Shekarar 2021: Hotunan yadda aka yi shagalin shiga sabuwar shekarar 2021 a faɗin duniya

Miliyoyin mutane a fadin duniya sun shaida yadda aka yi ban-kwana da shekarar 2020 da kuma murnar shigowar sabuwar shekara ta 2021, ko da yake annobar cutar korona ta tilastawa da dama gudanar da bikin a kulle cikin gidajensu.

Sakamakon kullen korona ko sauran dokokin da kasashe da dama suka shimfida, an umarci masu fita yin dabdala da su kasance duk a cikin gidajensu.

Wasu sun halarci bukukuwan sanye da takunkumi ko kuma wasu matakai na yin taka tsan-tsan.

A birnin Tokyo (hoton da ke ƙasa), mutane sun ziyarci wurin ibada na Kanda Myojin Shrine don gudanar da addu'oi.

Sanannen wurin ibadar na Shinto ya zaftare yawan masu ziyarar da ya kamata su shiga, yayin da kasar ta Japan ke fuskantar sabuwar barazanar ƙwayar cutar korona.

A birnin Wuhan na ƙasar China, dandazon jama'a sun hallara dauke da balan-balan da tufafi na kawa don duban lokaci zuwa tsakar dare a jajiberin sabuwar shekara.

Tartsatsin wuta ya haske sararin sama a kasar Taiwan don bikin shiga sabuwar shekarar 2021, yayin da birane da dama suka soke gudanar bukukuwan, a maimakon haka aka mayar da gudanarwa ta yanar gizo.

Kamar wadannan iyalai a birnin Seoul, Korea ta Kudu, da dama a fadin duniya sun gudanar da bukukuwan ne a gajarce cikin gidajensu.

A kasar Philippines, wasu sun taru a dandalin shaƙatawa a birnin Manila (hoton da ke ƙasa) don kallon wasan wutar. Mahukunta sun umarci mazauna yankin da ka da su cunkusu wuri guda.

A yankin Hong Kong, jama'a sun taru a bakin gaɓar tekun 'Victoria Harbou' don gudanar da bukukuwan tare.

Yayin da kuma a Hadaddiyar Daular Larabawa, daya daga cikin wuraren da aka shaida kayatattun launukan wasan wuta na sabuwar shekara da suka haske sararin saman dandalin Ras al-Khaimah...

Tartsatsin wuta ya mamaye sararin sama a kewayen gini mafi tsawo a duniya Burj Khalifa, bayan da agogo ya buga ƙarfe 12 na tsakar dare a Dubai.

Waɗannan masu ibadar a Abuja, babban birnin Najeriya sun shiga sabuwar shekarar ne ta hanyar yin ibada a coci.

A can ma Abidjan babban birnin Ivory Coast, mutane sun samu damar kalon wasan tartsatsin wuta tare da ƴan uwa da abokan arziƙi.

Amma a birnin New York na Amurka, mutane kaɗan ne aka bari suka shiga dandalin Times Square don kallon bikin shiga sabuwar shekarar.

Hukumomin Brazil sun rufe gaɓar tekun Copacabana Beach, a birnin Rio de Janeiro, amma hakan bai hana mutane more bikin ranar ba.

An gudanar da wasaun tartsatsin wuta a fadin birnin London. Jirage marasa matuka sun cika sararin samaniyar a kusa da wurin shakatawa na 02 Arena a gabashin birnin London suna nuna sakonni da suka danganci annobar korona, da suka hada da alamar hukumar inshorar kiwon lafiya ta kasar NHS.

Dukkan hotunan na da haƙƙin mallaka