Abubuwan da ke faruwa a Najeriya da sassan duniya

Rahoto kai-tsaye

Usman Minjibir da Umar Mikail

1. 3 Yuni 2025Adadin mutanen da ambaliya ta kashe a jihar Neja ya kai 230

   Adadin mutanen da suka mutu sakamakon ambaliyar ruwa a jihar Neja sun ƙaru zuwa 230 yayin da har yanzu ake neman sama da mutum 400, a cewar Mataimakin shugban ƙaramar hukumar Mokwa, Musa Kimboku.

   A makon da ya gabata ne ambaliyar, wadda ruwan sama mai ƙarfin gaske ya haifar, ta ɗaiɗaita ɗaruruwan gidaje da mazauna cikinsu.

   Mataimakin shugban ƙaramar hukumar ya faɗa wa BBC cewa ana ci gaba da aikin tona ƙasa domin neman mutanen da ake tunanin ƙasa ta binne su.

   Ya ce hakan ya taimaka wajen rage warin da yake tashi a yankin saboda gawarwaki.

   Ana kallon ambaliyar a matsayin mafi muni cikin shekara 50 da aka taɓa gani a Najeriya, wadda ta zarta ta birnin Maiduguri a watan Satumban 2024.

   'Ina kallo ambaliyar ruwa ta wuce da iyalina amma na kasa yin komai'

   Ambaliyar Neja ta kashe mutum fiye da 200 sannan ana neman 500

2. 3 Yuni 2025MDD ta caccaki Isra'ila kan raba kayan agaji a Gaza

   Shugaban hukumar kare haƙƙin ɗan'adam ta Majalisar Ɗinkin Duniya (MDD), Volker Turk, ya yi Allah wadai da ayyukan sabuwar ƙungiyar agajin da Amurka da Isra'ila ke tafiyar da harkokinta a kudancin Gaza.

   Ya ce akwai matuƙar takaici da sosa rai ganin yadda ƙungiyar ke cin zalin fararen hula.

   Mista Turk na waɗannan kalamai ne bayan harbe gwamman Falasdinawa a kusa da inda ƙungiyar ke rabon kayan tallafi a ranar Lahadi a Zirin Gaza.

   Shaidu da waɗanda suka tsira sun ce sojojin Isra'ila ne ke harbin su.

   Wakiliyar BBC ta ce Mista Turk ya kuma ce abubuwan da Isra'ila ke aikatawa kokari ne na ganin bayan al'ummar Falasdinawa.

   Kakakin hukumar asusun yara na MDD wato Unicef, Ricardo Pires, ya ce abubuwan da ake aikatawa sun yi matukar muni. Ya ce MDD na da dubban manyan motoci maƙare da kayan abinci da magunguna da ruwan sha, amma an hana su shiga Gaza.

3. 3 Yuni 2025Assalamu Alaikum

   Barkanmu da sake haɗuwa a shafin labarai kai-tsaye na ranar Talata.

   Za mu kawo rahotonni na abubuwan da ke faruwa daga sassan duniya, musamman ma a Najeriya da Nijar da maƙwabtansu.