Abubuwan da ke faruwa a Najeriya da sauran sassan duniya

Rahoto kai-tsaye

Ibrahim Yusuf Mohammed da Haruna Ibrahim Kakangi da Muhammad Annur Muhammad

1. 2 Disamba 2024Amnesty ta buƙaci kotun ICC ta daina jinkiri wajen binciken laifuka a yaƙi da Boko Haram

   Ƙungiyar Amnesty International ta kai kokenta ga alƙalan kotun hukunta manyan laifuka ta duniya wato ICC a madadin waɗanda aka yi zalinta domin daƙile yadda masu shigar da ƙara na kotun ke jan ƙafa wajen neman haƙƙin waɗanda aka yi wa laifi a Najeriya.

   A watan Disamban 2020 ne masu gabatar da ƙara na International Criminal Court (ICC) suka ce dukkan sharuɗa sun cika domin fara binciken laifukan da aka aikata a lokacin yaƙin Boko Haram a arewa maso gabashin Najeriya tun daga 2010.

   Cikin laifukan har da waɗanda mayaƙan masu iƙirarin jihadi suka aikata, da kuma wanda ake zargin dakarun sojin Najeriya da aikatawa.

   Amnesty ta ce ya kamata ne a ce an kai buƙatar hakan ga alƙalai masu sauraren korafe-ƙorafe, idan sun amince sai a fara bincike.

   "Amma shekara huɗu ke nan har yanzu ofishin mai gabatar da ƙara a ICC bai gabatar da buƙatar ba," in ji Amnesty.

   A cewar shugaban Amnesty a Najeriya, Isa Sanusi: "Waɗanda aka zalinta a Najeriya sun cancanci adalci kamar sauran waɗanda aka zalinta a wasu wuraren. Sun daɗe suna jira a yi musu adalci, bai kamata kotun ICC ta manta da Najeriya ba."

2. 2 Disamba 2024Yadda aka ƙaddamar da allurar riga-kafin malaria a Najeriya

   Najeriya ce ƙasar da ke da kashi 27 na masu ɗauke da cutar malaria, da kuma kashi 31 na waɗanda cutar ta kashe a duniya, kamar yadda rahoton malaria na duniya na 2023 ya nuna.

   Kusan mutum 200,000 ne suka rasu a sanadiyar cutar malaria a bara, kuma yara ƴan ƙasa da shekara biyar da mata masu ciki suka fi saurin kamuwa.

   Ƙasar ta karɓi allurar riga-kafin malaria kawo na farko a watan Oktoba, sannan an fara allurar a yau Litinin a jihohi biyu - Bayelsa da Kebbi - kafin a faɗaɗa zuwa wasu jihohin nan da wasu watanni masu zuwa.

   Happiness Idia-Wilson, wadda ɗanta mai kimanin wata 11 a duniya ne farkon wanda aka fara yi wa allurar riga-kafin a Bayelsa, ta bayyana farin cikinta, tare da cewa ita ce ta nemi a yi wa ɗanta riga-kafin, "domin ya samu kariya," in ji ta, sannan ta ƙara da cewa, "zan wayar da kan iyaye mata don su kawo yaransu domin hakan ne zai sa a rage yawan cutar malaria."

3. 2 Disamba 2024EFCC ta ƙwace unguwa guda daga wani tsohon jami'in gwamnati a Abuja

   Hukumar EFCC ta samu nasarar ƙwace kadara mafi girma a tarihinta, inda a ranar Litinin, 2 ga watan Disamban 2024, mai shari'a Jude Onwuegbuzie ya mallaka wa gwamnati wani rukunin gidaje, wanda aka gina a fili mai mai faɗin murabba'in ƙasa 150,500, mai ɗauke da rukunin gidaje 753 da wasu gine-ginen a Abuja.

   Wannan shi ne ƙwace kadara mafi girma tun bayan kafa hukumar EFCC a shekarar 2003.

   Kotu ta ƙwace rukunin gidajen ne mai lamba 109 a yankin Zone C09 da ke unguwar Lokogoma a Abuja, wanda kotun ta ce ta mallakin wani tsohon jami'in gwamnati ne, kamar yadda wata sanarwa da EFCC ta fitar ta nuna.

