Abubuwan da ke faruwa a Najeriya da sauran sassan duniya

Rahoto kai-tsaye

Usman Minjibir, Ahmad Bawage da Abdullahi Bello Diginza

1. 3 Aprilu 2025An wanke fasto ɗan Najeriya kan zargin fyaɗe bayan shafe shekara takwas a gidan yari

   An wanke wani fasto ɗan asalin Najeriya daga laifin yi wa wata matashiya fyaɗe a majami'arsa da ke Afirka ta Kudu, bayan shafe shekara takwas a gidan yari.

   Timothy Omotoso ya musanta zarge-zarge 32 da aka yi masa, a wata shari'a da aka watsa kai-tsaye a gidan talabijin da kuma aka yi ta yayatawa a faɗin ƙasar

   A 2018, matashiyar ta faɗa wa kotun cewa faston ya yi mata fyaɗe - wanda ke da wata majami'a a birnin Port Elizabeth - lokacin tana da shekara 14.

   Lokacin yanke hukuncin ranar Laraba, alkalin da ke jagorantar shari'ar ya ce an samu mista Omotoso ba shi da laifi saboda masu gabatar da ƙara ba su gudanar da shari'ar yadda ya kamata ba.

2. 3 Aprilu 2025Ƴan bindiga sun saki tsohon shugaban NYSC Janar Tsiga

   Tsohon shugaban Hukumar yi wa Ƙasa Hidima ta Najeriya, NYSC, Manjo Janar Mahrazu Tsiga, mai ritaya da ƴan bindiga suka yi garkuwa da shi, ya samu kuɓuta.

   Kamal Mahrazu Tsiga, babban ɗan Janar ɗin sojin Najeriyar da aka saki ne ya tabbatar wa da BBC hakan.

   Tsohon shugaban na NYSC ya shafe kwanaki 56 a hannun ƴan bindigar, kafin su sake shi.

   An dai yi garkuwa da shi ne ranar 5 ga watan Fabrairu, a garin mahaifarsa ta Tsiga da ke karamar hukumar Bakori na jihar Katsina - tare da wasu mutum 13.

   Duk da cewa ƙaramar hukumar Bakori na fama da matsalar 'yanbindiga, amma garin Tsiga bai saba fuskantar irin wannan matsala ba sai a baya-bayan nan.

3. 3 Aprilu 2025Trump ya saka wa Najeriya sabon harajin kashi 14

   Shugaban Amurka Donald Trump ya ƙaƙaba wa Najeriya sabon harajin kashi 14.

   Trump ya sanar da haka ne a ranar Laraba, inda ya ce daga yanzu za a caji kashi 14 kan duk kayayyakin Najeriya da za su shiga ƙasar.

   Sai dai mutane na ganin cewa watakila sabon harajin na Amurka ya shafi dangantakar ƙasashen biyu.

   A cewar gwamnatin Trump, Najeriya ita ma ta saka wa kayayyakin Amurka da za su shiga ƙasar harajin kashi 27, inda ta ce abin bai yi wa kasuwancin Amurka kyau ba.

   Ana ganin cewa mai yiwuwa hakan ne ya sa Amurkar ita ma ta saka harajin ramako ga Najeriya.

   "Mun ƙaƙaba sabon harajin ga ƙasashen da ba sa yi mana daidai," in ji Trump.

   Kenya da Ghana da Ethiopia da Uganda da Senegal da kuma Laberiya na cikin ƙasashen da za su biya harajin da ya kai kashi 10.

4. 3 Aprilu 2025Hamas ta zargi Isra'ila da ƙoƙarin ruguza tsarin tsagaita wuta

   Ƙungiyar Hamas ta yi watsi da ƙudirin tsagaita wuta a Gaza na baya-bayan nan da Isra'ila ta gabatar tana zargin Isra'ilawa da ƙoƙarin ruguza tsarin da masu shiga tsakani daga Masar da Qatar suka riga suka gabatar.

   Hamas ta bayyana goyon baya ga shawarar masu shiga tsakanin na tsagaita wuta tsawon kwana hamsin inda a nan za a yi musayar sojojin Isra'ila biyar da ɗaruruwan Falasɗinawa da aka tsare.

   Shawarar ta kuma ƙunshi dakatar da farmakin Isra'ila a Gaza da kuma buɗe hanyoyi domin bayar da damar kai kayayyakin jin ƙai.

   A makonnin baya-bayan nan ne Isra'ila ta sabunta luguden wuta a Gaza bisa ikirarin cewa Hamas ta ƙi sakin ragowar mutanenta da take tsare da su.

5. 3 Aprilu 2025Trump na shan suka kan ƙaƙaba sabbin haraji

   Abokan kasuwancin Amurka har ma da abokan hamayyarta sun soki sanarwar Donald Trump na ƙaƙaba sabbin haraji kan wasu kayayyaki da za su shiga ƙasar daga sassan duniya.

   Shugabar hukumar Tarayyar Turai, Ursula von der Leyen ta ce matakan gagarumin koma-baya ne ga tattalin arzikin duniya kuma za su yi illa sosai ga miliyoyin mutane.

   China, ɗaya daga cikin ƙasashen da matakin ya fi shafa da kashi 34 cikin 100, ta ce za ta ɗauki matakan ramuwar gayya a kan Amurka.

   Ita kuwa Japan ta ce matakin abin takaici ne.

   Trump ya ce harajin zai nuna yadda sauran ƙasashe ke tafiyar da al'amuran Amurka.

   Ana sa ran sabbin harajin za su samar da biliyoyin daloli a kuɗin shiga da Amurka ke samu daga kuɗaɗen haraji.

6. 3 Aprilu 2025Buɗewa

   Masu bibiyar mu barkan mu da hantsin Alhamis.

   Kun shigo shafin labarai kai-tsaye tare da ni Ahmad Bawage.

   Ku kasance da mu domin samun labaran abubuwan da ke faruwa a Najeriya da sauran sassan duniya.