Abubuwan da ke faruwa a Najeriya da sauran sassan duniya 31/12/2025.

Rahoto kai-tsaye

Daga Aisha Babangida

1. 31 Disamba 2025Thailand ta saki sojojin Cambodia 18 bayan amincewa da tsagaita wuta

   Thailand ta saki sojojin Cambodia 18 wadanda ta kama a watan Yulin da ya wuce a yayin wata mummunar gwabzawa da ƙasashen biyu suka yi akan iyaka.

   Gwamnatocin ƙasashen biyu sun tabbatar da miƙa sojojin, wanda aka yi kwanaki hudu bayan ƙasashen da ke makwabtaka da juna sun amince da tsagaita wuta.

   A watan Yulin daya wuce, dangantaka tsakanin ƙasashen wato Thailand da Cambodia ta yi tsami inda ta koma fada akan iyaka.

   Tun daga nan ne kuma aka kashe gwamman mutane sannan kuma mutane wadanda ke zaune a kusa da iyakar kusan dubu 500 suka bar muhallansu.

2. 31 Disamba 2025Fitattun jaruman Bollywood 5 da suka mutu a 2025

   Masana'antar finafinan Indiya ta Bollywood ta yi rashin wasu fitattun jarumanta maza da mata a shekarar 2025.

   Wasu daga cikinsu tarihin Bollywood ba zai taba cika ba tare da ambaton sunayensu ba saboda irin rawar da suka taka.

   Dharmendra

   An haife Dharam Singh Deol a ranar 8 ga watan Disambar 1935.

   Jarumi ne kuma mai shirya finafinai ne sannan kuma dan siyasa ne.

   Kodayake an fi saninsa a finafinai na Bollywood musamman na Hindi.

   Karanta cikakken labarin

3. 31 Disamba 2025Kwankwaso ko Abba: Wa ƴan Kwankwasiyya za su bi?

   Tun bayan da raɗe- raɗin cewa gwamnan Kano, Abba Kabir Yusuf zai sauya sheƙa zuwa jam'iyyar APC mai mulki ba tare da mataimakinsa da kuma jagoran jam'iyyar, Rabi'u Musa Kwankwaso, mabiya Kwankwasiyya a jihar suka shiga wani halin da ba a taɓa gani ba na ruɗewa.

   Wata majiya dai ta tabbatar wa BBC cewa ana sa ran gwamnan na Kano, Abba Kabiru Yusuf zai sanar da sauya sheƙar zuwa jam'iyya mai mulki a ranar Laraba lokacin taron majalisar zartarwar jihar.

   Gwamnan zai koma APC ne ba tare da mataimakinsa da kuma jagoran NNPP, Rabi'u Musa Kwankwaso ba.

   Kawo yanzu dai ba za a iya cewa an raba gari tsakanin Abba da ubangidan nasa, Rabi'u Musa Kwankwaso ba. To bayanai na nuna cewa tsohon gwamnan jihar Kano, Rabi'u Musa Kwankwaso ya kaɗu da batun.

   Karanata cikakken labarin

4. 31 Disamba 2025Assalamu alaikum

   Masu bibiyarmu, Barkanmu da war haka, da fatan muna cikin ƙoshin lafiya.

   Kamar kullum, a yau ma wannan shafi na Kai Tsaye zai kawo rahotanni da labarai na abubuwan da suke faruwa a Najeriya da sauran kasashe makwabta.

   Sai ku ci gaba da bibiyar mu domin sanin halin da duniya take ciki a yau Laraba.

   Za ku iya leƙawa shafukan sada zumuntanmu na intanet, da facebook da X da kuma whatsapp domin karanta sauran labarai da kallon bidiyo da tafka muhawara.