કૅનેડામાં વિનાશક વાવાઝોડું, બ્રિટિશ કોલંબિયામાં કટોકટી જાહેર કરાઈ

કૅનેડાના વેનકુવરમાં ભારે વરસાદને કારણે શહેર સાથેનો માર્ગ અને રેલવે સંપર્ક કપાઈ ગયો છે.

અધિકારીઓના મતે સદીમાં એક વાર જોવા મળે એવી પૂરની સ્થિતિનું નિર્માણ થયું છે, જેના કારણે શહેરને જોડતા બે રસ્તા પાણી ભરાઈ જવાથી બંધ થઈ ગયા છે.

બચાવકાર્ય સાથે જોડાયેલા કર્મચારીઓના જણાવ્યા પ્રમાણે, હાઈવે પર ભૂસ્ખલનને કારણે એક મહિલાનું મૃત્યુ થયું છે, જ્યારે અન્ય બે લોકો લાપતા થયા છે. પૂરની પરિસ્થિતિને કારણે હજારો લોકો પોતાના ઘર છોડવા માટે મજબૂર બન્યા છે.

રોયલ કૅનેડિયન માઉન્ટેડ પોલીસના સાર્જન્ટ જેનલે શોહેત (RCMP) પ્રમાણે મૃત્યુ પામેલ મહિલાનો મૃતદેહ વેનકુવરથી 250 કિલોમીટર દૂર આવેલ લિલૂસેટ ખાતે મળી આવ્યો હતો.

બ્રિટિશ કોલંબિયામાં મહિનાનો સરેરાશ વરસાદ 24 કલાકમાં પડી ગયો હતો, જેના કારણે સિઝનલ નદીઓમાં ભારે પાણી આવી ગયાં હતાં અને હજારો લોકોને તત્કાળ ઘર છોડવા જણાવવામાં આવ્યું હતું.

ઉનાળા દરમિયાન બ્રિટિશ કોલંબિયામાં ભારે ગરમી પડી હતી જેમાં 500થી વધુ લોકોનાં મૃત્યુ થયા હતા. જંગલની આગને કારણે આખું શહેર તબાહ થઈ ગયું હતું.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો