Ganduje ya nada sabon Sarkin Rano

Gwamnan jihar Kano da ke Najeriya, Abdullahi Ganduje, ya nada Alhaji Kabiru Muhammad Inuwa a matsayin sabon sarkin Rano.

Kafin nadinsa, Alhaji Kabiru dai shi ne hakimin Kibiya kuma Kaigaman Rano.

Ya maye gurbin margayi Sarkin Rano, Alhaji Tafida Abubakar Ill - Autan Bawo wanda ya rasu a ranar Asabar da ta wuce bayan ya yi fama da gajeruwar jinya.

Sakataren gwamnatin jihar Kano, Alhaji Usman Alhaji ne ya sanar da nadin sabon sakin na Rano a ranar Talata.

Sanarwar da babban jami'in gwamnatin ya fitar ta ce an zabi Alhaji Kabiru Muhammadu Inuwa ne a matsayin sabon sarki, daga cikin hakimai uku da suka hada da hakimin Bunkure da kuma Ciroman Rano.