Amurka za ta ba gidauniyar agaji ta Gaza tallafin dala miliyan 30
Amurka za ta ba da tallafin dala miliyan talatin ga Gidauniyar agaji ta Gaza, ƙungiya mai cike da taƙaddama da ke samun goyon bayan Amurka da Isra'ila.
Ita dai wannan gidauniya an kafa ne domin rarraba kayayyakin jin ƙai a Zirin.
Wannan ne karon farko da Amurka kai-tsaye za ta bai wa ƙungiyar tallafi.
Tun ƙarshen watan Mayu gidauniyar take gudanar da ayyukanta a Gaza sakamakon toshe hanyoyin kai jin ƙai da Isra'ila ta yi na tsawon mako goma sha ɗaya.
A cewar wakilin BBC, tun watan Mayu, an kashe sama da Falasɗinawa ɗari huɗu yayin da suke ƙoƙarin karɓar abinci daga cibiyoyin rarraba kayan jin ƙan.