   Da yake hukunci kan ƙwace rukunin gidajen, mai sharii'a Onwuegbuzie ya ce wanda ake ƙara ya kasa gamsar da kotun abin da zai hana a ƙwace masa kadarar, "wadda ake zargin ya mallaka da kuɗaɗen da ya samu ta wasu hanyoyi zamba. Don haka an ƙwace kadarar, an kuma miƙa ga gwamnatin tarayya."

   Tun da farko, a ranar 1 ga watan Nuwamban 2024 ne kotun ta fara ƙwace rukunin gidajen na wucin-gadi, kafin yanzu ta ƙwace baki ɗaya.

   Sanarwar ta ƙara da cewa ana cigaba da binciken jami'in gwamnatin

   Shugaban hukumar, Mr Ola Olukoyede, ya sha nanata cewa ƙwace kadarorin da aka mallaka ta hanyoyi marasa kyau na da matuƙar muhimmanci a yaƙi da cin hanci da rashawa.

4. 2 Disamba 2024Mataimakin firaiministan Rasha ya ziyarci Nijar

   A jamhuriyar Nijar, mataimakin Firaministan Rasha ne ya ziyarci shugaban mulkin sojan ƙasar wanda ya tabbatar masa cewa Shugaba Vladmir Putin "ya ba da umarni na ƙarfafa dangantaka tsakanin Rasha da ƙasashen Afirka, musamman na ƙawancen ƙasashen Sahel da suka haɗa da Nijar, Mali da kuma Burkina Faso".

   A yayin da tawagar mataimakin firaministan Rasha ta kammala rangadin ƙasashen Sahel da jamhuriyar Nijar wasu ƴan ƙasar na fatan ganin talaka ya amfana da wannan hulɗa.

   Hakan dai na faruwa ne a daidai lokacin da ake fuskantar koma bayan dangantaka da ƙasashen yamma waɗanda a baya aka fi dogaro kan tallafin da suke bayarwa.

5. 2 Disamba 2024Mafi ƙarancin albashi: Gwamnan Ebonyi ya yi barazanar sallamar duk ma'aikacin da ya shiga yajin aiki

   Gwamnan jihar Ebonyi, Francis Nwifuru, ya yi barazanar sallamar duk wani ma'aikacin da ya shiga yajin aiki nan da awa 72 idan bai koma aiki ba.

   Gwamna Nwifuru ya bayyana haka ne a ranar Litinin a ofishinsa da ke Abakaliki a lokacin da yake jawabi a game da yajin aikin da shugaban ƙungiyar ƙwadago na jihar, Kwamrade Comrade Oguguo Egwu ya fitar, kamar yadda Daily Trust ta ruwaito.

   A ranar Lahadi ne Oguguo ya bayyana cewa yajin aikin biyayya ce ga umarnin shugaban ƙungiyar na ƙasa na ranar 8 ga Nuwamban 2024, inda ta yi kira ga ma'aikata a duk jihar da ba a fara biyan sabon mafi ƙarancin albashi ba su shiga yajin aiki.

   Nwifuru, ya ce majalisar tarayya ba ta ƙayyyade sabon albashi ba, inda a cewarsa dokar ta yi magana ne kan mafi ƙarancin albashi.

   "Na fara biyan sabon mafi ƙarancin albashi tun a watan Oktoba, shi ya sa na yi mamaki da na ga sun fara yajin aiki. Kuma babu wani ma'aikaci da yake binmu bashin albashi, haka ma ƴan fansho.

   "Don haka duk wanda bai koma aiki ba nan da awa 72, zan sallame shi, in ɗauki wasu.

   Gwamnan ya ƙara da cewa ya bayar da umarnin a fara ɗaukar sunayen waɗanda suke zuwa aiki, sannan ya ce babu maganar zaman sulhu, "saboda kwamrade Egwu ba ma'aikacinmu ba ne."

6. 2 Disamba 2024Iran za ta fara ayyana waɗanda ba su sa hijabi a matsayin masu 'babban laifi'

   Majalisar Iran ta amince da wani ƙuduri da ya sanya hukunci mai tsauri kan mata waɗanda ba su sanya hijabi - ko kallabi.

   Sabuwar dokar na nufin duk waɗanda aka ba sau ɗaya ba, ba sau biyu ba, za a ci tarar ua daga dala 11 zuwa dala 100, wanda kwatankwacin albashin wata biyar ne - sannan a ayyana su a matsayin masu babban laifi.

