Ka'idojin shiga gasar waka ta BBC Hausa ta 2022

An wallafa 31 Janairu 2022

Wadanne ka'idojin shiga gasar waka ta BBC Hausa ta 2022 domin cikar sashen shekara 65 da fara watsa shirye-shirye da harshen Hausa.

1. Wannan gasar a bude take ga daidaikuwa da kuma hadakar da ba ta wuce mutum uku ba. Dole ne ya kasance duk wanda zai shiga gasar ka da su gaza shekara 18 da haihuwa. Ba a yarda ma'aikatan BBC ko iyalansu su shiga wannan gasa ba, walau a kungiyance ko daidaikuwa.

2. Ana son wadanda za su shiga gasar su rubuta waka ( mai amsa amo da kuma amfani da kayan kida) wadda za ta fito da murnar bikin cikar BBC Hausa shekara 65 da kafuwa. Dole ne wakar da za a aiko ta kasance a MP3 sannan ka da tsayinta ya wuce minti 5.

3. Domin aikewa da waka, dole ne masu shiga gasar su shigar da bayanansu ta wannan adireshi (Yadda za a shiga gasar waka ta BBC Hausa), din da ke shafinmu na bbchausa.com. A nan ne za a samu damar sanya MP3 da ke kunshe da wakar. Sau daya ake shiga wannan gasar saboda haka mutum ya yi Nazari kafin ya tura waka. Ga mutumin da zai aika wakar a madadin mutanen da suka yi hadaka, dole ne ya yi hakan tare da izninsu.

4. Za a rufe gasar da karfe 23:59 agogon GMT na daren 16 ga watan Fabrairun 2022. Saboda haka ba za a yi maraba da duk wata waka da aka aiko bayan nan.

Ya kamata duk wanda zai aiko da waka ya zama yana da kwafi domin ba za a dawo masa da ita ba. Za a tuntubi mutanen da suka yi nasara ne kawai.

5. Za a yi amfani da wadannan ma'aunan wajen yin alkalanci ga waka:

Bayyana turken waka kuru-kuru; cikar BBC Hausa shekara 65 da watsa shirye-shirye;
Dole waka ta mayar da hankali kan tarihi da shirye-shiryen BBC Hausa da rawar da take takawa wajen yada harshe da al'adun Hausawa a duniya;
Dacewar kananan sakonnin waka da turken waka;
Dacewar Rauji (karin murya ko amsa-amon murya) da kidan wakar da aka rera;
Amfani da harshe da azanci da fasahar waka;
Amfani da dabarun janhankali ko adon waka;

6. Bisa doron wadannan ma'aunan da aka lissafa a sama, ma'aikatan BBC za su zabi wakoki guda 30 wadanda suka yi fice daga cikin wadanda aka aiko da su. Daga nan kuma sai alkalan gasar ciki har da ma'aikacin BBC, za su zabi wadanda suka yi fice guda 3 sannan kuma za su zabi guda 12 wadanda su ma sun yi fice amma ba su iya kai wa ga nasarar shiga cikin ukun farko ba. A watan Maris ne kuma za a sanar da wadanda suka yi nasarar kasancewa a sahun ukun da suka yi nasara. BBC za ta yi amfani da sauran 12 da su ma suka cancanci yabo a tsawon watanni 12 a ci gaba da murnar cikar sashen Hausa na BBC shekara 65 da kafuwa.

7. Wakar da ta zamo ta farko za ta samu kyautar $2,000 sannan ta biyu za ta samu $1,500 inda wanda ta zo na uku kuma za ta karbi kyautar $1000. Akwai yiwuwar BBC ta sanya ko wallafa wakokin uku da suka yi fice da ma sauran shabiyun da suka yi fice amma ba su kai ga nasara ba, a rediyo da shafukanta na intanet.

Har wa yau, sashen BBC Sounds da sauran abokan huldar BBC Hausa kamar Freeedom Radio da Radio Gotel da Rima Radio da dai sauransu ka iya watsa wadannan wakoki. Akwai yiwuwar BBC za ta gayyaci mutum ukun da suka yi nasara domin halartar wurin bikin da za a ba su kyautukan a Abuja da ke Nijeriya. Idan har za BBC za ta yi hakan to ita ce za ta dauki nauyin sufuri da abinci da wurin kwanan mutanen guda uku. Sai dai BBC ba za ta dauki nauyin karin wasu abubuwan da ba wadannan ba kamar bizar shiga Najeriya da takardu.

8. Dole ne wakar da za a aika ta dace da ka'idojin BBC na aikin jarida da ke kunshe a wannan adireshi https://bbc.com.im/editorialguidelines/%3C/a%3E. Hakan kuwa ya hada da duk wata waka da ta kunshi abubuwa kamar haka:

(i) Nuna kyama ga wani sashe na al'umma;

(ii) Nuna tashin hankali da mummunar dabi'a da ta'addanci da wasu abubuwan da suke yi wat sarin tsaron kasa zagon kasa;

(iii) Tallata shan taba ko makamai ko giya ko batsa;

(iv) Nuna kiyayya saboda launin fata ko addini ko jinsi ko nakasa ko shekaru ko kuma nuna kyama ga mutum dangane da abin da ya zama na jima'i.

9. Dole ne waka ta zama kirkirar mai ita ko dai mutum daya ko kuma hadaka sannan ka da ta keta hakkin wasu. Ka da masu shiga gasar su karya kowacce ka'idar gasar yayin kirkirar wakar. Hakan na nufin ka da mawaki ya saci fasahar wani mawakin kamar kida domin yin tasa wakar.

10. Dole ne wadanda suka yi nasara su tabbatar sun samu dukkanin izni daga abokan hadakarsu domin BBC za ta iya amfani da wakokinku kamar yadda aka ambata.

11. Shiga wannan gasa na nufin wakokin ukun da suka yi nasara ko kuma 12 da suka yi fice sun bai wa BBC dama ta kai-tsaye yin amfani da ita ta hanyar ta hanyar watsawa ga duniya a cikin shirye-shiryenta har abada. Haka kuma BBC tana da damar gyara ko fassara wakokin guda uku da kuma 12 da suka yi fice. Sai dai ana bukatar iznin dukkan mambobin hadakar wakokin da suka zama zakaru uku domin BBC ta yi amfani da su.

12. BBC tana da damar duba dacewar kowacce waka da ka'idojin da aka shimfida kuma BBC tana da 'yancin fitar da wakar da ta saba ka'idojin gasar.

13. Idan BBC ba ta iya samun daya daga cikin ukun da suka zama zakaru ba, bayan bin dukkan hanyoyin tuntuba, to BBC tana da damar bai wa wakar da ke biye da ita wannan mukami.

14. BBC ka iya shiga Karin yarjejeniya da zakarun uku domin cigaba daga ina aka tsaya dangane da wakar. Idan kuma har aba a samu daidaito ba to babu batun cigaba da hulda bayan karbar kyauta.

15. Duk wanda ya shiga wannan gasa to tamkar ya mika wa BBC wuka da nama ta amincewa ko yin wurgi da dukkan wakar da a idanun BBC ta saba wadannan ka'idoji ko akwai ha'inci ko kuma tsinka wa BBC mutumci.