jan ragama da maki uku, bayan da ta doke Burundi da ci 4-2.
Ita kuwa Najeriya rashin nasara ta yi da ci 2-1 a wasan farko da ta yi da Afirka ta Kudu.
Tawagar kwallon kafa ta Ingila ta fara gasar kwallon kafa ta mata ta cin kofin nahiyar Turai ta Euro 2022 da kafar dama, bayan da ta doke Austria 1-0 ranar Laraba a Old Trafford.
Everton ta ce za ta yi wa Anthony Gordon tayin sabuwar kwantiragi ga dan wasanta na gefe mai shekara 21 domin ta kori Newcastle United wadda ke kokarin raba shi da Goodison Park. (Times - subscription required)
Kungiyar Everton, wadda masoyanta ke kira Toffees ta kuma ce ba ta da niyyar sayar da Dominic Calvert-Lewin, dan wasanta na gaba mai shekara 25, kuma shi ma za ta yi masa sabon tayi. (Mirror)
Arsenal kuwa so take ta yi waje rod da wasu 'yan wasanta bakwai - ciki har da Nicolas Pepe, dan kasar Ivory Coast kuma dan wasanta na gefe mai shekara 27, da golanta Bernd Leno - domin ta sami kudaden sayo wasu sababbin 'yan wasan. (Sun)
Diego Carlos na ban kwana da Sevilla a kokarin da yake na komawa Aston Villa.
A makon nan Barcelona ta sanar da daukar Andreas Christensen daga Chelsea, bayan da kwantiraginsa ya kare a Stamford Bridge a karshen watan Yuni.
Christensen ya amince da kunshin yarjejeniyar kaka hudu da dora farashin yuro miliyan 500 ga duk kungiyar da ke son daukarsa, idan wa'adinsa bai kare ba a Camp Nou.
Christensen dan kwallon tawagar Denmark ya zama na biyu da Barca ta dauka a bana, bayan Franck Kessie da ta sanar da daukarsa ranar Litinin daga AC Milan.
Dan kwallon ya koma Chelsea daga Brondby a 2012, wanda kaka biyu tsakani ya fara taka mata leda a matakin kwararren dan wasa a Blues.
Dan kwallon tawagar Japan, Kaoru Mitoma ya sake komawa Brighton, bayan da ya buga wasannin aro a kungiyar Belgium, Royal Union Saint-Gilloise.
Mai shekara 25,ya koma kungiyar kan kwantiragin kaka hudu daga kungiyar Japan, Kawasaki Frontale a watan Agusta, daga nan ta bayar da aronsa.
Dan wasan Manchester City, Raheem Sterling ya amince da kunshin yarjejeniyar da Chelsea ta gabatar masa, domin ya koma Stamford Bridge.
Mai shekara 27 yana da sauran kaka daya kwantiraginsa ya kare a Etihad, wanda kungiyoyi da dama ke zawarcinsa.
City ta dauki dan wasan daga Liverpool kan fam miliyan 49 a 2015, wanda ya ci wa City kwallo 131 a karawa 339 da ya yi mata.
Idan aka kammala cinikin, Sterling wanda ya buga wa tawagar Ingila wasa 77, zai zama na farko da Chelsea ta saya, tun bayan da wasu attajirai suka mallaki kungiyar karkashin Todd Boehly a bana.
Idris Bambarewa ya tsara wasannin damben gargajiya da za a yi tun daga ranar Asabar da ta Lahadi don bikin babbar Sallah.
Bayan kwana 450 rabon da ta buga babbar gasar tamula, tawagar mata ta Ireland ta Arewa za ta kafa tarhi a yammacin nan.
Bayan da aka yi wa tawagar kwaskwarima a 2004 za ta ci gaba da fafatawa, wadda tun farko aka ruguza tawagar.
Karon farko da za ta buga babbar gasar tamaula ta mata a tarihi.
Kungiyar Chelsea ta fitar da salon sabbin kayan da za ta saka a kakar 2022/23 a wasannin da za ta buga a Stamford Bridge.
Ita kuwa West Ham ta nuna kayan da za ta yi amfani da su a wasannin da za ta buga a waje a kakar bana.
An kafa tarihin yawan 'yan kallo da suka shiga sitadiya a gasar nahiyar Turai a kwallon mata a wasan da Ingila ta doke Austria 1-0 ranar Laraba a wasan bikin bude gasar ta Euro 2022.
Babban labarin cinikin Raheem Sterling zuwa Chelsea shi ne ya mamaye labarin jaridu a ranar Alhamis.
Mirror ta ce Thomas Tuchel ya taka rawar gani, bayan tattaunawa da dan wasan tawagar Ingila kan rawar da zai taka a Chelsea da ta kai ya amince zai koma Stamford Bridge.