   Dokar ta kuma ba ƴan ƙasar damar tilasta amfani da hijabi idan akwai buƙatar hakan.

   Sai dai ƙungiyar kare haƙƙin ɗan'adam ta Human Rights Watch ta ce dokar ta kama-karya ce.

7. 2 Disamba 2024Jihohin Najeriya da 'yan ƙwadago suka shiga yajin aiki

   Ƙungiyoyin ƙwadago a wasu jihohin Najeriya sun tsunduma yajin aiki saboda rashin fara biyan naira 70,000 a matsayin mafi ƙanƙantar albashi da gwamnonin jihohin suka yi.

   Matakin ƙungiyoyin biyayya ce ga wa'adin da gamayyar ƙungiyar ƙwadago ta ƙasa wato Nigeria Labour Congress (NLC) ta saka na ranar 1 ga watan Disamba ga jihohi kusan 14 da ba su fara biyan sabon albashin ba ga ma’aikatansu.

   A ranar 29 ga watan Yulin 2024 ne Shugaban Ƙasa Bola Tinubu ya tabbatar da sabon albashin bayan ya saka hannu kan dokar da aka yi wa kwaskwarima tare da alƙawarin za a dinga sake duba ta duk bayan shekara uku.

   Ƙarin bayani - https://bbc.com.im/hausa/articles/c047914xw73o%3C/a%3E%3C/p%3E%3C/div%3E%3C/div%3E%3C/article%3E%3C/li%3E%3Cli class="css-xxlek1">

   2 Disamba 2024Hare-haren Rasha sun kashe ɗaruruwan ƴan tawaye a Syria

   Rundunar sojin Syria ta ce hare-haren da jiragen yaƙin Rasha da na Syria suka kai a cikin sa’o’i 24 da suka gabata sun kashe ƴan tawaye sama da ɗari huɗu.

   Wani sabon faɗa ya ɓarke a makon da ya gabata bayan da ƴan tawaye suka ƙwace birnin Aleppo.

   Jami'ai a Damascus sun ce hare-haren na baya-bayan nan da suka kai ya lalata cibiyoyin bayar da umarni da kuma rumbun adana harsasai a lardin Aleppo da Idlib da ke arewacin ƙasar.

   Shugaba Bashar al-Assad ya zargi ƙasashen yammacin duniya da wani shiri da ya bayyana a matsayin shirin sake fasalin taswirar Gabas ta Tsakiya.

   A wata tattaunawa ta wayar tarho da manema labarai, kakakin Kremlin --Dmitry Peskov -- ya ce Rasha na bayar da goyon baya ga Syria kuma za ta fito da wani shiri na magance rikicin baki ɗaya.

8. 2 Disamba 2024Ƴan Sudan na ƙara fuskantar bala'o'i - MDD

   Sabon shugaban hukumar jin-ƙai ta Majalisar Ɗinkin Duniya ya yi gargaɗin cewa yankin Darfur na Sudan na cikin matsanancin fari da mummunan tashin hankali.

   A wata hira da BBC jim kaɗan bayan dawowa daga Sudan, Tom Fletcher ya bayyana halin da ƴan Sudan ke ciki a matsayin mafi muni.

   Watanni 19 ke nan da sojojin gwamnatin Sudan da na dakarun RSF ke gwabza faɗa da juna.

   Ƙungiyoyin kare haƙƙin ɗan'adam sun ce dukkan ɓangarorin biyu sun aikata laifukan yaƙi duba da yadda ake kisan ƙare dangi a yankin Darfur, amma RSF ta musanta hakan.

   Mr Fletcher ya ce dole ƙasasshen duniya su matsawa ɓangarorin biyu domin cimma yarjejeniyar zaman lafiya mai ɗorewa.

9. 2 Disamba 2024Joe Biden ya isa Cape Verde a ziyararsa ta farko Afirka

   Joe Biden ya isa Cape Verde a ziyararsa ta farko zuwa Afirka a matsayinsa na shugaban Amurka.

   Daga nan zai wuce Angola inda ake sa ran zai bayyana lamuni da Amurka za ta bayar don taimakawa wajen gina sabon layin dogo mai tsawon kilomita 1,300.

   Layin dogon zai haɗa tashar ruwan Lobito ta Angola da yankin da ake sarrafa jan ƙarfe (copper) na Zambia da kuma wuraren haƙar ma'adinan Cobalt na Jamhuriyar Demokradiyyar Kongo.

