Birnin Kudus: An tarwatsa masu zanga-zanga a Lebanon

Karanta rubutu kawai domin rage cin data
Bayanan bidiyo, Jami'an tsaro sun yi amfani da barkonon tsohuwa wajen tarwatsa masu zanga-zangar a birnin Beirut
An wallafa

An yi arangama yayin wata zanga-zangar adawa da matakin Trump kan birnin Kudus a gaban ofishin jakadancin Amurka da ke birnin Beirut na kasar Lebanon.

A makon jiya ne Shugaban Amurka Donald Trump ya sanar da amincewa da birnin Kudus a matsayin babban birnin kasar Isra'ila da kuma mayar da ofishin jakadancin kasar zuwa can.

Yayin zanga-zangar jami'an tsaron Lebanon sun rika watsa wa masu zanga-zangar hayaki mai sa hawaye da kuma ruwan zafi a arewacin birnin Beirut.

A daren ranar Asabar ne Kungiyar Kasashen Larabawa ta yi Allah-wadai da matakin Shugaba Trump.

Kungiyar ta ce daga yanzu bai kamata a dogara ga Amurka wajen samar da wanzuwar zaman lafiya a yankin Gabas ta Tsakiya ba.

Masu zanga-zangar sun rika jefa da duwatsu da cinna wuta a kan tituna a kusa da ofishin jakadancin da ke unguwar Awkar.

Wadansu kafafen yada labarai sun ce masu zanga-zangar sun yi kokarin kutsa kai cikin ofishin jakadancin.

Masu zangar-zangar wadanda suke sanye da bakaken kaya sun rika rera wakokin Allah-wadai da Shugaba Trump.

Skip Wanda aka fi karantawa and continue reading
Wanda aka fi karantawa

End of Wanda aka fi karantawa

Akwai dubban Falasdinawa 'yan gudun hijira da ke zaune a kasar Lebanon.

Tun bayan da Shugaba Trump ya sanar da daukar matakin ne aka rika samun zanga-zangar adawa da matakin a birnin Kudus da kuma sauran biranen duniya.

Bayanan bidiyo, Shugabannin duniya sun yi wa Trump kashedi kan Kudus