Rikicin Ukraine: Putin ya amince da 'yancin kai na yankunan Ukraine biyu

Rahoto kai-tsaye

Awwal Ahmad Janyau and Umar Mikail

1. 21 Fabrairu 2022Zanga-zanga ta ɓarke a Morocco kan adawa da tsadar kayayyakin masarufi

   Zanga-zanga ta ɓarke a biranen Morocco kan adawa da tsadar kayayyakin masarufi yayin da kuma ƴan ƙasar ke tuna shekara 11 da aka cika da ƙaddamar da fafutikar neman sauye-sauye a ƙasar.

   A ranar 20 ga watan Fabrairu aka ƙaddamar da fafutikar neman sauyi da adawa da rashawa a 2011 da ake zanga-zangar ƙasashen Larabawa.

   Daruruwan mutane ne suka fito zanga-zanga a ranar Lahadi a birnin Casablanca, suna neman a saki fursunonin siyasa da ake tsare da su.

   Masu zanga-zangar sun ce babu ɗaya daga cikin buƙatunsu da aka cimma a tsawon shekaru 11.

   An kuma gudanar da zanga-zanga a biranen Rabat da Tangiers.

   Fari da annobar korona sun yi tasiri ga taɓarɓarewar tattalin arzikin Morocco.

2. 21 Fabrairu 2022ASUU za ta gana da gwamnatin tarayya

   Shugabannin ƙungiyar jami’o’in Najeriya ASUU ana sa ran za su gana a yau litinin kafin gana da gwamnatin tarayya a cikin makon nan.

   A makon da ya gabata ne ASUU ta sanar da tsunduma cikin yajin aikin gargaɗi na tsawon wata ɗaya saboda rashin cimma buƙatun da suka daɗe suna nema daga gwamnatin tarayya.

   Rahotanni sun ce tuni majalisar zartarwar ƙungiyar ne za su tattauna a matsayin share fagen ganawarsu da wakilan gwamnatin tarayya.

3. 21 Fabrairu 2022Biden ya amince ya gana da Putin

   Shugaba Joe Biden ya amince da shawarar Faransa na ganawa da Vladimir Putin muddin Rasha ba ta mamaye Ukraine ba.

   Wannan na zuwa ne kwana guda bayan yunkuri na karshe da shugaban Faransa Emmanuel Macron ya yi na yayayyafawa wutar rikicin ruwa.

   Sakataren harkokin wajen Amurka Antony Blinken, ya ce a shirye Amurka ta ke ta yi duk abun da ya dace, don ganin ba a kai ga ba wa hammata iska ba.

   Ya ce shugaba Biden ya fadi karara cewa a shirye yake ya gana da shugaba Putin a kowane lokaci, a kowanne irin tsari, idan har hakan zai hana yaki.

   A wata hira da BBC, Firaministan Birtaniya Boris Johnson ya ce Putin na son haddasa yaki a Turai idan har ya mamaye Ukraine.

4. 21 Fabrairu 2022Maraba

   Muna maku maraba da kasancewa da mu a wannan shafin inda za mu kawo maku labarai da rahotanni kai tsaye kan abubuwan da ke faruwa a Najeriya da sauran sassan duniya.

   Sai ku kasance da mu.