Mai cutar korona ta haihu a Legas

Rahoto kai-tsaye

Umar Mikail, Mustapha Musa Kaita and Awwal Ahmad Janyau

1. 16 Mayu 2020An saka ranar dawo da tafiye-tafiye a Italiya

   Gwamnatin Italiya ta sanya hannu kan wani daftarin doka da zai bai wa 'yan ƙasar damar soma tafiye-tafiye daga ciki da wajenta daga ranar 3 ga watan Yuni, yayin da take ƙoƙarin sassauta matakan kulle kan annobar korona.

   Kazalika za ta ba da damar zirga-zirga tsakanin yankuna - wanda a yanzu aka tsaurara haramcinsa - daga dai wannan rana.

   Wannan yunƙuri yana da mahimmancin gaske ga ƙasar da ke yunƙurin sake buɗe harkokin kasuwancinta bayan kusan wata biyu komai da komai yana rufe.

   Fiye da mutum 31,600 ne suka mutu a Italiya sakamakon annobar korona, ƙasa ta uku kenan bayan Amurka da Birtaniya a yawan waɗanda cutar ta yi ajalinsu.

2. 16 Mayu 2020Fiye da miliyan huɗu da rabi sun kamu da korona a duniya

   Ya zuwa safiyar Asabar, alƙaluma sun nuna cewa sama da mutum miliyan huɗu da rabi ne suka harbu da cutar korona a duniya baki ɗaya tun bayan ɓarkewarta a cikin watan Disamban 2019.

   Jami'ar Johns Hopkins mai bibiyar sawun yaɗuwar cutar sun rawaito cewa mutum miliyan huɗu da dubu dari biyar da arba'in da uku da ɗari tara da saba'in da biyar (4,543,975) ne suke kamu da cutar.

   Daga cikin wannan adadi, mutum dubu ɗari uku da bakwai da ɗari bakwai da talatin da shida (307,736) sun riga mu gidan gaskiya.

   Har wa yau, mutum miliyan ɗaya da dubu ɗari shida da talatin da bakwai da ɗari shida da tamanin da huɗu (1,637,684) sun warke sarai daga cutar.

3. 16 Mayu 2020Abin da alarammomi ke ji game da kwashe almajirai a Kano

   Kungiyar mahaddata Kur'ani ta Najeriya ta bayyana bacin rai kan ci gaba da yin dirar mikiya kan makarantun allo cikin dare ana kwashe almajirai tare da killace su a Kano.

   Gwamnati ta ce tana ci gaba da 'killace almajirai fiye da 2000 a wasu sassan jihar, a yunkurinta na dakile yaduwar annobar korona'. Ta ce shawarar kwashe almajiran ta daukacin jihohin arewa ne.

   Malaman makarantun allon dai na nuna cewa gwamnati ba ta yi shawara ko tuntuba da su ba, ballantana ma a yi batun ba su wani wa'adi kafin fara wannan aiki na kwashe almajiran.

   Yayin zantawa ta wayar tarho da BBC, babban magatakardan kungiyar, Gwani Sanusi Abubakar ya ce suna kira na fahimta ga Gwamna Ganduje da lallai-lallai ya dakatar... kuma ya yi gyara sannan a saki almajiran da ake tsare da su.

   Ga cikakken rahoton a nan

4. 16 Mayu 2020Tun da yanzu muka shigo, ga matashiya...

   • Hukumar dakile cutuka masu yaduwa a Najeriya ta ce sun sake samun mutum 288 da suka kamu da cutar korona a kasar ranar Juma'a. Yanzu yawan masu cutar 5,445 a kasar
   • Ta kuma ce masu cutar 140 ne suka warke a ranar, abin da ya kawo yawan wadanda suka warke daga annobar korona kuma aka sallame su zuwa 1,320
   • A Legas, jihar da ta fi yawan masu fama da korona, sabbin alkaluma sun nuna an sake samun mutum 179 da suka kamu
   • A jihar Kaduna an sami wasu mutum 20 da suka kamu da cutar, inda jihohin Katsina da Jigawa kuma ke bi ma ta da mutum 15 a kowace jiha
   • Haka kuma, mutum 8 sun sake kamuwa da cutar a Kano, zuwa yanzu akwai masu korona 761. Ita ma makwabciyarta Jigawa masu cutar 15 sun karu, abin da ya sa duka-duka take da adadin 191
   • Haka zalika, alkaluman sun nuna cewa mutum hudu sun sake mutuwa cikin sa'a 24 da ta wuce sakamakon korona. Yanzu yawan mutanen da cutar ta kashe a hukumance 171

5. 16 Mayu 2020Assalamu alaikum

   Assalamu alaikum, da fatan an wayi garin Asabar cikin ƙoshin lafiya.

   Umar Mikail ke muku barka da shigowa shafinmu mai kawo rahotanni kai-tsaye game da abubuwan da ke faruwa a sassan duniya musamman kan annobar korona.

   To me za mu jira? Ku ci gaba da duba saman shafin domin karanta labaran, yayin da za su rika shigowa ba ƙaƙƙautawa.