   Ana kallon wannan aikin a matsayin wani ƙalubale ne ga mamayar da ƙasar China ke neman yi a fannin haƙar ma'adinai da ababen more rayuwa a yankin.

   China ta rattaba hannu kan wata yarjejeniya da ƙasashen Tanzania da Zambia a watan Satumba domin farfaɗo da layin dogo da ke yankin gabashin Afirka.

10. 2 Disamba 2024Ƴansandan Najeriya sun gurfanar da ƴan ƙasashen waje kan zargin aikata laifi ta intanet

    Jami'an rundunar ƴansandan Najeriya da ke sashen kula da laifukan intanet, sun bankaɗo wani giungun ƴan ƙasashen waje da ke da hannu wajen aikata laifukan da ke da alaƙa da zamba ta intanet.

    An dai kama waɗanda ake zargin ne a yankin Jahi da ke babban birnin Najeriya, Abuja.

    A yayin gudanar da bincike, jami'an ƴan sandan sun kwato kayayyaki da dama daga hannun waɗanda ake zargin da suka haɗa da wayoyin hannu da kuma kwanfutoci iri daban-daban.

    Rundunar ta gurfanar da ƴan kasashen wajen guda 113 da ake tuhumarsu da manyan laifuka da suka haɗa da zamba ta intanet da samun bayanan sirri ba bisa ƙa’ida ba da damfara ta hanyar tallace-tallace da halasta kuɗaɗen haram, da kuma shige da fice ba bisa ka’ida ba, a gaban babban kotun tarayya, da ke.

11. 2 Disamba 2024Firaministan Georgia ya yi watsi da batun gudanar da sabon zaɓe

    Georgia na fuskantar shiga kwana na huɗu ana gudanar da zanga-zanga a ƙasar sakamakon matakin da jam'iyya mai mulki ta ɗauka na dakatar da yunkurin fara tattaunawa kan shiga ƙungiyar Tarayyar Turai.

    Yayin da dubban ƴan ƙasar Georgia ke ta zanga-zanga kan titunan garuruwa da dama, Firaminista Irakli Kobakhidze ya ce ƙaryayyakin ƴan adawa ne suka daburta su, ya kuma yi watsi da kiraye-kirayen da ake yi na a gudanar da sabon zaɓe.

    Ya tabbatar da rahotannin cewa jakadan Georgia a Amurka, David Zalkaliani, ya zama babban jami'in diflomasiyya na baya-bayan nan da ya yi murabus, yana mai bayyana cewa ya fuskanci mummunan matsin lamba.

    Amma Kobakhidze ya nemi ya musanta dalilin zanga-zangar, inda a ranar Lahadin da ta gabata ya ce "ba mu dakatar da komai ba, ƙarya ne".

    Kwanaki uku kacal da suka gabata jam'iyyarsa ta Georgian Dream ta zargi EU da amfani da tattaunawar shiga ƙungiyar a matsayin wani mataki na muzguna wa ƙasar, kuma ta ce gwamnati ta yanke shawarar jinginar da batun tattaunawar har sai zuwa ƙarshen shekarar 2028.

12. 2 Disamba 2024Mutum 56 sun mutu a turmutsitsin filin ƙwallo a Guinea

    Hukumomi a ƙasar Guinea sun ce aƙalla mutum 56 ne suka mutu sanadiyyar turmutsitsin da aka samu sa'ilin wata karawar ƙwallon ƙafa a ƙasar, ranar Lahadi.

    Turmutsitsin ya afku ne a wani filin wasan ƙwallon ƙafa a birnin N'zérékoré, na biyu mafi girma a ƙasar Guinea.

    Firaminista Mamadou Oury Bah ya ce turmutsitsin da aka samu a wurin taron ya yi sanadin mutuwar mutane da dama a ranar Lahadi, ya kuma yi kira da a kwantar da hankula.

    Wani likita da ya buƙaci a sakaya sunansa, ya shaida wa kamfanin dillancin labaran AFP cewa, akwai gawarwaki da dama da aka jibge a asibitin yankin, kuma ɗakin ajiye gawarwaki ya cika.

    Dubban ƴan kallo ne suka cika a filin wasan domin kallon wasa tsakanin ƙungiyoyin Guinea N'zérékoré da Labé, kamar yadda shafin yaɗa labarai na gida MediaGuinee ya ruwaito.

