An gano akwatinan gawa da aka binne shekara 2,500

Rahoto kai-tsaye

Umar Mikail

1. 3 Oktoba 2020'Duk ɗalibin sakandare a Jihar Zamfara sai ya yi noma a aikace'

   Gwamnatin Jihar Zamfara da ke arewacin Najeriya ta umarci dukkanin makarantun sakandare a jihar da su saka maudu'in kimiyyar noma wato Agricultural Science a cikin manhajarsu.

   Kwamishinan Ilimi na Jihar Dr Ibrahim Abdullahi ne ya bayyana hakan a Gusau, babban birnin jihar, ranar Juma'a yayin da yake ƙaddamar da wani shirin horon aikin gona ga malamai mai laƙabin School Farm Programme and E-Quality Assurance Training.

   Za a gudanar da shirin ne a ƙarƙashin jagorancin hukumar ilimin bai-ɗaya ta jihar mai suna State Universal Basic Education Board (ZSUBEB).

   "Gwamna Matawalle ya umarce ni da na tabbatar cewa kowacce makaranta ta saka ilimin aikin gona a manhajarta," in ji Ibrahim Abdullahi a cikin rahoton kamfanin dillancin labarai na NAN.

   Ya ci gaba da cewa: "Mun ɗauki wannan mataki ne domin bai wa ɗalibai horo kan harkokin noma domin su samu damar zama ƙwararru kan noman a nan gaba.

   "Za mu tabbatar da cewa an bi umarnin gwamna, za mu tabbatar cewa kowacce makaranta na aiwatar nazarin noma a aikace. Wajibi ne a bai wa kowanne ɗalibi iri ya shuka na aƙalla mita biyu."

2. 3 Oktoba 2020Jogaran kamfe na Trump ya kamu da korona

   Bill Stepien, jagoran kamfe na Donald Trump, ya zama makusancin shugaban na baya-bayan nan da ya kamu da cutar korona.

   An faɗa wa Stepien sakamakon gwajin da aka yi masa a daren Juma'a "sannan kuma yana fuskantar ƙananan alamun cutar," a cewar jaridar Politico.

   Rahotanni sun ce daga yanzu zai fara aiki daga gida.

3. 3 Oktoba 2020Maraba da shigowa shafin labarai kai-tsaye

   'Yan amanar BBC da kuma baƙi, barkanku da safiyar Asabar da kuma maraba da shigowa shafin da zai ba ku damar sanin yadda duniya ke ciki - musamman a Najeriya da Nijar da Kamaru da Ghana.

   Umar Mikail ke cewa ku biyo mu daga yanzu zuwa daren yau.