Karin mutum 17 sun kamu da coronavirus a Najeriya

Rahoto kai-tsaye

Nasidi Adamu Yahaya and Umar Mikail

1. 10 Aprilu 2020Yadda sojojin Chadi 'suka kashe 'yan Boko Haram' 1,000

   Bayani kan maƙala

   • • Marubuci, Mary Harper
     • Sanya sunan wanda ya rubuta labari, Editar Afrika, BBC World Service

   Rundunar sojin Chadi ta ce ta kashe mayakan Boko Haram 1,000 a wani samame da ta kai yankin Tafkin Chadi.

   Kakakin rundunar sojin Kanar Azem Agouna ya ce an kashe dakarun Chadi 52 a bata-kashin da aka kwashe kwana shida ana yi a tsakaninsu.

   Shugaba Idriss Déby ya ziyarci yankin Tafkin na Chadi. Ya ce babu dan kungiyar Boko Haram ko daya da ya rage a yankin.

   Ya yi takaici kan yadda ya ce an bar Chadi ita kadai take fatattakar mayakan na Boko Haram a fadin Tafkin na Chadi, wanda ke da iyaka da kasashen Najeriya da Nijar da Kamaru da kuma Chadi.

   An kaddamar da farmakin ne bayan da a watan jiya sun kashe dakarun Chadi kusan 100 a harin da suka kai musu a yankin.

   Har yanzu dai babu wata kafa mai zaman kanta da ta tabbatar da ikirarin sojojin Chadin kuma Boko Haram bata ce komai ba.

2. 10 Aprilu 2020Alamun Coronavirus: Abubuwan da suka kamata ku dinga yi

3. 10 Aprilu 2020Covid-19: Buhari ya taya Kiristoci murnar bikin Easter

   Shugaban Najeriya Muhammadu Buhari ya yi kira ga Kiristoci su yi koyi da darasin da ke cikin ranar Easter duk da halin da duniya ke ciki na annobar covid-19.

   A sakon da ya fitar domin taya mabiya addinin Kirista murnar ranar ta Easter, Shugaban na Najeriya, ya ce: "Ina mai kira a gare ku da ku yi riko da dabi'u na kirki da da da'a da hakuri da sadaukarwa da kuma mika kai wadanda Yesu Almasihu ya nuna a rayuwarsa a doron kasa".

   "Bikin Easter na wannan shekarar ya zo ne a yayin da duniya ke fama da annobar Covid-19. Wannan abu ne da bai taba faruwa ba a tarihi, inda akasarin Kiristoci suka tsinci kansu wajen yin bikin Easter ba tare da shagulgula da taruwa a coci-coci ba," in ji Shugaba Buhari

   Ya nanata kiran da ya yi a jawabin da ya yi wa 'yan Najeriya ta kafar talbijin inda ya bukaci su dauki matakan kauce wa kamuwa da coronavirus, irin su yawaita wanke hannaye da kauce wa shiga tarukan jama'a da kuma toshe bakinsu da kyalle lokacin da za su yi atishawa da bai wa juna tazara da makamantansu.

4. 10 Aprilu 2020Coronavirus ta kashe mutum kusan dubu dari daya

   Jami'ar Johns Hopkins ta Amurka da ke bin diddigin yaduwar annobar coronavirus, ta ce mutum 95, 745 sun mutu daga cutar a fadin duniya zuwa safiyar ranar Juma’a 10 ga watan Afrilu, 2020.

   Jami’ar ta kara da cewa an tabbatar mutum sama da miliyan daya da dubu dari shida sun kamu da coronavirus.

   Kazalika mutum fiye da 355, 000 sun warke daga covid-19.

   Ga kasashe goma da suka fi fama da cutar ya zuwa safiyar Juma’a:

   Amurka- 466,299

   Spaniya – 153,222

   Italiya -143,626

   Faransa – 118, 785

   Jamus – 118, 235

   China - 82, 924

   Iran – 66, 220

   Birtaniya – 65, 872

   Turkiyya – 42, 282

   Belgium – 24, 983

5. 10 Aprilu 2020Budewa

   Bayani kan maƙala

   • • Marubuci, Nasidi Adamu Yahya
     • Sanya sunan wanda ya rubuta labari, BBC Hausa, Abuja

   Sashen Hausa na BBC ne yake yi muku barka da warhaka.

   Muna fatan kasance tare da ku tsawon wannan rana domin sanar da ku halin da duniya take ciki.

   Za mu kawo muku labarai da rahotannin da suka shafi rayuwarku, musamman kan abubuwan da ke faruwa a Najeriya da Nijar da makwabtansu, har ma da sassan duniya.

   Kada ku manta cewa za ku iya tafka muhawara da bayyana ra'ayoyinku a shafukanmu na sada zumunta a BBC Hausa.