Pogba baya son a yi masa tiyata a gwiwar kafa saboda gasar kofin duniya

Paul Pogba bai amince likitoci sun yi masa tiyata a raunin da yake da shi a gwiwar kafa ba, zai koma atisaye a Juventus a makon nan.

Dan kwallon mai shekara 29 na fargabar da zarar an yi masa aikin, zai yi jinya mai tsawo da ba zai samu damar wakiltar Faransa a kofin duniya ba a Qatar.

Tawagar Faransa ce mai rike da kofin duniya da ta dauka a Rasha a 2018, kuma Pogba yana cikin 'yan kwallon da suka raka rawar gani.

Za a buga gasar kofin duniya a Qatar tsakanin cikin watan Nuwamba zuwa Disambar 2022.

Ya koma Juventus a farkon kakar nan, bayan da kwantiraginsa ya kare daga Manchester United a karshen kakar da ta wuce.

Pogba ya ji rauni a lokacin atisaye da Juventus ke yi a Amurka don shirn tunkarar kakar tamaula ta bana.

Ya buga wa Juventus wasa daya shi ne wanda ta yi da kungiyar Mexico, Chivas Guadalajara a watan jiya, wanda ya yi korafin yana jin radadi a gwiwar kafarsa.

La Gazzetta dello Sport ta ce Pogba zai yi atisaye na musammam a dakin motsa jiki da wurin linkaya, ana sa ran zai yi jinyar mako biyar.

Juventus za ta fara wasan farko a Serie A ta bana da karbar bakuncin Sassuolo ranar Litinin 15 ga watan Agusta.