Da ƙyar idan Maguire da Ugarte za su buga wasan Sociedad

Watakila Harry Maguire da Manuel Ugarte ba za su buga wa Manchester United wasa da Real Sociedad ba ranar Alhamis a Europa League.

Hakan ya biyo bayan da ƴan ƙwallon ba su yi atisaye ba ranar Laraba a shirye-shiryen da ƙungiyar ke yi na buga wasan farko zagayen ƴan 16 a Sifaniya.

Ƙungiyar da Ruben Amorin ke jan ragama na fatan komawa kan ganiya, bayan da Fulham ta yi waje da ita a FA Cup ranar Lahadi.

An cire United mai rike da FA Cup na bara a bugun fenariti a Old Trafford, bayan da suka tashi 1-1 har da ƙarin lokaci.

United na fama da ƴan wasan da ke jinya a shirin fuskantar Sociedad, sai ga Maguire da Ugarte sun shiga jerin masu jinya, bayan raunin da suka ji ranar Lahadi.

Ba a sa ran ƴan ƙwallon biyu za su je Sifaniya, kenan za su ci gaba da jinya tare da Amad Diallo da Kobbie Mainoo da kuma Lisandro Martinez.

Sauran da ke jinya a United sun haɗa da Luke Shaw da Jonny Evans da Mason da Altay Bayindir da Tom Heaton.

Matashi, Toby Collyer ya yi atisaye ranar Laraba ana sa ran za a je da shi Sifaniya, sai dai ba a yi wa matashi mai shekara 17, Chido Obi rigistar buga Europa League ba.

Ɗan wasan da United ta ɗauka a Janairu, Patrick Dorgu zai iya buga karawar, wanda aka dakatar wasa uku a gasar tamaula ta Ingila.