Abubuwan da ke faruwa a Najeriya da sauran sassan duniya, Laraba 26/11/2025

Rahoto kai-tsaye

Isiyaku Muhammad, Aisha Aliyu Jaafar da Ibrahim Yusuf Mohammed

1. 26 Nuwamba 2025Shugaba Tinubu ya bayar da umurnin yi wa dazukan Kwara da Neja ƙawanya

   Shugaban Najeriya Bola Ahmed Tinubu ya bai wa jami'an tsaro umurnin su yi wa dajin jihar Kwara ƙawanya, sakamakon ƙaruwar ayyukan ƴan bindiga a yankin.

   Shugaban ƙasar ya kuma umurci sojojin sama su faɗaɗa ayyukansu na sa ido har zuwa tsakiyar dazukan inda ake tunanin ƴan ta'addan na ɓoya.

   A cikin wata sanarwa da mai bai wa shugaban shawara kan sadarwa, Sunday Dare ya fitar, ya kuma ce shugaban ya bayar da umurnin yin hakan a yankunan Kebbi da Neja, inda ake sa ran ceto yara a Neja.

   Ya kuma ce wajibi ne sojojin sama su riƙa aikin sa ido awa 24 domin taimaka wa aikin da sojojin ƙasa ke yi.

2. 26 Nuwamba 2025Taiwan ta yi gargaɗin cewa China na ƙara shirin ƙwace ta da ƙarfin tsiya

   Shugaban Taiwan Lai Ching-te, ya yi gargaɗin cewa China na ƙara ɗaura damara ta sojinta domin ƙwace tsibirin da karfin tsiya.

   Ya ce Taiwan za ta gabatar da kwarya-kwaryan kasafin kuɗi na tsaro na dala biliyan 40 domin kare kanta, inda za ta mayar da hankali wajen sayen jiragen sama marasa matuƙa na yaƙi, da makamai masu linzami da kuma masu kakkabo makamai.

   Shugaba Lai ya ce miƙa wuya ga mamaya ba abin da zai haifar illa yaki.

   China na ɗaukar tsibirin a matsayin wani yanki nata, kuma ba ta kawar da yuwuwar amfani da ƙarfi wajen sake ƙwato shi ba.

3. 26 Nuwamba 2025Assalamu alaikum

   Masu bibiyar shafin BBC hausa na kai-tsaye, barkanku da safiyar yau Laraba.

   A yau ma shafin namu zai mayar da hankali ne kan kawo muku labaran abubuwan da ke faruwa a Najeriya da sauran sassan duniya.

   Da fatan za ku kasance tare da mu.

   Za kuma ku iya leƙawa shafukan mu na sada zumunta kamar Facebook, Instagram, youtube da kuma X, inda muke wallafa muku bidiyo.