Zwayer ne zai busa wasan Real da Liverpool ranar Laraba
Asalin hoton, Getty Images
Felix Zwayer ne zai yi alkalancin wasan da Real Madrid za ta karbi bakuncin Liverpool a Champions League ranar Laraba.
Wannan shine wasa na biyu da za su kara a bana a zagaye na biyu gurbin 'yan 16 a gasar zakarun Turai da za su kece raini a Santiago Bernabeu.
Raflin dan kasar Jamus zai yi alkalancin wasan Real Madrid karo na biyu a gasar ta zakarun Turai.
Shine ya busa wasan cikin rukuni a Champions League da Real Madrid ta casa Galatasaray 6-0 a kakar 2019/20.
Kungiyar Sifaniya da ta Ingila sun kara ranar 21 ga watan Fabrairu a Anfield a wasan farko, inda Real ta yi nasara da cin 5-2.
Liverpool ce ta fara zura kwallo biyu a raga ta hannun Darwin Nunez da Mohamed Salah.
Daga baya Real ta ci biyar ta hannun Vinicius Junior da ya zura biyu a raga da Eder Militao mai daya da kuma Karim Benzema da shima ya ci biyu.
Ko a bara a wasan karshe da suka buga a Faransa, Real ce ta ci Liverpool 1-0 ta dauki Champions League na 14 jimilla.
Liverpool tana da kofin zakarun Turai shida a tarihi, amma na karshe da ta dauka shine a 2018/19 da ta ci Tottenham 2-0.