    Rahotanni sun ƙara da cewa ƴansanda sun yi amfani da hayaki mai sa hawaye bayan da magoya bayan ƙungiyar ƙwallon kafa ta Labé, suka fara jifar alƙalin wasa da duwatsu.

    An ce wasan na ranar Lahadi yana cikin jerin wasannin wata gasa ce ta karrama shugaban ƙasar Mamadi Doumbouya, wanda ya kwace mulki a watan Satumban 2021.

13. 2 Disamba 2024Joe Biden zai ziyarci Afirka a karon farko

    Joe Biden zai ziyarci Angola da Cape Verde a ziyararsa ta farko zuwa Afirka a matsayinsa na shugaban ƙasa.

    A Luanda, ana sa ran zai bayyana lamuni da Amurka za ta bayar don taimakawa wajen gina sabon layin dogo mai tsawon kilomita 1,300.

    Layin dogon zai haɗa tashar ruwan Lobito ta Angola da yankin da ake sarrafa jan ƙarfe (copper) na Zambia da kuma wuraren haƙar ma'adinan Cobalt na Jamhuriyar Demokradiyyar Kongo.

    Ana kallon wannan aikin a matsayin wani ƙalubale ne ga mamayar da ƙasar China ke neman yi a fannin haƙar ma'adinai da ababen more rayuwa a yankin.

    China ta rattaba hannu kan wata yarjejeniya da ƙasashen Tanzania da Zambia a watan Satumba domin farfaɗo da layin dogo da ke yankin gabashin Afirka.

14. 2 Disamba 2024Jihohi biyu ne kaɗai za su amfana da sabuwar dokar harajin Najeriya - Zulum

    Gwamnan jihar Borno, Farfesa Babagana Zulum, ya bayyana dalilin da ya sa gwamnonin Arewa suka shawarci shugaban ƙasa Bola Tinubu da ya dakata kafin ya tura daftarin dokar sake fasalin harajin ƙasar ga majalisar dokoki.

    Gwamnan wanda ya bayyana hakan a wata hira da ya yi da gidan Talabijin na Channels ranar Lahadin, ya ce ƙungiyar gwamnonin Arewa na buƙatar lokaci ne domin tuntuɓa da kuma nazarin ɓangarorin dokar harajin.

    “A kan wannan dokar, akwai abubuwa da dama da ba a fahimta ba. Mun duba tanadin da aka yi wa harajin VAT a cikin dokar. Bisa kididdigar da muka yi, Jihohin Legas da Ribas ne kaɗai za su ci gajiyar waɗannan sauye-sauyen. Mun yi namu binciken kuma mun gano cewa za mu yi asara,” inji Zulum.

    “Me ya sa muke hanzari? Mun shawarci Gwamnatin Tarayya da ta dakata, ta kakkaɓe wasu abubuwan da za su iya cutar da yankin Arewacin Najeriya.''

    Zulum ya yi bayanin cewa idan har dokar ta samu amincewar Majalisar Dokoki ta kasa, za a cutar da jihohi da dama domin jihar Legas ce kaɗai za ta ci gajiyar wannan manufa.

15. 2 Disamba 2024Yau za a a fara rigakafin cutar Maleriya a Najeria

    A yau Litinin ma'aikatar lafiya ta Najeriya za ta ƙaddamar da shirin allurar rigakafin zazzaɓin cizon sauro kan yara ƴan ƙasa da wata biyar da haihuwa.

    Za a kaddamar da shirin ne a jihohin Bayelsa da Kebbi, inda matsalar wannan cutar ta fi addabar al'umma.

    Najeriya na ɗaya daga cikin ƙasashen da cutar ta yi wa dabaibayi a duniya kuma ana yi wa wannan yunƙurin kallon wani babban mataki a yakin da ake yi da cutar a ƙasar.

16. 2 Disamba 2024Assalamu alaikum

    Masu bin shafin kai-tsaye na BBC Hausa muna yi mu ku barka da kasancewa tare da mu.

    A yau Litinin muna fatan kawo muku irin abubuwan da ke faruwa a sassan duniya.

    Da fatan za ku kasance da shafukanmu na YouTube da facebook da Instagram da kuma X domin tofa albarkacin bakinku kan labaran da muke kawo muku.

    Ku ci gaba da kasancewa tare da mu.