Wa zai maye gurbin Mourinho a Old Trafford?

Rahoto kai-tsaye

Awwal Ahmad Janyau

1. 18 Disamba 2018Shin Mourinho zai sake samun wani Kulub?, Mourinho ya bar Manchester

   Wasu na ganin salon kwallon Mourinho yanzu ya sauya, inda yake amfani da wasu dubarun taka leda da aka daina amfani da su.

   Masharhanta na ganin yana da wahala ya iya sake samun wani babban kulub.

   A baya wasu rahotanni sun danganta shi da cewa Real Madrid za ta sake daukar shi bayan ta kori kocinta.

2. 18 Disamba 2018Martanin Chelsea, Mourinho ya bar Manchester

   Mourinho ya lashe kofuna uku a Chelsea a karo biyu da ya yi aiki a Stamford Bridge. A watan Disemban 2017 Chelsea ta kore shi kafin ya koma Old Trafford.

   Mataimakin manajan Chelsea Gianfranco Zola ya ce bai ji wa Mourinho dadi ba musamman mutumin da ya lashe kofuna a Chelsea.

3. 18 Disamba 2018Evra ya ce gyara Manchester ke bukata yanzu, Mourinho ya bar Manchester

   Patrice Evra ya nuna damuwa kan yadda mutane suka damu da sakon Pogba da kuma korar Mourinho. Ya ce yanzu gyara mai dorewa ya kamata a mayar da hankali a kai.

4. 18 Disamba 2018'Yan wasan da Mourinho ya saya a Manchester, Mourinho ya bar Manchester

   Mourinho ya kashe jimillar kudi fam miliyan £358.8 wajen sayen 'yan wasa tun zuwansa Manchester United.

   Eric Bailly – Dan wasan baya - daga Villarreal - £30m

   ·Zlatan Ibrahimovic – Dan wasan gaba - daga Paris St-Germain - ya zo a son kansa

   ·Henrikh Mkhitaryan – Dan wasan tsakiya- daga Borussia Dortmund - £26.3m

   ·Paul Pogba - Dan wasan tsakiya - daga Juventus - £89m

   ·Victor Lindelof – Dan wasan baya - daga Benfica - £31m

   ·Romelu Lukaku – Dan wasan gaba - daga Everton - £75m

   ·Nemanja Matic - Dan wasan tsakiya - daga Chelsea - £40m

   ·Alexis Sanchez – Dan wasan gaba - Arsenal - musaya da Mkhitaryan

   ·Diogo Dalot – Dan wasan gaba - daga Porto - £19m

   ·Fred - Dan wasan tsakiya - daga Shakhtar Donetsk - £47m

   ·Lee Grant – Mai tsaron gida - daga Stoke £1.5m

5. 18 Disamba 2018Shin Mourinho bai zo da sa’a ba ne a Old Trafford?

   Mourinho ya horar da kungiyoyi a Portugal da Ingila da Spain da Italiya.

   Ya lashe kofuna a kungiyoyin da ya horar a Porto da Real Madrid da Inter milan da Chelsea.

   Sai dai kuma a Manchester United ya fuskanci kalubale duk da cewa ya lashe kofin kalubale da Europa League.

   Amma wasu na ganin tun zuwansa ya kasa sauya abubuwa a Old Trafford.

6. 18 Disamba 2018Mataki ne da ya dace – Owen, Mourinho ya bar Manchester

   Tsohon dan wasan Manchester United Michael Owen ya ce korar Mourinho mataki ne da ya dace, domin 'yan wasansa sun kasa tabuka komi.

7. 18 Disamba 2018Abin da Gary Lineker ya ce

   Tsohon dan wasan Ingila Gary Lineker ya ce Mourinho ya kashe miliyoyin kudi wajen sayen ‘yan wasa amma ba amfani.

   Tazarar maki 19 Liverpool ta ba Manchester a tebur bayan buga wasa 17. Kuma yawancin ‘yan wasan ba su taka leda yadda ya dace, in ji shi.

8. 18 Disamba 2018Abin da ya faru

   Manchester ta kori Mourinho

   Za a nada kocin rikon kwarya

   Carrick zai jagoranci atisaye

   Paul Pogba ya yi gaggawar goge sakon da ya tura a Twitter bayan korar Mourinho.

9. 18 Disamba 2018Mourinho ya bar Old Trafford

   Manchester United ta raba gari da Jose Mourinho bayan shekara biyu da rabi yana horar da kungiyar.

   Mourinho mai shekara 55, ya lashe kofin kalubale na Ingila da Europa League a Old Trafford.

   Amma United tana matsayi na shida a teburin Premier, tazarar maki 19 tsakaninta da Liverpool da ke saman teburin kuma wacce ta lallasa Mourinho 3-1 a ranar Lahadi.

   Manchester ta gode wa Mourinho tare da ma shi fatan alheri.

10. 18 Disamba 2018Mourinho ya fito aiki kafin a kore shi

    Mourinho ya fito aiki da safiyar Talata bayan ya san cewa Manchester United za ta kori shi.

11. 18 Disamba 2018Muna maku maraba, Mourinho ya bar Manchester

    Barkarmu da kasancewa a cikin wannan shafin inda za mu kawo ma ku sharhi da bayanai bayan Manchester United ta kori Jose Mourinho a matsayin kocinta.