'Za a rasa rayuka da yawa a Amurka saboda coronavirus'

Rahoto kai-tsaye

Umar Mikail and Mustapha Musa Kaita

1. 4 Aprilu 2020Coronavirus: Akwai yiwuwar sakin fursunoni har 4,000 a Birtaniya

   Hukumar kula da fursunoni ta Birtaniya ta bayyana cewa akwai yiwuwar sakin fursunoni kusan 4,000 a Ingila da kuma Wales saboda coronavirus.

   Sai dai wadanda suka aikata muggan laifuka da kuma fyade ba su cikin jerin mutanen da za a saki a rukunin farko.

   Ana sa ran fursunonin da wa'adin zamansu ya rage watanni biyu ko kuma kasa da haka za a saki.

   Ana ganin cewa asibitoci za su shiga wani hali idan cutar coronavirus ta ci gaba da bazuwa a cikin fursuna.

   A halin yanzu akwai fursunoni 88 da suka kamu da cutar wadanda ke a gidajen yari 29 a fadin kasar.

   Akwai kuma kusan fursunoni 1,200 da ake gani sun killace kansu.

   Kusan ma'aikatan gidan yari 8,000 ne ba su zuwa aiki sakamakon wannan cuta - kusan kashi daya bisa hudu na ma'aikatan gidan yari a kasar.

2. 4 Aprilu 2020Bayanin Dakta Ibrahim Disina kan shekarun da ba a yi Aikin Hajji ba

3. 4 Aprilu 2020Coronavirus: Mutum 562 sun mutu a New York a rana guda

   Alkaluman baya-bayan nan da aka tattara kan mace-mace sakamakon coronavirus a Amurka da aka fitar a ranar Juma'a sun tayar da hanakalin jama'a da dama a fadin duniya.

   Jihar New York ita ce jihar da lamarin ya fi shafa a kasar inda jumullar wadanda suka mutu a jihar ya haura daga 2,373 zuwa 2,935 a ranar Juma'a. Wannan na nufin mutum 562 suka mutu a rana guda a cikin jihar.

   Gwamnan jihar ta New York Andrewa Cuomo, ya bukaci samun tallafi daga wasu sassan kasar.

   ''New York na cikin wani hali, a taimaka wa New York,'' inji gwamnan jihar a wani taron manema labarai da ya gudanar.

   Jumullar mace-mace a fadin Amurka a halin yanzu ya kai har an samu mutum 1,100 da suka mutu a cikin sa'o'i 24, adadin da ya zarce na ko ina a fadin duniya.

   Amurka ta tabbatar da cewa akwai mutum 278,458 da suka kamu da cutar a fadin kasar inda mutum 7,000 suka mutu, kamar yadda alkaluman da Jami'ar Johns Hopkins ta tattara suka nuna.

   Tuni dai kasar ta zama cibiyar coronavirus kamar yadda aka yi hasashen cewa hakan zai faru a can baya.

4. 4 Aprilu 2020Bayanai na baya-bayan nan daga Birtaniya

   Ga labarai na baya-bayan nan daga Birtaniya

   - Karin mutum 684 ne suka mutu a kasar inda a halin yanzu jumullar mutanen da suka mutu a kasar ya kai 3,605. Yawan mutanen da suka kamu da cutar a kasar ya kai 38,168.

   - Gwamnatin kasar ta ba jama'ar kasar shawara da su zauna gida a wannan makon sakamakon ana hasashen za a shiga yanayin zafi a kasar.

   - Bayan mutuwar wasu ma'aikatan jinya biyu sakamakon cutar, shugabar ma'aikatan jinya ta kasar ta bukaci jama'ar kasar da su zauna a gida.

   - Sakataren lafiya a Birtaniya Matt Hancock ya bukaci masu bayar da agaji da su bada gudunmuwa wajen gwaje-gwajen da za a yi ciki har da gwajin yadda za a yi amfani da magungunan da ake da su a kasa wajen magance coronavirus.

   - Ana sa ran Sarauniyar Ingila za ta yi jawabi ga kasar a daren Lahadi.

5. 4 Aprilu 2020Farawa

   Bayani kan maƙala

   • • Marubuci, Mustapha Musa Kaita
     • Sanya sunan wanda ya rubuta labari, Multi-Media Broadcast Journalist

   Masu bibiyarmu a wannan shafin barkanmu da wannan rana ta Asabar. Wannan shafin zai rinka kawo muku labarai da rahotanni kai tsaye kan abubuwan da ke faruwa a Najeriya da wasu sassan duniya musamman kan coronavirus.