Lafiya Zinariya: Ko kin san matsalar da kan shafi jakar ƙwayayen mace?

Ko wace mace da ke yin jinin al'ada na iya samun matsalar, in ji likitoci.

Fatar da ke kunshe da ruwa a jakar ƙwayayen mace wato 'ovarian cyst' a mafi yawancin lokuta, an fi gano shi ne a lokacin da aka yi hoton ciki.

A cewar masana fatar mai kama da jaka da ke ƙunshe da ruwa da kan fito a jakar kwan ɗaya ko duka biyu sun kasu zuwa gida biyu.

Kashi na farko shi ne mai sauƙi, wanda ƙarami ne kuma ya kan ɓace da kansa bayan wani lokaci, a don haka babu buƙatar yin komai sai dai a jira.

Sai dai idan ya girma sosai ko kuma ya murɗe, za a iya ɗaukar matakin cire shi ta hanyar tiyata.

Kashi na biyun kuma, ba ruwa kaɗai ke ƙunshe a cikin fatar ba, sannan ya kan fitar da sinadarai a kan mahaifa.

Wannan kashi na biyun na janyo wasu matsalolin da suka haɗa da zuban jini da ciwon ciki.

Dr. Hurera Umar ta asibitin Babbar Ruga a jihar Katsina da ke Najeriya ta yi cikakken bayani kan wannan matsala. Don haka latsa makunnin da ke sama domin sauraron shirin lafiya Zinariya.